រាជធានីភ្នំពេញ ៖ នៅរសៀលម៉ោង២ថ្ងៃសៅរ៍ទី៩ ធ្នូ ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ ដល់កំណត់ត្រូវប្រកួតដណ្ដើមខ្សែក្រវាត់អន្តរជាតិជាផ្លូវការហើយ បន្ទាប់ពីកម្មវិធីមួយនេះបានបើកការប្រកួតសន្សំពិន្ទុ និងជ្រើសរើសជើងខ្លាំងចេញពីកម្ពុជា និងថៃ អស់រយៈពេលជាច្រើនខែកន្លងទៅនេះ។ ការប្រកួតនៅក្នុងថ្ងៃចុងក្រោយនេះ មានការកត់សម្គាល់យ៉ាងខ្លាំង ដោយសារតែក្រៅពីការប្រកួតដណ្ដើមខ្សែក្រវាត់របស់កីឡាករទាំង២ ក៏មានការប្រកួតមិត្តភាពរបស់កីឡាករកម្ពុជា និងថៃ២រូបយ៉ាងកក្រើកផងដែរ ។
កីឡាករកម្ពុជា២រូប គឺជើងខ្លាំង ផាន់ គ្រាន់ និងកីឡាករល្បីឈ្មោះមាស ច័ន្ទមាន នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅថ្ងៃនោះ ដោយកីឡាករផាន់ គ្រាន់ គឺជាសមាសភាពឡើងប្រកួតដណ្ដើមយកខ្សែក្រវាត់ជាមួយកីឡាករថៃ ហើយកីឡាករ មាស ច័ន្ទមាន គឺប្រកួតជាមួយកីឡាករថៃក្នុងលក្ខណៈមិត្តភាព ។ អ្នករៀបចំការប្រកួតបានអះអាងថា កីឡាករទាំង៤រូបត្រូវប៉ះគ្នាក្នុងវគ្គចុងក្រោយដ៏សំខាន់ និងសុទ្ធតែបានត្រៀមខ្លួនដូចគ្នាមុនពេលការប្រកួតដល់កំណត់ ដោយបានចំណាយពេលច្រើនជាងមួយសប្ដាហ៍ក្នុងការហ្វឹកហាត់នោះផង។
លោក ញាណ សុធី អ្នករៀបចំការប្រកួតប្រចាំសង្វៀនទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា៤រូបដែលមានឈ្មោះដណ្ដើមយកខ្សែក្រវាត់ក្នុងព្រឹត្តិការណ៍ប្រដាល់នោះ កីឡាករ ផាន់ គ្រាន់ គឺជាជើងខ្លាំងវ័យក្មេងតែម្នាក់ដែលបានឈានឡើងមកដល់វគ្គផ្ដាច់ព្រ័ត្រក្នុងការដណ្ដើមយកខ្សែក្រវាត់អន្តរជាតិជាមួយកីឡាករថៃ ដែលការប្រកួតកន្លងមកគឺមិនដែលបរាជ័យទេ។ លោករំពឹងខ្ពស់យ៉ាងខ្លាំងថា ការប្រកួតនៅថ្ងៃទី៩ ធ្នូ ស្អែកនេះនឹងធ្វើឱ្យកីឡាករកម្ពុជាដណ្ដើមបានជើងឯក បើទោះជាព្រឹត្តិការណ៍នេះកន្លងមកកីឡាករថៃជាអ្នកក្ដោបក្ដាប់បានខ្សែក្រវាត់ជើងឯកឡើង២ជំនាន់រួចទៅហើយ ។ គេត្រូវប៉ះប្រកួតជាមួយកីឡាករថៃឈ្មោះ Kong Sayam ក្នុងនាមជាគូដណ្ដើមខ្សែក្រវាត់ដ៏សំខាន់តែម្ដង ដែលនេះជាការប្រកួតដ៏កក្រើកដែលលោករំពឹងខ្លាំងសម្រាប់ថ្ងៃសៅរ៍ស្អែក ។ កីឡាករថៃដែលត្រូវប្រកួតជាមួយ ផាន់ គ្រាន់ លោកថាធ្លាប់ប្រកួតបាន៧៩លើក ឈ្នះ៦៥លើក ចាញ់១៣លើក និងស្មើ១លើក ក្នុងពេលកីឡាករកម្ពុជា ធ្លាប់ប្រកួតរហូតដល់១០២លើក ឈ្នះ៨៤លើក ចាញ់១៦លើក និងស្មើ២លើក ។
សម្រាប់កីឡាករ មាស ច័ន្ទមាន លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីថៃដែរ តែជាការប្រកួតក្នុងនាមជាគូមិត្តភាពប៉ុណ្ណោះ ដោយត្រូវប៉ះជាមួយកីឡាករថៃឈ្មោះ Phat Runthy។ លោកថា ការប្រកួតរបស់ពួកគេនៅមិនទាន់ដឹងថា អ្នកណាល្អជាងអ្នកណានោះទេក្នុងពេលដែល មាស ច័ន្ទមាន ដ្បិតថាគឺជាម្ចាស់ខ្សែក្រវាត់កាលពីមួយរយៈមុន និងជាធនធានកីឡាករវ័យក្មេងដ៏កម្រ ប៉ុន្តែគេក៏មានចំណុចខ្សោយផងដែរ ។ ជាក់ស្ដែងគេឈ្នះជាប្រចាំគ្រប់ពេលគេឡើងប្រកួតជាមួយកីឡាករបរទេសនាពេលកន្លងមក ទើបមានមុខបានឡើងនៅក្នុងព្រឹត្តិការណ៍នេះ ។ លោកថា កីឡាករថៃជាដៃគូគេគឺជាកីឡាករវ័យ
ក្មេង ប៉ុន្តែល្បីឈ្មោះ តែគេមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងកម្ពុជាជាធំ ។ កីឡាករថៃធ្លាប់ប្រកួត៦៨លើក ឈ្នះ៥៨លើក ចាញ់១០លើក និងមិនដែលស្មើ រីឯកីឡាករកម្ពុជាធ្លាប់ប្រកួតរហូតដល់១២៧លើក ឈ្នះ៩៥លើក ចាញ់តែ២៨លើក និងស្មើ៤លើក ។
នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិបែបនេះមិនខុសគ្នា ខណៈដែលនៅប៉ុស្តិ៍លេខ៥ ត្រូវបានផ្អាកការប្រកួតជម្រុះក្នុងវគ្គ៨នាក់យក៤នាក់សប្ដាហ៍ទី២ ដ៏គួរឱ្យចាប់អារម្មណ៍ ដោយដាក់ជំនួសកម្មវិធីប្រដាល់អន្តរជាតិមួយផ្សេងនៅស្ដាតអូឡាំពិកវិញ ។ ទោះបីយ៉ាងណា នៅស្ថានីយទូរទស្សន៍ប៉ុស្តិ៍លេខ៥ស្ថិតនៅព្រែកកំពិស នឹងដំណើរការការប្រកួតជម្រុះប្រចាំសប្ដាហ៍របស់ខ្លួននៅសប្ដាហ៍ក្រោយវិញ ចាប់ពីម៉ោង៥ល្ងាចតទៅ ៕
ចែករំលែកព័តមាននេះ