រាជធានីភ្នំពេញ ៖ ថ្ងៃនេះ គឺជាថ្ងៃទី១០ ខែតុលា ឆ្នាំ២០២៥ ដែលជាថ្ងៃឱសានវាទ ដែលសៀមព្រមានប្រើច្បាប់ព្រៃដេញពលរដ្ឋខ្មែរចេញពីទឹកដីខ្មែរ ។ តើសៀម…
រាជធានីភ្នំពេញ ៖ ថ្ងៃនេះ គឺជាថ្ងៃទី១០ ខែតុលា ឆ្នាំ២០២៥ ដែលជាថ្ងៃឱសានវាទ ដែលសៀមព្រមានប្រើច្បាប់ព្រៃដេញពលរដ្ឋខ្មែរចេញពីទឹកដីខ្មែរ ។ តើសៀម អាចប្រើច្បាប់ព្រៃរបស់ខ្លួន ដើម្បីដេញ ឬជម្លៀសពលរដ្ឋខ្មែរនៅភូមិជោគជ័យ និងព្រៃចាន់ បានទេ? រឿងរ៉ាវក្តៅគគុកដែលថៃព្រមានថា នឹងប្រើច្បាប់ព្រៃលើទឹកដីខ្មែរ គឺជារឿងមិនអាចទៅរួចនោះទេ ព្រោះពលរដ្ឋខ្មែរចេញពីភូមិព្រៃចាន់ និងភូមិជោគជ័យ ក្នុងឃុំអូរបីជាន់ ស្រុកអូជ្រៅខេត្តបន្ទាយមានជ័យ គឺរស់នៅយូរយារណាស់មកហើយ លើទឹកដីរបស់ខ្មែរ ។
ដូច្នេះ បញ្ហាជម្លៀសពលរដ្ឋខ្មែរចេញពីភូមិព្រៃចាន់ និងភូមិជោគជ័យ ក្នុងឃុំអូរបីជាន់ ដែលភាគីថៃ អះអាងទាមទារដោយឥតអៀនខ្មាស់ពិភពលោកថា ទីតាំងនោះ គឺស្ថិតនៅលើទឹកដីរបស់ខ្លួន ដោយសម្អាងលើផែនទី ដែលគូរដោយឯកតោភាគី ជារឿងដែលថៃបំភ្លៃប្រវត្តិសាស្ត្រ ។
ជុំវិញរឿងរ៉ាវថៃព្រមានអនុវត្តច្បាប់ព្រៃជម្លៀសពលរដ្ឋខ្មែរចេញពីទឹកដីខ្មែរនេះផងដែរ នៅព្រឹកថ្ងៃទី១០ ខែតុលានេះ លោកបណ្ឌិត យ៉ង ពៅ អគ្គលេខាធិការរាជបណ្ឌិត្យសភាកម្ពុជា បានលើកឡើង៥ ចំណុចទៅកាន់ភាគីថៃ ។
លោកបណ្ឌិត យ៉ង ពៅ បានសរសេរលើគណនីហ្វេសប៊ុកផ្លូវការ របស់លោកបណ្ឌិត ដែលមានខ្លឹមសារទាំងស្រុងថា «ខ្ញុំ សូមគូសបញ្ជាក់ទៅជនជាតិថៃទាំងឡាយ ៖
ទី១- ប្រជាជនថៃត្រូវតែស្វែងយល់ បើទោះជារដ្ឋាភិបាលរបស់អ្នកធ្វើជាភ្លើក៏ដោយ អ្នកមិនត្រូវនាំប្រទេសភ្លើទាំងនគរនោះទេ ។ ខ្ញុំសូមបញ្ជាក់យ៉ាងច្បាស់ថា គ្មានប្រទេសណាមួយ អាចមកបណ្ដេញពលរដ្ឋកម្ពុជា ចេញពីទឹកដីកម្ពុជាបាននោះទេ ហើយក៏គ្មានថ្នាក់ដឹកនាំកម្ពុជាណាម្នាក់អាចធ្វើតាមឱសានវាទរដ្ឋបរទេសមកបណ្ដេញប្រជាជនខ្លួនឯងទៅកើតដែរ ។
ទី២- រដ្ឋាភិបាល អានុទីន ឆានវីរាក់គុល កំពុងតែ លប្រលែងលេងនឹងភ្លើងការទូត ជាមួយនឹងលោក ត្រាំ នូវឥរិយាបថច្រឡោងខាម និងព្រហើន ។
ទី៣- អានុទីន ឆានវីរាក់គុល បានដាក់លក្ខខណ្ឌនានាឱ្យកម្ពុជាធ្វើតាមខ្លួន ហាក់បង្ហាញថា ថៃជាម្ចាស់លើកម្ពុជា ។ នេះជាក្តីសុបិន ដែលថៃតែងវង្វេងដោយខ្លួនឯង ក្នុងខណៈថៃខ្លួនឯង បានបំពានយ៉ាងធ្ងន់ធ្ងរដល់គោលការណ៍ជាអន្តរជាតិ ច្បាប់អន្តរជាតិ រួមទាំងជាន់ឈ្លីធម្មនុញ្ញអាស៊ានផងដែរ។
ទី៤- អានុទីន ឆានវីរាក់គុល បានផ្ញើសារភូតលោកត្រាំថា ថៃត្រៀមខ្លួនជាស្រេចក្នុងការចរចាប្រសិនបើកម្ពុជាដកអាវុធធុនធ្ងន់ចេញពីតំបន់ព្រំដែន, ដោះសម្អាតមីន, បង្ក្រាបអ្នកឆបោកតាមអ៊ីនធឺណិត និងជម្លៀសពលរដ្ឋនៅព្រំដែនដែលថៃអះអាងថារស់នៅលើទឹកដីរបស់ខ្លួន។ គ្មានអ្នកនរណាម្នាក់ កុំថាឡើយដល់ទៅលោក ដូណាល់ត្រាំ អាចនឹងជឿនោះទេ។
ទី៥- កម្ពុជា ឈរលើភាពត្រឹមត្រូវ ទាំងច្បាប់អន្តរជាតិ ទាំងការទូត ទាំងលើភាពជាក់ស្ដែង និងបើកចំហ ដោយដឹកដៃគ្នា(កម្ពុជា-ថៃ) ទៅICJ ឬUNSC ចៀសវាងឆ្លើយសាចទឹកដាក់គ្នា។
លោកបណ្ឌិត យ៉ង ពៅ បន្ថែមថា «ជាទស្សនៈខ្ញុំយល់ថា ទស្សនៈកម្ពុជា ចំពោះការចូលរួមពីសហគមន៍អន្តរជាតិជាអន្តរការី មិនមែនជាការធ្វើអន្តរាគមន៍ ឬការលូកដៃ ដូចថៃ ខ្លាចរអារនោះទេ ព្រោះខ្ញុំយល់ថា ចរចាទ្វេភាគីកម្ពុជា-ថៃ អស់រយៈពេលយូរមកហើយលទ្ធផលនៅតែមានជម្លោះដដែល ។
ម្យ៉ាងទៀត ជម្លោះកម្ពុជា-ថៃ ជាជម្លោះរវាងរដ្ឋ និងរដ្ឋ មិនមែនជម្លោះផ្ទៃក្នុងរបស់រដ្ឋមួយនោះទេ ដូច្នេះការដែលមានអន្តរការី មិនមែនជាការលូកដៃនោះទេ ។ ថៃ ចេះតែយល់ច្រឡំ ឬធ្វើជាច្រឡំ?
ជាចុងបញ្ចប់ លោកបណ្ឌិត យ៉ង ពៅ បានបញ្ជាក់ថា «គ្មានសោះឡើយ ការដេញប្រជាជនកម្ពុជា ចេញពីភូមិជោគជ័យ និងភូមិព្រៃចាន» ៕
ចែករំលែកព័តមាននេះ