សហរដ្ឋអាមេរិក ៖ លោក Joe Kent នាយក​មជ្ឈមណ្ឌល​ជាតិ​ប្រឆាំង​នឹង​ភេរវកម្ម​របស់​សហរដ្ឋអាមេរិក (NCTC) ដែល​ជា​ទាហាន​មួក​បៃតង​ចូល​និវត្តន៍ និង​ជា​អ្នកគាំទ្រ​របស់​លោក​ប្រធានាធិបតី ដូ​ណា​ល់ ត្រាំ តាំងពី​យូរ​មក​ហើយ​នោះ បាន​ថ្លែង​ថា លោក​បាន​លាលែង​ពី​តំណែង​នាយក NCTC កាលពី​ថ្ងៃ​ទី​១៧ ខែមីនា ឆ្នាំ​២០២៦ ដោយសារ​សង្គ្រាម​នៅ​ប្រទេស​អ៊ី​រ៉​ង់​។ នេះ​បើ​តាម​ប្រភព​ពី​សារព័ត៌មាន NBC បាន​ចេញផ្សាយ​។

លោក Joe Kent បាន​បញ្ជាក់​ក្នុង​សារ​មួយ​លើ​បណ្តាញ​ទំនាក់ទំនង​សង្គម X ថា «​ខ្ញុំ​មិន​អាច​គាំទ្រ​ដោយ​មនសិការ​ល្អ​របស់​ខ្លួន ចំពោះ​សង្គ្រាម​ដែល​កំពុង​តែ​បន្ត​នៅ​អ៊ី​រ៉​ង់​បាន​នោះ​ទេ​។ អ៊ី​រ៉​ង់​មិន​បាន​បង្ក​ការ​គំរាមកំហែង​ដល់​ប្រទេស​ជាតិ​របស់​យើង​ទេ​។ វា​ច្បាស់​ណាស់​ថា យើង​បាន​ចាប់ផ្តើម​សង្គ្រាម​នេះ ដោយសារ​សម្ពាធ​ពី​អ៊ី​ស្រា​អែ​ល និង​ក្រុម​អ្នកតំណាង​អា​មេ​រិ​ក​ដ៏​មាន​ឥទ្ធិពល​»​។

នាយក NCTC ដែល​ត្រួតពិនិត្យ​លើ​ការ​ស៊ើបការណ៍​សម្ងាត់​របស់​រដ្ឋាភិបាល​អា​មេ​រិ​កលើ​ការ​គំរាមកំហែង​ភេរវកម្ម​ដដែល​រូប​នេះ បាន​សរសេរ​នៅ​ក្នុង​លិខិត​មួយ​ផ្ញើ​ទៅ​កាន់​លោក ប្រធានាធិបតី ត្រាំ ដែល​បាន​បង្ហោះ​លើ​បណ្តាញ​សង្គម X ថា លោក​គាំទ្រ​តម្លៃ​ការ​ដឹកនាំ​អាណត្តិ​ដំបូង​របស់​លោក ត្រាំ ។

ប៉ុន្តែ​លោក​បន្ថែម​ថា លោក ត្រាំ ទទួល​ឥទ្ធិពល​ដោយ​ខុសឆ្គង​ពី​អ៊ី​ស្រា​អែ​ល ហើយ​លោក​ក៏​មិន​អាច​គាំទ្រ​ការ​បញ្ជូន​មនុស្ស​ជំនាន់​ក្រោយ​ឱ្យទៅ​ប្រយុទ្ធ និង​ស្លាប់​ក្នុង​សង្គ្រាម​ដែល​មិន​ផ្តល់​ផលប្រយោជន៍​ដល់​ប្រជាជន​អា​មេ​រិ​ក ក៏​ដូច​ជា​ភាព​ភាព​មិន​ត្រឹមត្រូវ​នៃ​ការ​លះបង់​អាយុជីវិត​របស់​ជនជាតិ​អា​មេ​រិ​ក​។

យ៉ាងណាមិញ សេត​វិមាន​បាន​បដិសេធ​ការ​រិះគន់​របស់​លោក Kent ។ អ្នកនាំពាក្យ​សេត​វិមាន លោកស្រី Karoline Leavitt បាន​លើក​ឡើង​នៅ​លើ​បណ្តាញ​សង្គម​វិញ​ថា លោក​ប្រធានាធិបតី ត្រាំ បាន​បញ្ជាក់​យ៉ាង​ច្បាស់លាស់ លោក​ក៏​មាន​ភស្តុ​តាង​ដ៏​រឹង​មាំ និង​គួរ​ឱ្យ​ជឿជាក់​ថា អ៊ី​រ៉​ង់​នឹង​វាយប្រហារ​សហរដ្ឋអាមេរិក​មុន​។ ការ​សម្រេចចិត្ត​នេះ បាន​គិតគូរ​ពី​ការ​ពិត​ដែល​ថា អ៊ី​រ៉​ង់​ឧបត្ថម្ភ​ដល់​អំពើ​ភេរវកម្ម ការ​សម្លាប់​ជនជាតិ​អា​មេ​រិ​ក កម្មវិធី​មី​ស៊ី​ល​ផ្លោង​ដែល​បម្រើ​ជា​ខែល​សម្រាប់​កម្មវិធី​នុយក្លេអ៊ែរ​របស់​ខ្លួន ហើយ​បន្ទាប់​ពី​ពិនិត្យ​ឡើង​វិញ​ដោយ​ប្រុង​ប្រយ័ត្ន​នូវ​ព័ត៌មាន​ទាំងអស់​នៅ​ចំពោះ​មុខ លោក​ប្រធានាធិបតី ត្រាំ បាន​សន្និដ្ឋាន​ថា របប​អ៊ិ​ស្លា​ម​និយម​ភេរវ​ករ​នៅ​អ៊ី​រ៉​ង់​បាន​បង្ក​ការ​គំរាមកំហែង​ភ្លាម​ៗ ហើយ​លោក​បាន​ចាត់វិធានការ​ដោយ​ផ្អែក​លើ​ការ​សន្និដ្ឋាន​នោះ​។

សូម​ជម្រាប​ថា លោក Joe Kent បាន​បម្រើ​ការ​នៅ​ក្នុង​កងកម្លាំង​ពិសេស​កងទ័ព​អា​មេ​រិ​ក ដោយ​បាន​អនុវត្ត​ការ​ដាក់​ពង្រាយ​ប្រយុទ្ធ​ចំនួន​១១​ដង អំឡុង​ពេល​អាជីព​រយៈពេល ២០ ឆ្នាំ ហើយ​ក្រោយមក​បាន​ផ្លាស់​ទៅ​ធ្វើការ​នៅ​ទីភ្នាក់ងារ​ស៊ើបការណ៍​សម្ងាត់ CIA​។ ភរិយា​របស់​លោក គឺ​លោកស្រី Shannon Kent ដែល​ជា​អ្នកជំនាញ​ខាង​កិច្ចការ​សម្ងាត់​កងទ័ពជើងទឹក​អា​មេ​រិ​ក បាន​ស្លាប់​នៅ​ក្នុង​ការ​ទម្លាក់​គ្រាប់បែក​ភេរវកម្ម​នៅ​ស៊ី​រី​ក្នុង​ឆ្នាំ ២០១៩៕