រាជធានីភ្នំពេញ ៖ ការរីកចម្រើននៃបច្ចេកវិទ្យា បានបង្កលក្ខណៈងាយស្រួលដល់សង្គមជាតិលើគ្រប់វិស័យ ហើយកំពុងតែដើរតួនាទីយ៉ាងសំខាន់ក្នុងវិស័យហិរញ្ញវត្ថុនៅកម្ពុជា។ ទោះបីយ៉ាងណា វាក៏ផ្ដល់ផលលំបាកខ្លះដែរ ខណៈដែលប្រទេសកម្ពុជាទើបតែចាប់ផ្ដើមរីកលូតលាស់ក្នុងរយៈពេលប៉ុន្មានឆ្នាំចុងក្រោយនេះប៉ុណ្ណោះ ។ ប្រធានសមាគមមីក្រូហិរញ្ញវត្ថុ…
រាជធានីភ្នំពេញ ៖ ការរីកចម្រើននៃបច្ចេកវិទ្យា បានបង្កលក្ខណៈងាយស្រួលដល់សង្គមជាតិលើគ្រប់វិស័យ ហើយកំពុងតែដើរតួនាទីយ៉ាងសំខាន់ក្នុងវិស័យហិរញ្ញវត្ថុនៅកម្ពុជា។ ទោះបីយ៉ាងណា វាក៏ផ្ដល់ផលលំបាកខ្លះដែរ ខណៈដែលប្រទេសកម្ពុជាទើបតែចាប់ផ្ដើមរីកលូតលាស់ក្នុងរយៈពេលប៉ុន្មានឆ្នាំចុងក្រោយនេះប៉ុណ្ណោះ ។
ប្រធានសមាគមមីក្រូហិរញ្ញវត្ថុ លោក ឧកញ៉ា ហួត អៀងតុង បានឲ្យដឹងកាលពីថ្ងៃទី២២ វិច្ឆិកា ម្សិលមិញថា បច្ចេកវិទ្យាពិតជាមានតួនាទីយ៉ាងសំខាន់ក្នុងវិស័យហិរញ្ញវត្ថុនៅកម្ពុជា ព្រោះក្រៅពីផ្តល់គុណភាពការងារដល់ស្ថាប័ន ហើយ ក៏បានជួយសម្រួលដល់ប្រជាពលរដ្ឋក្នុងការកាត់បន្ថយពេលវេលា ថវិកា នៅពេលដែលពួកគាត់ត្រូវការសេវាធនាគារ និងហិរញ្ញវត្ថុដែរ។ ទោះបីយ៉ាងណា នៅពេលបច្ចេកវិទ្យាក្នុងផ្នែកណាមួយមានបញ្ហា ស្ថាប័នប្រើប្រាស់បច្ចេកវិទ្យានោះ ក៏ខាតបង់អត្ថប្រយោជន៍ដែរ ។
លោកឧកញ៉ាថ្លែងថា ៖« បច្ចេកវិទ្យាមានតួនាទីសំខាន់មែនទែនសម្រាប់វិស័យហិរញ្ញវត្ថុនៅកម្ពុជា ។ នៅពេលបច្ចេកវិទ្យារីកចម្រើន ប្រជាពលរដ្ឋអាចប្រើប្រាស់ ឬធ្វើសេវាធនាគារបាននៅលើទូរស័ព្ទដៃ និងកុំព្យូទ័រ ដោយមិនចាំបាច់ចំណាយពេលវេលា ថវិកា ធ្វើដំណើរទៅរកសេវាដូចពេលមុនៗនៅតាមទីប្រជុំជនទៀតឡើយ ប៉ុន្ដែកម្ពុជាទើបនឹងចាប់ផ្តើមរីកចម្រើនផ្នែកបច្ចេកវិទ្យាហ្នឹងក្នុងរយៈពេលខ្លីប៉ុណ្ណោះ ។ អីចឹង យើងពិបាកនិយាយថា បច្ចេកវិទ្យានេះបានចូលរួមផ្តល់ភាពងាយស្រួលកម្រិតណាឱ្យបានច្បាស់លាស់ទេ ហើយបើផ្នែកណាមួយនៃបច្ចេកវិទ្យាកើតមានបញ្ហានៅតាមស្ថាប័ននោះ វានឹងធ្វើឱ្យខាតប្រយោជន៍ច្រើន » ។
លោកឧកញ៉ាបានលើកជាឧទាហរណ៍ថា បើសិនប្រព័ន្ធស្នូលរបស់ធនាគារ ដែលដើរដោយប្រព័ន្ធទូរគមនាគមន៍ ប្រព័ន្ធទូរស័ព្ទ ខ្សែកាប្លិ៍អុបទិច កាលណាវាខូច ឬដាច់ វានឹងធ្វើឱ្យប្រព័ន្ធរបស់ធនាគារត្រូវអាក់ដំណើរការ ជាហេតុធ្វើឲ្យខាតបង់ច្រើន ទាំងការផ្តល់និងទទួលសេវាជូនអតិថិជន ហើយចំណុចនេះមិនថាខាងថ្នាក់ដឹកនាំនៅតាមគ្រឹះស្ថាន ឬស្ថាប័ននានាទេ តែងព្រួយបារម្ភ និងបានចាត់វិធានការបង្ការជាមុន ចៀសវាងការខាតបង់អត្ថប្រយោជន៍ ។
យ៉ាងណាក៏ដោយ លោកថា ៖« សព្វថ្ងៃ យើងឃើញគ្រឹះស្ថានមីក្រូហិរញ្ញវត្ថុមួយចំនួន តួយ៉ាង ដូចហត្ថាកសិករជាដើម គឺបានដាក់ឲ្យប្រើប្រាស់បច្ចេកវិទ្យាថ្មីៗជាច្រើន ដែលអនុញ្ញាតឱ្យអតិថិជនអាចធ្វើប្រតិបត្តិការធនាគារជាមួយហត្ថាកសិករ តាមរយៈទូរស័ព្ទដៃ ដូចជា បង់ថ្លៃទឹក ភ្លើង និងទូទាត់វិក្កយបត្រផ្សេងៗជាដើម » ។
លោក ជា ផល្លារិន អគ្គនាយកគ្រឹះស្ថានមីក្រូហិរញ្ញវត្ថុអម្រឹត បានថ្លែងថា កាលណាបច្ចេកវិទ្យារីកចម្រើន នឹងជួយដល់សេដ្ឋកិច្ចជាតិ ដោយការទូទាត់សាច់ប្រាក់សុទ្ធ នឹងត្រូវជំនួសដោយការទូទាត់់តាមរយៈបច្ចេកវិទ្យា ដូចជា ទូរស័ព្ទដៃ ឬវីសាកាតវិញ ។ ប្រព័ន្ធបច្ចេកវិទ្យានឹងជួយបង្កើនសកម្មភាពសេដ្ឋកិច្ចជាងមុន ព្រោះការទូទាត់កាន់តែមានភាពងាយស្រួល ។
លោកបន្តថា ៖« ប្រព័ន្ធហិរញ្ញវត្ថុកម្ពុជាកំពុងតែវិវត្តន៍រីកចម្រើន និងផ្លាស់ប្តូរពីរបៀបទូទាត់តាមបែបប្រពៃណី មកទូទាត់តាមបែបបច្ចេកវិទ្យាវិញ » ។
នៅក្នុងវេទិកាសេដ្ឋកិច្ចពិភពលោក ស្តីពីអាស៊ាននៅកម្ពុជា កាលពីដើមឆ្នាំនេះ ប្រធានបទនៃការជំរុញកំណើនសេដ្ឋកិច្ចតាមបែបច្ចេកវិទ្យា ត្រូវបានលើកឡើង និងផ្តោតយ៉ាងស៊ីជម្រៅ ដែលបរិបទពិភពលោក បានហៅសេដ្ឋកិច្ចបច្ចុប្បន្នថា ជាសេដ្ឋកិច្ចបច្ចេកវិទ្យា ដែលជាបដិវត្តន៍ឧស្សាហកម្មដំណាក់កាលទី៤ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ដោយសារការនាំមកនូវបច្ចេកវិទ្យា ចំណេះដឹង និងបទពិសោធន៍ថ្មីៗពីវិនិយោគិន និងអ្នកជំនាញមកពីបរទេស ដែលផ្តល់ផលចំណេញដល់កម្ពុជាទាំងលើទុន និងចំណេះដឹង ធ្វើឲ្យប្រព័ន្ធធនាគារនានានៅកម្ពុជាកាន់តែមានភាពរីកចម្រើន ៕
ចែករំលែកព័តមាននេះ