សង្គ្រាមអ៊ុយក្រែន ៖ រដ្ឋធានីអ៊ុយក្រែនមួយផ្នែកកាលពីព្រឹកថ្ងៃទី១០ តុលា រងការប៉ះពាល់ដោយការដាច់ភ្លើងអគ្គិសនី ក្រោយការវាយប្រហារថ្មីរបស់រុស្ស៊ីដោយមីស៊ីលនិងដ្រូន។ កាលពីថ្ងៃទី៩ តុលា ប្រធានាធិបតីអ៊ុយក្រែន លោកវ៉ូឡូឌីមៀរហ្សេឡេនស្គី…
សង្គ្រាមអ៊ុយក្រែន ៖ រដ្ឋធានីអ៊ុយក្រែនមួយផ្នែកកាលពីព្រឹកថ្ងៃទី១០ តុលា រងការប៉ះពាល់ដោយការដាច់ភ្លើងអគ្គិសនី ក្រោយការវាយប្រហារថ្មីរបស់រុស្ស៊ីដោយមីស៊ីលនិងដ្រូន។
កាលពីថ្ងៃទី៩ តុលា ប្រធានាធិបតីអ៊ុយក្រែន លោកវ៉ូឡូឌីមៀរហ្សេឡេនស្គី បានចោទប្រកាន់ក្រុងមូស្គូថា ចង់សាបព្រោះភាពចលាចលដោយវាយប្រហារសំដៅលើបណ្ដាហេដ្ឋារចនាសម្ព័ន្ធថាមពល ។
រដ្ឋធានីគៀវជាថ្មីម្ដងទៀត ជាគោលដៅនៃការវាយប្រហារ ទ្រង់ទ្រាយធំមួយរបស់រុស្ស៊ីកាលពីយប់ថ្ងៃទី៩មកទី១០តុលា បណ្ដាលឲ្យមានការដាច់ចរន្តអគ្គិសនី នៅផ្នែកខាងកើតនៃទីក្រុងនោះ។ នេះបើតាមអាជ្ញាធរមូលដ្ឋាន។ គេឮស្នូរផ្ទុះជាច្រើននៅក្រុងគៀវនាវេលាទៀបភ្លឺ ព្រមទាំងឮសូរសំឡេងម៉ាស៊ីនដ្រូន ។
កងទ័ពអាកាសអ៊ុយក្រែនរាយការណ៍តាមតេឡេក្រាម ពីការវាយប្រហាររបស់សត្រូវដោយមីស៊ីលបាលីស្ទិកនិងការវាយប្រហារខ្លាំងដោយដ្រូនច្រើនគ្រឿង។ កងទ័ពនោះអំពាវនាវដល់ប្រជាជនឲ្យស្ថិតក្នុងទីជម្រកការពារ។ ក្រសួងថាមពលអ៊ុយក្រែនលើកឡើងតាមបណ្ដាញសង្គមថា រុស្ស៊ីវាយប្រហារខ្លាំងក្លាលើហេដ្ឋារចនាសម្ព័ន្ធថាមពលអ៊ុយក្រែន។ តាមព័ត៌មាននានាថា មជ្ឈមណ្ឌលអគ្គិសនីមួយ ដែលផ្ដល់ភ្លើងដល់ក្រុងគៀវរងការប៉ះពាល់។ ភាគខាងកើតក្រុងគៀវរងការដាច់ភ្លើងនិងទឹកផងដែរ។
ម្យ៉ាងទៀតតាមអាជ្ញាធរមូលដ្ឋានថា កុមារម្នាក់អាយុ៧ឆ្នាំបានស្លាប់និងមនុស្ស៣នាក់ទៀតរងរបួស នាពេលយប់ក្នុងតំបន់ក្រុងហ្សាប៉ូរីហ្ស៊ីយ៉ា នាភាគកណ្ដាលប្រទេសហើយមនុស្សយ៉ាងតិច៩នាក់រងរបួសនៅក្រុងគៀវ។ រុស្ស៊ីវាយប្រហាររាល់ថ្ងៃលើបណ្ដាទីក្រុងអ៊ុយក្រែន តាំងពីចាប់ផ្ដើមសង្គ្រាមមកដោយសំដៅជាពិសេសលើបណ្ដាហេដ្ឋារចនាសម្ព័ន្ធថាមពល ពេលរដូវរងាជិតមកដល់។
លោកហ្សេឡេនស្គីលើកឡើងពីការបង្កើនការគាបសង្កត់របស់រុស្ស៊ី ដោយវាយប្រហារលើផ្នែកឧស្ម័នអ៊ុយក្រែន ដែលអាចបង្ខំក្រុងគៀវឲ្យនាំចូលបន្ថែម។ អ៊ុយក្រែនក៏វាយប្រហារដោយទៀងទាត់ដែរលើរុស្ស៊ី សំដៅជាពិសេសលើបណ្ដារោងចក្រចម្រាញ់ប្រេងកាតធំៗ ដែលនាំឲ្យតម្លៃប្រេងឥន្ធនៈឡើងថ្លៃនៅរុស្ស៊ីចាប់តាំងពីរដូវក្ដៅមក។ លោកហ្សេឡេនស្គីវាយតម្លៃថា ការខ្វះប្រេងឥន្ធនៈរបស់រុស្ស៊ីមានខ្ទង់២០%នៃសេចក្ដីត្រូវការ៕
ចែករំលែកព័តមាននេះ