រាជធានីភ្នំពេញ ៖ ព្រឹត្តិការណ៍កីឡាកងយោធពលខេមរភូមិន្ទរដូវកាលទី២ ដែល រៀបចំឡើងដោយក្រសួងការពារជាតិ ក្រោមកិច្ចសហការជាមួយស្ថាប័នពាក់ព័ន្ធនានា គ្រោងបើកការប្រកួតរយៈពេល៣ថ្ងៃចាប់ពីថ្ងៃទី៥ដល់ទី៧ ខែមករា ឆ្នាំ២០១៨ នៅក្នុងបរិវេណកោះពេជ្រ ។ នេះបើយោងតាមមហាសន្និបាតដែលរៀបចំឡើងនៅទីបញ្ជាការកងរាជអាវុធហត្ថរាជធានីភ្នំពេញកាលពីពេលថ្មីៗកន្លងមកនេះ ។
លោកឧត្តសេនីយ៍លឹម ផាន់ភារៈ មន្ត្រីទទួលបន្ទុកផ្នែកព័ត៌មានបានឱ្យដឹងថា ព្រឹត្តិការណ៍កីឡាកងយោធពលខេមរភូមិន្ទនេះ ធ្វើឡើងដើម្បីអបអរទិវារំដោះជាតិ៧មករា ប្រមូលមូលនិធិជួយដល់សមាគមអតីតយុទ្ធជនកម្ពុជា បំផុសពីតួនាទីរបស់កងយោធពលខេមរភូមិន្ទ ឱ្យមហាជនបានស្គាល់ និងដើម្បីបង្កើតសហ ប្រតិបត្តិការឱ្យកាន់តែល្អរវាងកងទ័ពនិងមហាជន ។ ម្យ៉ាងវិញទៀត ការប្រកួតនេះដើម្បីបង្ហាញសារពីបញ្ហាគ្រឿងញៀនផង និងជំរុញឱ្យមានការគោរពច្បាប់ចរាចរណ៍ផង ។
តំណាងគណៈកម្មការរៀបចំការប្រកួតរូបនេះបន្តថា គ្រប់ភាគីពាក់ព័ន្ធទាំងអស់បានត្រៀមខ្លួនរួចជាស្រេចអស់រយៈពេល៦ខែមកហើយ សម្រាប់ដំណើរការប្រកួតកីឡាកងយោធពលខេមរភូមិន្ទរដូវកាលទី២នេះ ដោយលោកសង្ឃឹមថា នឹងមានមហាជនចូលរួមកាន់តែច្រើនជាងរដូវកាលទី១ដែលបានធ្វើឡើងកាលពីឆ្នាំ២០១៦កន្លងទៅនេះ ។ នៅក្នុងឱកាសនៃការប្រកួតកីឡាកងយោធពលខេមរភូមិន្ទនេះផងដែរ ក៏មានការបង្ហាញពីសម្ភារក៏ដូចជាទំនើបកម្មរបស់កងយោធពលខេមរភូមិន្ទទាំង៣ប្រភេទដូចជាជើងគោក ជើងទឹក និងជើងអាកាសដោយមានសាងសង់ទីបញ្ជាការសិប្បនិមិត្ត មានព្រៃសិប្បនិមិត្ត ព្រមទាំងបង្ហាញមហាជនពីលេណដ្ឋានពិតៗនៅសមរភូមិជួរមុខរបស់កងទ័ពទៀតផង ។
សម្រាប់ការប្រកួតនេះមានការបែងចែកជា២ប្រភេទកីឡាគឺទី១កងកម្លាំងដែលមានកាយសម្បទាមាំមួន សុខភាពល្អ ហើយក៏មានបើកឱ្យមហាជនចូលរួមដែរ និងទី២គឺការប្រកួតបែបមហាជនសុទ្ធសាធតែម្ដងដោយប្រកួតលើ វិញ្ញាសាតកម្ម៉ង់ដូចម្ងាយ៣គីឡូម៉ែត្រ សែងហ្វ្រង់កា១គីឡូម៉ែត្រផ្ទុកទម្ងន់៥០គីឡូក្រាមឆ្លងកាត់ឧបសគ្គសម្រាប់កងទ័ព រីឯមហាជនធ្វើឡើងដូចគ្នាប៉ុន្តែមានលក្ខណៈធូរស្រាលបន្តិចគ្រប់ផ្នែកទាំងអស់ដោយក្នុង១ក្រុមមានគ្នាយ៉ាងតិច១២នាក់ក្រោមការដាក់ពិន្ទុយ៉ាងច្បាស់លាស់ដោយគណៈកម្មការរៀបចំការប្រកួត ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាធ្លាប់មានប្រសាសន៍នាពេលកន្លងមកថា ការប្រកួតកីឡាកងយោធពលខេមរភូមិន្ទនេះក៏ជាចលនាកីឡាមួយដើម្បីបំផុសឱ្យមានការយល់ដឹងកាន់តែច្បាស់ពីសារៈសំខាន់នៃការលេងកីឡាមិនថានៅក្នុងជួរកងទ័ពឬមហាជននោះទេ ។ គ្រាន់តែកីឡាកងយោធពលខេមរភូមិន្ទមានវិញ្ញាសាខុសប្លែកពីមហាជនធម្មតាប៉ុណ្ណោះ តែទទួលបានការអប់រំផ្នែកផ្លូវកាយនិងចិត្តដូចគ្នា ព្រោះទាមទារឱ្យមានការអំណត់ ព្យាយាមដើម្បីសម្រេចបាននូវគោលដៅដ៏ល្អតាមក្រុមនីមួយៗ ។ ដូច្នេះបើបេក្ខជនណាមានបំណងចង់ចូលរួមប្រកួតអាចមកចុះឈ្មោះនៅទីស្នាក់ការគណៈកម្មាធិការជាតិអូឡាំពិកកម្ពុជា និងនៅភោជនីយដ្ឋាន One More ក៏ដូចជាតាមទំព័រហ្វេសប៊ុករបស់គណៈកម្មការរៀបចំការប្រកួតចាប់ពីពេលនេះតទៅ ៕
ចែករំលែកព័តមាននេះ