ទីក្រុងហូជីមិញ ៖ ខណៈគ្រឿងយន្ដភាគច្រើនដែលប្រើប្រាស់ក្នុងវិស័យកសិកម្មនៅវៀតណាមសុទ្ធតែបាននាំចូល ពេលនេះ របកគំហើញថ្មីនៃការច្នៃប្រឌិតម៉ាស៊ីនសម្រាប់បម្រើឲ្យកសិកម្ម ត្រូវបានកសិករវៀតណាមបង្កើតឡើងក្រោមទស្សនវិស័យមួយគឺ «ភ្លៀង បន្ទាប់ពីរាំងស្ងួត» ។ ការច្នៃប្រឌិតនេះកំពុងបង្ហាញនូវមុខមាត់ថ្មីមួយក្នុងវិស័យកសិកម្ម…
ទីក្រុងហូជីមិញ ៖ ខណៈគ្រឿងយន្ដភាគច្រើនដែលប្រើប្រាស់ក្នុងវិស័យកសិកម្មនៅវៀតណាមសុទ្ធតែបាននាំចូល ពេលនេះ របកគំហើញថ្មីនៃការច្នៃប្រឌិតម៉ាស៊ីនសម្រាប់បម្រើឲ្យកសិកម្ម ត្រូវបានកសិករវៀតណាមបង្កើតឡើងក្រោមទស្សនវិស័យមួយគឺ «ភ្លៀង បន្ទាប់ពីរាំងស្ងួត» ។
ការច្នៃប្រឌិតនេះកំពុងបង្ហាញនូវមុខមាត់ថ្មីមួយក្នុងវិស័យកសិកម្ម ដោយសារពួកគេអាចសន្សំពេលវេលានិងតម្លៃ និងធ្វើឲ្យសកម្មភាពដាំដុះកាន់តែប្រសើរឡើង ។
លោក Pham Van Hat កសិករមកពីភាគខាងជើងនៃខេត្ត Hai Duong ដែលធ្លាប់ក្ស័យធនក្នុងអំឡុងឆ្នាំ២០១៣ ទៅលើអាជីវកម្មបន្លែធម្មជាតិ និងខាតបង់អស់ប្រមាណជាង១៣ម៉ឺនដុល្លារ បាននិយាយថា លោកបានចាប់ផ្ដើមបើកវាំងននថ្មី បន្ទាប់ពីសម្រេចចិត្តទៅធ្វើកម្មករនៅប្រទេសអុីស្រាអែល ដោយធ្វើជាអ្នកដាំបន្លែឲ្យគេ ។ ក្នុងអំឡុងពេលនោះ លោកបានស្នើជួបអ្នកគ្រប់គ្រង ដោយលើកពីគម្រោងបង្កើតម៉ាស៊ីនមួយដែលអាចជំនួសកម្លាំងមនុស្សបាន ថែមទាំងចំណេញពេលវេលាទៀត ។
ក្រោយពីទទួលការអនុញ្ញាត លោកបានបង្ហាញនូវគ្រឿងយន្ដដំបូងរបស់លោក ដែលអាចជំនួសការងារមនុស្សបាន២៥នាក់ក្នុងរយៈពីរបីថ្ងៃ ។ ពេលនោះ ក្រុមហ៊ុនបានដំឡើងប្រាក់ខែឲ្យលោកពី១ពាន់ ដល់២.៥០០ដុល្លារក្នុង១ខែ ។ ក្រោយមក លោកក៏ត្រឡប់មកប្រទេសវៀតណាមវិញ ដោយចាប់ផ្ដើមបើករោងចក្រមួយដើម្បីបង្កើតគ្រឿងយន្ដកសិកម្មរបស់លោកតែម្ដង ។
ពេលនេះ លោកបានបង្កើតគ្រឿងយន្ដកសិកម្មជាច្រើនប្រភេទដើម្បីកាត់បន្ថយការប្រើប្រាស់កម្លាំងពលកម្ម ដូចជា ម៉ាស៊ីនសាប ឬព្រោះស្រូវដើរដោយស្វ័យប្រវត្តិ, ម៉ាស៊ីនដាក់ជី, ម៉ាស៊ីនដាំពោត, ដាំសណ្ដែក និងបន្លែជាច្រើនទៀត ដែលសរុបមានប្រមាណ៣០ប្រភេទ ។
លោកថា ៖« ម៉ាស៊ីនដើរដោយស្វ័យប្រវត្តិនីមួយៗអាចជំនួសកម្លាំងពលកម្មមនុស្សបាន៤០នាក់ ខណៈដែលមនុស្ស៤នាក់អាចដាំដុះបានលើដីទំហំ១ម៉ែត្រការ៉េប៉ុណ្ណោះក្នុងរយៈពេល៥នាទី។ ចំណែកម៉ាស៊ីនទាំងនោះអាចដាំដុះបានទំហំដីដល់៨ម៉ែត្រការ៉េ ដោយប្រើពេលត្រឹមតែ១នាទីប៉ុណ្ណោះ » ។
ដោយមានការអភិវឌ្ឍជាបន្ដបន្ទាប់ គ្រឿងយន្ដកសិកម្មទាំងនោះត្រូវបាននាំចេញទៅកាន់ទីផ្សារជាច្រើនប្រទេសរួមមាន អាល្លឺម៉ង់, អាមេរិក, សិង្ហបុរី និងប្រទេសថៃជាដើម ៕
ចែករំលែកព័តមាននេះ