ទីក្រុងតេហេរ៉ង់ ៖ មេដឹកនាំកងទ័ពអ៊ីរ៉ង់សច្ចាសងសឹកយ៉ាងម៉ឺងម៉ាត់ជាទីបំផុត ចំពោះការធ្វើឃាតប្រមុខសន្តិសុខជាតិរបស់ខ្លួន នៅក្នុងការវាយប្រហាររបស់អ៊ីស្រាអែល កាលពីថ្ងៃទី១៧ ខែមីនា ឆ្នាំ២០២៦។ នេះបើយោងតាមប្រភពពី BBC…
ទីក្រុងតេហេរ៉ង់ ៖ មេដឹកនាំកងទ័ពអ៊ីរ៉ង់សច្ចាសងសឹកយ៉ាងម៉ឺងម៉ាត់ជាទីបំផុត ចំពោះការធ្វើឃាតប្រមុខសន្តិសុខជាតិរបស់ខ្លួន នៅក្នុងការវាយប្រហាររបស់អ៊ីស្រាអែល កាលពីថ្ងៃទី១៧ ខែមីនា ឆ្នាំ២០២៦។ នេះបើយោងតាមប្រភពពី BBC និង The Guardian បានចេញផ្សាយនៅថ្ងៃទី១៨ ខែមីនា ឆ្នាំ២០២៦។
មេបញ្ជាការកងទ័ពអ៊ីរ៉ង់ លោក Amir Hatami បានគំរាមថានឹងធ្វើការសងសឹកយ៉ាងម៉ឺងម៉ាត់ ចំពោះការសម្លាប់ប្រធានសន្តិសុខជាតិអ៊ីរ៉ង់ លោក Ali Larijani ក្នុងការវាយប្រហារតាមអាកាសរបស់អ៊ីស្រាអែល។ លោក Hatami បានបញ្ជាក់នៅក្នុងសេចក្តីថ្លែងការណ៍មួយថា «ការឆ្លើយតបរបស់អ៊ីរ៉ង់ចំពោះការធ្វើឃាតលេខាធិការនៃក្រុមប្រឹក្សាសន្តិសុខជាតិជាន់ខ្ពស់នឹងមានភាពម៉ឺងម៉ាត់បំផុត»។
ជាមួយគ្នានោះដែរ កងកម្លាំងឆ្មាំបដិវត្តន៍ ដែលជាកម្លាំងយោធាដ៏មានឥទ្ធិពលរបស់អ៊ីរ៉ង់ ដែលដាច់ដោយឡែកពីកងទ័ពនោះ ក៏បានប្រកាសនៅក្នុងសេចក្តីថ្លែងការណ៍មួយនៅថ្ងៃទី១៨ ខែមីនា ឆ្នាំ២០២៦ ថា ខ្លួនបានបាញ់មីស៊ីលទៅភាគកណ្តាលអ៊ីស្រាអែល ដើម្បីសងសឹកចំពោះឈាមរបស់លោក Ali Larijani និងសហការីលោក ដែលបានបាត់បង់ជីវិតនៅក្នុងការវាយប្រហាររបស់អ៊ីស្រាអែល។
សូមជម្រាបថា លោក Ali Larijani គឺជាអ្នកនយោបាយ មន្ត្រីយោធា និងជាទស្សនវិទូដ៏សំខាន់ ដែលបានបម្រើការជាលេខាធិការនៃក្រុមប្រឹក្សាសន្តិសុខជាតិជាន់ខ្ពស់ ចាប់ពីឆ្នាំ ២០២៥ រហូតដល់ការធ្វើឃាតលោកនៅឆ្នាំ ២០២៦។
សម្រាប់លោក Ali Larijani ត្រូវបានប្រជាជនអ៊ីរ៉ង់ចាត់ទុកជាមនុស្សដ៏មានឥទ្ធិពលម្នាក់ក្នុងប្រទេស ដោយទទួលបានការជឿទុកចិត្តបំផុតពីអតីតមេដឹកនាំកំពូលអ៊ីរ៉ង់ លោក Ayatollah Ali Khamenei ដែលបានបាត់បង់ជីវិតក្នុងវាយប្រហាររួមគ្នារបស់សហរដ្ឋអាមេរិក និងអ៊ីស្រាអែលនោះ និងមេដឹកនាំកំពូលបច្ចុប្បន្ន លោក Mojtaba Khamenei ។ ដូច្នេះការស្លាប់លោក Ali Larijani ពិតជារំជើបរំជួលយ៉ាងខ្លាំងនៅក្នុងប្រទេសអ៊ីរ៉ង់៕
ចែករំលែកព័តមាននេះ