ទីក្រុងហ្កាហ្សា៖ អ៊ីស្រាអែលចាប់ផ្ដើមដកកងទ័ពជាបណ្ដើរៗចេញពីជ្រោយហ្កាហ្សានៅពេលកិច្ចព្រមព្រៀងឈប់បាញ់គ្នាចូលជាធរមាន។ នេះជាការអនុវត្តដំណាក់កាលទីមួយនៃផែនការសន្តិភាពដែលមានម្ភៃចំណុច និងដែលផ្ដួចផ្ដើមឡើងដោយលោកត្រាំ។ ទន្ទឹមនឹងនោះ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ នៅតែបញ្ជាក់ជំហរឡើងវិញថាក្រុមហាម៉ាស់ត្រូវតែទម្លាក់អាវុធចុះដោយសន្តិវិធី។ បើមិនដូច្នេះទេ លោកនឹងប្រើប្រាស់កម្លាំងដើម្បីកាត់រំសាយអាវុធរបស់ពួកគេ។ លោកថ្លែងថាតំបន់ហ្កាហ្សាដាច់ខាតត្រូវតែជាដែនដីដែលគ្មានកងទ័ព។
ក្រឡេកទៅមើលតំបន់ខាន់យុននីស (Khan Younis) ដែលស្ថិតនៅជ្រោយហ្កាហ្សាខាងត្បូងឯណោះ គេឃើញថាកងទ័ពអ៊ីស្រាអែលចាប់ផ្ដើមដកថយទៅតំបន់ខាងកើតដែលស្ថិតនៅក្បែរព្រំដែនអ៊ីស្រាអែល។ ប៉ុន្តែគេនៅតែស្ដាប់ឮស្នូរគ្រាប់កាំភ្លើងដែលបាញ់ចេញពីរថក្រោះដដែល។ នេះបើយោងតាមការអះអាងរបស់ប្រជាជនដែលរស់នៅក្បែរកន្លែងកើតហេតុ។
នៅជំរំនូសេរ៉ាត (Nusseirat) នៃតំបន់បិទខ្ទប់ គេឃើញទាហានអ៊ីស្រាអែលចាប់ផ្ដើមរុះរើប៉ុស្តិ៍ ឬទីតាំងរបស់ខ្លួន និងបង្ហួសដំណើរទៅភាគខាងកើតឆ្ពោះទៅរកព្រំដែនអ៊ីស្រាអែល។ ប៉ុន្តែគេឃើញថាអ៊ីស្រាអែលនៅតែបន្តរក្សាទុកទាហានរបស់ខ្លួនមួយចំនួនឱ្យឈរជើងនៅទីតាំងរបស់ខ្លួនដដែល។ លោកណឺតាន់យ៉ាហ៊ូថ្លែងថាចំណាប់ខ្មាំងទាំងអស់ដែលត្រូវបានចាប់ពង្រត់កាលពីថ្ងៃទី៧ ខែតុលា ឆ្នាំ២០២៣នឹងវិលត្រឡប់មកវិញនៅរយៈពេលប៉ុន្មានថ្ងៃខាងមុខនេះ។
បន្ទាប់ពីក្រុមហាម៉ាស់យល់ព្រមទទួលយកកិច្ចព្រមព្រៀងសន្តិភាពនោះ គណៈរដ្ឋមន្ត្រីអ៊ីស្រាអែលក៏បានអនុម័តកិច្ចព្រមព្រៀងកាលពីព្រឹកមិញ។ ប៉ុន្តែកិច្ចព្រមព្រៀងលើកនេះគ្រាន់តែជាដំណាក់កាលទី១ប៉ុណ្ណោះព្រោះហាម៉ាស់មិនទទួលយកកិច្ចព្រមព្រៀងដែលផ្ដួចផ្ដើមដោយលោកត្រាំ១០០%ទេ។ ពួកគេថាចំណុចខ្លះត្រូវការពិភាក្សានៅក្នុងចំណោមក្រុមប៉ាឡេស្ទីនពីគ្រប់និន្នាការ។
ឥឡូវនេះ បញ្ហាដែលអាចនឹងដោះស្រាយចេញគឺក្រុមហាម៉ាស់ដោះលែងចំណាប់ខ្មាំង។ ជាថ្នូរត្រឡប់មកវិញ អ៊ីស្រាអែលត្រៀមដោះលែងអ្នកទោសជនជាតិប៉ាឡេស្ទីនជាច្រើននាក់។ ចំណុចមួយទៀតគឺការផ្អាកប្រយុទ្ធគ្នា។ ប៉ុន្តែនៅមានចំណុចសំខាន់ៗជាច្រើនទៀតដែលមិនទាន់ដោះស្រាយ។ នៅពេលលោកណឺតាន់យ៉ាហ៊ូថ្លែងសុន្ទរកថាទៅកាន់ជនរួមជាតិនោះ គេឃើញថាជនជាតិប៉ាឡេស្ទីនដើរបន្តបន្ទាប់គ្នាដ៏វែងអន្លាយដើម្បីវិលត្រឡប់ទៅផ្ទះវិញ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ