អ្នកបោះឆ្នោតអាមេរិកភាគច្រើនមានការពេញចិត្តចំពោះវិធីចាត់ចែងរបស់លោកប្រធានាធិបតីបារ៉ាក់អូបាម៉ាក្នុងការគ្រប់គ្រង និងដោះស្រាយទប់ទល់ចំពោះព្យុះដ៏សាហាវឈ្មោះសាន់ឌី SANDY ។យោងតាមការស្ទាបស្ទង់មតិរបស់វ៉ាស៊ីនតោនប៉ុស្តិ៍-ABC NEWSថា ក្នុងចំណោមមនុស្សដែលសាកសួរ៧៨%យល់ថាលោកអូបាម៉ាបំពេញការងារបានល្អ ឬការងារល្អពិសេសទៀតប្រឈមមុខនឹងព្យុះសាន់ឌីទល់នឹង៤៤%សម្រាប់លោកមីតរ៉ូមនី ។
នេះជាព័ត៌មានល្អមួយសម្រាប់ប្រធានាធិបតីចប់អាណត្តិដែលចុះពិនិត្យការខូចខាតនៅរដ្ឋញូវចឺស៊ី កាលពីថ្ងៃទី៣១ តុលា ជាមួយនឹងមិត្តរបស់លោករ៉ូមនីគឺអភិបាលរដ្ឋនោះលោកCHRIS CHRISTIE មុនពេលចាប់ផ្តើមឡើងវិញជាផ្លូវការនូវយុទ្ធនាការឃោសនារបស់លោកនាថ្ងៃទី១ វិច្ឆិកា ដោយនាថ្ងៃនោះលោកត្រូវទៅកាន់រដ្ឋវីស្កុនស៊ីន ណេវ៉ាដា និងកូឡូរ៉ាដូ ។
ខណៈសល់ពេលមិនដល់១សប្តាហ៍ទៀតផងដល់ថ្ងៃបោះឆ្នោតប្រធានាធិបតីអាមេរិក ការស្ទាបស្ទង់មតិប្រចាំថ្ងៃមួយរបស់REUTERS-IPSOS ចេញផ្សាយកាលពីថ្ងៃទី៣១ តុលា គូសបញ្ជាក់ថា លោកអូបាម៉ានៅរក្សាការនាំមុខលើលោកមីតរ៉ូមនី ។ តាមការស្ទាបស្ទង់នោះអ្នកចង់បោះឆ្នោតឱ្យលោកអូបាម៉ាមាន៤៧%ទល់នឹង៤៦%សម្រាប់លោករ៉ូមនី ។ លោកអូបាម៉ាមានអ្នកចង់បោះឆ្នោតឱ្យនាំមុខ៣ពិន្ទុលើលោករ៉ូមនីនៅរដ្ឋអូហៃយ៉ូ និង២ពិន្ទុនៅរដ្ឋវៀជីនៀ ។ នៅផ្លរីដាអ្នកទាំង២មានពិន្ទុស្មើគ្នាហើយនៅរដ្ឋកូឡូរ៉ាដូលោករ៉ូមនីនាំមុខ១ពិន្ទុ ៕
ចែករំលែកព័តមាននេះ