Ganzberg Uber Fighters បង្ហាញមុខសមាសភាពគូប្រកួតប្រដាល់អន្តរជាតិថ្ងៃសុក្រនេះ
- ភ្នំពេញ
រាជធានីភ្នំពេញ ៖ ថ្ងៃសុក្រ ទី២៤ វិច្ឆិកា នេះ កម្មវិធីប្រកួតប្រដាល់ដែលមានឈ្មោះថា Ganzberg Uber Fighters…
រាជធានីភ្នំពេញ ៖ ថ្ងៃសុក្រ ទី២៤ វិច្ឆិកា នេះ កម្មវិធីប្រកួតប្រដាល់ដែលមានឈ្មោះថា Ganzberg Uber Fighters បានបង្ហាញសមាសភាពគូប្រកួតប្រដាល់អន្តរជាតិដែលត្រូវជួបគ្នានៅលើសង្វៀនទូរទស្សន៍ MyTV ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើល ថាតើកីឡាករកម្ពុជាទាំងពីររូបគឺគឹម វាសនា និងឡុង សំណាង អាចទៅរួចអត់ ខណៈកីឡាករបរទេសដែលពួកគេត្រូវជួបនាពេលបន្តិចទៀតនេះ ហាក់មានសមត្ថភាពពិបាកផ្ដួលអ៊ីចឹងនោះ។
គឹម វាសនា មកពីក្លិបកងទ័ពឆត្រយោង៩១១ ធ្លាប់ប្រកួត៥៨ដង ឈ្នះ៤៧ដង ចាញ់១០ដង ស្មើ១ដង និងធ្លាប់ផ្ដួលគូប្រកួតឱ្យសន្លប់១៣ដង ត្រូវជួបប្រកួតជាមួយកីឡាករថៃឈ្មោះក្វាងងិនម៉. រ៉ាជផាត់ម៉ូ ចមប៊ឹង ក្នុងប្រភេទទម្ងន់៦៥គីឡូក្រាម ។ កីឡាករថៃរូបនេះធ្លាប់ប្រកួត៩២ដង ឈ្នះ៦៥ដង ចាញ់២២ដង ស្មើ៥ដងនិងធ្លាប់ផ្ដួលគូប្រកួតឱ្យសន្លប់១០ដង ។ ដោយសារកីឡាករថៃរូបនេះមិនធ្លាប់មកប្រកួតនៅលើសង្វៀនកម្ពុជាពីមុនមកទើបគេពិបាកប៉ាន់ស្មានថាអ្នកណាខ្លាំងជាងអ្នកណា ដូច្នេះមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ។
ឡុង សំណាង មកពីក្លិបសាលវ័ន្តកីឡា ធ្លាប់ប្រកួត៥៨ដង ឈ្នះ៥០ដង ចាញ់៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់១២ដងត្រូវគេផ្គូផ្គងឱ្យជួបប្រកួតជាមួយកីឡាករថៃឈ្មោះទួនប៉េ ឆ.ឆើតឆ័យ ក្នុងប្រភេទទម្ងន់៦១គីឡូក្រាម ។ កីឡាករថៃធ្លាប់ប្រកួត៨៥ដងឈ្នះ៦៧ដង ចាញ់១៦ដង ស្មើ២ដង និងធ្លាប់ផ្ដួលគូប្រកួតឱ្យសន្លប់៩ដង ។ កីឡាករថៃរូបនេះធ្លាប់មកប្រកួតនៅលើសង្វៀនកម្ពុជាជាច្រើនដងរួចមកហើយ ប៉ុន្តែមិនធ្លាប់ជួបប្រកួតជាមួយឡុង សំណាង ទេ ។ ដូច្នេះ ចាំមើលគូនេះអ្នកណាមានសំណាងក្លាយជាអធិរាជនៅលើសង្វៀនសម្រាប់ការប្រកួតលើកនេះ ។
ចំណែកគូប្រកួតមិត្តភាពធម្មតាវិញកីឡាករ វី សាវុធ មកពីក្លិបនាគរាជមានជ័យ ប្រកួតជាលក្ខណៈសាកលជាមួយកីឡាករ សួន ស្រម៉ៃ មកពីក្លិបកងរាជអាវុធហត្ថរាជធានីភ្នំពេញក្នុងប្រភេទទម្ងន់៦៩គីឡូក្រាម និងកីឡាករ ខេម ច័ន្ទ មកពីក្លិបកងទ័ពពិសេសឆត្រយោង៩១១ ត្រូវជួបប្រកួតជាមួយកីឡាករ គង់ ហូវ មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ