ទីក្រុងឡុង៖ លោកត្រាំបានដាក់ការស្ដីបន្ទោសទៅលើលោកពូទីកាលពីយប់មិញនៅពេលលោកចូលរួមសន្និសីទសារព័ត៌មានជាមួយនាយករដ្ឋមន្ត្រីអង់គ្លេស លោកខៀស្តាមើ (Keir Starmer)។ លោកត្រាំថ្លែងថាពីដំបូងដៃ លោកសង្ឃឹមថានឹងជួយដោះស្រាយបញ្ហាអ៊ុយក្រែនដើម្បីឱ្យមានកិច្ចព្រមព្រៀងសន្តិភាពឱ្យបានឆាប់រហ័ស។ ប៉ុន្តែទង្វើរបស់លោកពូទីនធ្វើឱ្យកិច្ចខិតខំប្រឹងប្រែងនោះប្រែជាអសារឥតការទៅវិញ។
ចំពោះអង់គ្លេសមួយ លោកត្រាំមិនសូវហ៊ានប៉ះប៉ុន្មានទេ។ ទោះបីនាយករដ្ឋមន្ត្រីអង់គ្លេសប្រកាសគាំទ្ររដ្ឋប៉ាឡេស្ទីនយ៉ាងណាក្ដី លោកត្រាំសូមមិនធ្វើអត្ថាធិប្បាយទេ។ ប៉ុន្តែនៅក្នុងបញ្ហាអន្តោប្រវេសន៍ លោកត្រាំនិយាយបញ្ចេះអង់គ្លេសឱ្យប្រើកងទ័ពដើម្បីចាត់ការ។ លោកត្រាំថាលោកពូទីនធ្វើឱ្យលោកខកចិត្តណាស់។ គាត់នៅតែបន្តកាប់សម្លាប់មនុស្សជាច្រើននាក់។ មនុស្សរបស់គាត់ (កងទ័ពរុស្ស៊ី) ក៏បាត់បង់ជីវិតច្រើនផងដែរ។ លោកថាទាហានរុស្ស៊ីស្លាប់ច្រើនជាងទាហានអ៊ុយក្រែន។
លោកថ្លែងបន្តទៀតថាមុនដំបូង លោកស្មានថាបញ្ហាអ៊ុយក្រែនងាយស្រួលដោះស្រាយ និងងាយស្រួលចរចាគ្នាឱ្យមានបទឈប់បាញ់ព្រោះលោកសម្អាងទៅលើការរក្សាទំនាក់ទំនងល្អរវាងលោក និងលោកពូទីន។ ប្រហែលជាដោយសារការគិតដូច្នេះហើយទើបបានជាលោកត្រាំប្រកាសថាប្រើពេលតែ២៤ម៉ោងអាចបិទបញ្ចប់សង្គ្រាម។ ប៉ុន្តែនៅពេលនេះទើបលោកយល់ច្បាស់។ លោកថាលោកពូទីនធ្វើឱ្យលោកខកចិត្ត។ គាត់ពិតជាធ្វើឱ្យខ្ញុំខកចិត្តខ្លាំងណាស់។
ពាក់ព័ន្ធនឹងបញ្ហាប៉ាឡេស្ទីន លោកត្រាំគ្រាន់តែនិយាយដោយសង្ខេបថាលោកមិនយល់ស្របនឹងជំហររបស់នាយករដ្ឋមន្ត្រីអង់គ្លេសដែលទទួលស្គាល់រដ្ឋប៉ាឡេស្ទីនទេ។ លោកយល់ថានេះជាការខ្វែងគំនិតគ្នាមួយចំនួនតូចតែប៉ុណ្ណោះ។ ចំពោះបញ្ហាអន្តោប្រវេសន៍នៅអង់គ្លេស លោកត្រាំជូនជាយោបល់ថាអង់គ្លេសគួរចាត់ការទូកដឹកជនអន្តោប្រវេសន៍ខ្នាតតូចដែលចង់បើកចូលដែនទឹកអង់គ្លេស។ ខ្ញុំបានជម្រាបជូនលោកនាយករដ្ឋមន្ត្រី (អង់គ្លេស) ថាបើខ្ញុំវិញ ខ្ញុំនឹងចាត់ការបញ្ហានេះ។ ទោះបីត្រូវប្រើកម្លាំងយោធាក៏ដោយ មិនសំខាន់ថាត្រូវវិធីណាទេ។ បញ្ហានេះ (បើបណ្ដោយឱ្យកើតមាន) វាអាចនឹងបំផ្លាញប្រទេសជាតិពីខាងក្នុង។
នៅក្នុងកិច្ចជំនួបរយៈពេល៩០នាទីនោះ គេគិតថាអ្វីដែលជាជោគជ័យរបស់នាយករដ្ឋមន្ត្រីអង់គ្លេសគឺការនិយាយបញ្ចុះបញ្ចូលលោកត្រាំដើម្បីប្រកាន់ជំហរឱ្យបានម៉ឺងម៉ាត់ជាងមុនចំពោះលោកពូទីន។ កាលពីពេលកន្លងមក លោកត្រាំច្រើនដាក់ការស្ដីបន្ទោសទៅលើលោកហ្សេឡិនស្គី និងលោកបៃដិនថាជាអ្នកបង្កសង្គ្រាម។ ប៉ុន្តែប៉ុន្មានអាទិត្យចុងក្រោយនេះ លោកងាកទៅវាយប្រហាររុស្ស៊ី និងលោកពូទីនវិញម្ដង។ លោកហៅប្រទេសរុស្ស៊ីថាជាអ្នកឈ្លានពានគេ។
លោកត្រាំមិនចង់ធ្វើតាមការអំពាវនាវរបស់នាយករដ្ឋមន្ត្រីអង់គ្លេសដែលចង់ឱ្យអាមេរិកដាក់ទណ្ឌកម្មរុស្ស៊ីបន្ថែមទៀតទេ។ ប៉ុន្តែលោកចង់បង្វែរការចាប់អារម្មណ៍ទៅអឺរ៉ុប និងឥណ្ឌាដែលបន្តទិញប្រេងឆៅពីរុស្ស៊ី។ លោកបើសិនតម្លៃប្រេងឆៅ (នៅលើទីផ្សារអន្តរជាតិ) ធ្លាក់ចុះ ពេលនោះលោកពូទីនយល់ព្រមដកថយជាមិនខាន។ ពេលនោះ លោកពូទីនគ្មានជម្រើសអ្វីផ្សេងក្រៅពីដកខ្លួនថយពីសង្គ្រាមនេះទេ។ លោកត្រាំធ្លាប់និយាយកាលពីមុននេះថាទាល់តែអឺរ៉ុបឈប់ទិញប្រេងរុស្ស៊ីជាមុនសិនទើបលោកពិចារណាដាក់ទណ្ឌកម្មរុស្ស៊ីបន្ថែមទៀត។ នេះបើយោងតាមប្រភពពីដឹហ្កាឌាន (The Guardian) និងប្រភពដទៃទៀត៕
ចែករំលែកព័តមាននេះ