ទីក្រុងវ៉ាស៊ីនតោន៖ លោកត្រាំថ្លែងថារាល់ការចរចាពាណិជ្ជកម្មរវាងអាមេរិក និងកាណាដាត្រូវតែបិទបញ្ចប់ត្រឹមនេះហើយ។ ការថ្លែងដូច្នេះបន្ទាប់ពីកាណាដាចាក់ផ្សាយនូវសំឡេងរបស់លោករេហ្គឹន អតីតប្រធានាធិបតីអាមេរិកកាលពីអំឡុងទសវត្សទី៨០។ លោកត្រាំចាត់ទុកថាកាណាដាផ្សព្វផ្សាយសំឡេងនោះមានលក្ខណៈបោកបញ្ឆោតធ្វើឱ្យយល់ច្រឡំ។ នៅក្នុងការផ្សព្វផ្សាយនោះ លោករេហ្គឹន និយាយបែបអវិជ្ជមានចំពោះការដំឡើងពន្ធគយ។
ចាប់តាំងពីឡើងកាន់អំណាចភ្លាម លោកត្រាំដំឡើងពន្ធដែក, អាលុយមីញ៉ូម និងរថយន្តដែលនាំចូលពីកាណាដា។ ជាកិច្ចឆ្លើយតប កាណាដាដំឡើងពន្ធទៅលើទំនិញរបស់អាមេរិកវិញ។ ប៉ុន្មានសប្ដាហ៍ចុងក្រោយនេះ ប្រទេសទាំង២ខិតខំចរចាគ្នាដើម្បីឱ្យមានដំណោះស្រាយនៅក្នុងមុខទំនិញដែក និងអាលុយមីញ៉ូម។ កំពុងចរចាគ្នាសុខៗ លោកត្រាំប្រកាសឈប់ចរចាគ្នាវិញ។ លោកបង្ហោះសារនៅលើបណ្ដាញសង្គមថា «ដោយសារអាកប្បកិរិយាដ៏អាក្រក់ជាទីបំផុតរបស់ពួកគេ (កាណាដា) អាមេរិកសម្រេចចិត្តបញ្ឈប់ការចរចាពាណិជ្ជកម្មទាំងស្រុងតែត្រឹមនេះ»។
អភិបាលខេត្តអុងតារីយ៉ូ (Ontario) លោកឌូកហ្វត (Doug Ford) ថ្លែងកាលពីប៉ុន្មានថ្ងៃមុននេះថាការផ្សព្វផ្សាយចេញពីខេត្តរបស់គាត់ដែលបង្កប់នូវសារនយោបាយប្រឆាំងនឹងការដំឡើងពន្ធគយនោះធ្វើឱ្យលោកត្រាំយកចិត្តទុកដាក់ខ្លាំង។ នៅក្នុងការផ្សព្វផ្សាយនោះ លោករេហ្គឹនដែលជាអ្នកសាធារណរដ្ឋនិយមដូចលោកត្រាំដែរបាននិយាយរិះគន់ការដំឡើងពន្ធគយទៅលើទំនិញបរទេស។ លោករេហ្គឹនថាការដំឡើងពន្ធធ្វើឱ្យប្រជាជនបាត់បង់ការងារ និងធ្វើឱ្យមានសង្គ្រាមពាណិជ្ជកម្ម។
លោកហ្វតថ្លែងថាយើងឮថាលោកប្រធានាធិបតីត្រាំស្ដាប់ការផ្សព្វផ្សាយនោះ។ លោកច្បាស់ថាលោកត្រាំមិនសប្បាយចិត្តនឹងការចាក់ផ្សាយនេះទេ។ ដំណឹងនេះលេចឮដល់ «មូលនិធិប្រធានាធិបតីរេហ្គឹន»។ មូលនិធិនិយាយថាគណៈអភិបាលខេត្តអុងតារីយ៉ូយកសំឡេងលោករេហ្គឹនទៅកាត់ជាកំណាត់ដើម្បីច្បិចយកតែចំណុចណាដែលពួកគេចង់បាន។ មូលនិធិកំពុងស្រាវជ្រាវរកមើលសំឡេងដើម និងត្រៀមពិនិត្យមើលទិដ្ឋភាពច្បាប់ដើម្បីចាត់វិធានការប្ដឹងបកទៅកាណាដាវិញ។
មូលនិធិបានបញ្ជាក់នៅក្នុងសេចក្ដីថ្លែងការណ៍របស់ខ្លួនថាការផ្សព្វផ្សាយនោះបកស្រាយខុសនូវទស្សនៈនយោបាយរបស់លោករេហ្គឹនដែលថ្លែងតាមវិទ្យុកាលពីឆ្នាំ១៩៨៧។ ម៉្យាងទៀត អភិបាលខេត្តអុងតារីយ៉ូមិនបានស្វះស្វែងរកការអនុញ្ញាត ហើយក៏មិនបានទទួលការអនុញ្ញាតពីមូលនិធិដើម្បីទទួលបានសិទ្ធិចាក់ផ្សាយសុន្ទរកថាដែលត្រូវបានគេកាត់ជាកំណាត់ៗនោះដែរ។
រដ្ឋាភិបាលកាណាដាមិនទាន់ធ្វើអត្ថាធិប្បាយទៅលើរឿងនេះនៅឡើយទេ។ ប៉ុន្តែនាយករដ្ឋមន្ត្រីកាណាដាថ្លែងកាលពីយប់មិញថាប្រទេសរបស់លោកនឹងមិនអនុញ្ញាតឱ្យទំនិញអាមេរិកចូលទីផ្សារកាណាដាជាលក្ខណៈរកស៊ីដើរខ្សែលើបានទេបើសិនការចរចាពាណិជ្ជកម្មជាមួយអាមេរិកបរាជ័យ។ នៅឆ្នាំក្រោយ អាមេរិក, កាណាដា និងម៉ិកស៊ីកូនឹងពិនិត្យសើរើឡើងវិញទៅលើកិច្ចព្រមព្រៀងពាណិជ្ជកម្មសេរីដែលចុះហត្ថលេខាកាលពីឆ្នាំ២០០០។ នេះបើតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ