តម្លៃមាសអន្តរជាតិចាប់ផ្តើមរំកិលចុះ ខណៈដែលប្រាក់ដុល្លារអាមេរិកបានឡើងថ្លៃ
បរទេស ៖ បន្ទាប់ពីហក់ឡើងលើសតម្លៃ ៤ ០០០ដុល្លារក្នុង១អោន (៤ ៨២០ដុល្លារក្នុង១តម្លឹង) រួចមក តម្លៃមាសអន្តរជាតិបានចាប់ផ្តើមធ្លាក់ចុះមកនៅក្រោម ៤…
បរទេស ៖ បន្ទាប់ពីហក់ឡើងលើសតម្លៃ ៤ ០០០ដុល្លារក្នុង១អោន (៤ ៨២០ដុល្លារក្នុង១តម្លឹង) រួចមក តម្លៃមាសអន្តរជាតិបានចាប់ផ្តើមធ្លាក់ចុះមកនៅក្រោម ៤ ០០០ដុល្លារ/អោន ខណៈដែលប្រាក់ដុល្លារអាមេរិកបានឡើងថ្លៃ ហើយតម្រូវការមាសសម្រាប់ជាទុនបម្រុងក៏បានថយចុះផងដែរ បន្ទាប់ពីប្រទេសអ៊ីស្រាអែល និងក្រុមហាម៉ាសបានឈានដល់កិច្ចព្រមព្រៀងបទឈប់បាញ់រួមគ្នាមួយ។
ចុងបញ្ចប់នៃការជួញដូរ កាលពីថ្ងៃទី៩ ខែតុលា ឆ្នាំ២០២៥ តម្លៃមាសអន្តរជាតិបានធ្លាក់ចុះជិត ៦៥ដុល្លារ មកនៅត្រឹម ៣ ៩៧៥ដុល្លារ/អោន (៤ ៧៨៩ដុល្លារ/តម្លឹង)។ នៅក្នុងវគ្គជួញដូរដែលកំពុងបន្ត គិតត្រឹមម៉ោង ២នាទីរសៀលថ្ងៃទី១០ តុលា (ម៉ោងនៅកម្ពុជា) តម្លៃមាសអន្តរជាតិបានបន្តធ្លាក់ចុះមកនៅត្រឹម ៣ ៩៦៦ដុល្លារ/អោន (៤ ៧៧៨ដុល្លារ/តម្លឹង)។
យោងតាមប្រភពពីទីភ្នាក់ងារសារព័ត៌មាន Reuters បានរាយការណ៍ថា សន្ទស្សន៍ប្រាក់ដុល្លារអាមេរិកបានកើនឡើង ០,៥% ជិតដល់កម្រិតខ្ពស់ក្នុងរយៈពេល ២ ខែ ដែលធ្វើឱ្យមាសកាន់តែថ្លៃសម្រាប់អ្នកទិញនៅបរទេស។ លោក Tai Wong ពាណិជ្ជករមាសឯករាជ្យ លើកឡើងថា វិនិយោគិនកំពុងទទួលបានប្រាក់ចំណេញមួយចំនួនពីការលក់មាស នៅពេលដែលបទឈប់បាញ់ក្នុងតំបន់ហ្គាហ្សា (Gaza) បានចូលជាធរមាន។
ប្រទេសអ៊ីស្រាអែល និងក្រុមហាម៉ាស់បានចុះហត្ថលេខាលើកិច្ចព្រមព្រៀងឈប់បាញ់គ្នា កាលពីថ្ងៃទី៩ ខែតុលា កន្លងទៅ ដែលជាការកត់សម្គាល់ដំណាក់កាលដំបូងនៃគំនិតផ្តួចផ្តើមរបស់ប្រធានា ធិបតីអាមេរិក លោក ដូណាល់ ត្រាំ (Donald Trump) ដើម្បីបញ្ចប់ការប្រយុទ្ធគ្នានៅតំបន់ហ្គាហ្សា។
នៅក្នុងវគ្គជួញដូរ កាលពីថ្ងៃទី៨ តុលា តម្លៃមាសអន្តរជាតិបានហក់ឡើងលើស ៤ ០០០ដុល្លារ/អោន ដោយបំបែកកំណត់ត្រាខ្ពស់បំផុត ៤ ០៥៩ដុល្លារ/អោន (៤ ៨៩០ដុល្លារ/តម្លឹង)។ នេះមិនត្រឹមតែជាតម្លៃខ្ពស់បំផុតក្នុងប្រវត្តិសាស្ត្រនៃការជួញដូរមាសពិភពលោកប៉ុណ្ណោះទេ តែក៏ជាការកត់សម្គាល់នៃការកើនឡើងតម្លៃមាសខ្ពស់បំផុត ចាប់តាំងពីដើមឆ្នាំមក ពោលបានកើនឡើងប្រហែល ៥១% ហើយ។
ការកើនឡើងតម្លៃមាសអន្តរជាតិ ជំរុញដោយភាពតានតឹងភូមិសាស្ត្រនយោបាយ តម្រូវការពីបណ្តាធនាគារកណ្តាលពិភពលោកកាន់តែខ្លាំង មូលនិធិជួញដូរប្រាក់ ETF ក៏ដូចជាការរំពឹងទុកនៃការកាត់បន្ថយអត្រាការប្រាក់ដោយធនាគារកណ្តាលអាមេរិក (Fed) និងភាពមិនប្រាកដប្រជាសេដ្ឋកិច្ច ដែលបណ្តាលមកពីពន្ធគយផងដែរ។
នៅកិច្ចប្រជុំកាលពីខែកញ្ញារបស់ Fed ដែលបានចេញផ្សាយកាលពីថ្ងៃពុធបានបង្ហាញថាមន្ត្រី Fed បានយល់ថា ហានិភ័យចំពោះទីផ្សារការងាររបស់អាមេរិកគឺខ្ពស់ គ្រប់គ្រាន់ដើម្បីធានាដល់ការកាត់បន្ថយអត្រាការប្រាក់ ប៉ុន្តែនៅតែមានការប្រុងប្រយ័ត្នខ្ពស់ពាក់ព័ន្ធនឹងអតិផរណា។ Fed បានកាត់បន្ថយអត្រាការប្រាក់របស់ខ្លួន ២៥ពិន្ទុមូលដ្ឋាន នៅក្នុងខែកញ្ញា។ បណ្តាវិនិយោគិននៅតែមើលឃើញថា ការកាត់បន្ថយ ២៥ពិន្ទុផ្សេងទៀត នឹងកើតនឡើងក្នុងខែតុលា និងខែធ្នូ៕ ប្រភព ៖ Reuters
ចែករំលែកព័តមាននេះ