សហរដ្ឋអាមេរិក-ប្រទេសកូរ៉េខាងជើង ៖ សហរដ្ឋអាមេរិកប្រកាសកាលពីថ្ងៃទី២១ វិច្ឆិកា ពីទណ្ឌកម្មថ្មីៗប្រឆាំងបណ្តាសហគ្រាសកូរ៉េខាងជើង ព្រមទាំងប្រឆាំងបណ្តាសហគ្រាសចិនផងដែរ ដើម្បីធ្វើឱ្យកូរ៉េខាងជើងកាន់តែឯកោថែមទៀត ហើយសង្ឃឹមថា បែបនេះនឹងចាប់បង្ខំប្រទេសនោះ ឱ្យព្រមចរចាលើកម្មវិធីនុយក្លេអ៊ែររបស់ខ្លួន…
សហរដ្ឋអាមេរិក-ប្រទេសកូរ៉េខាងជើង ៖ សហរដ្ឋអាមេរិកប្រកាសកាលពីថ្ងៃទី២១ វិច្ឆិកា ពីទណ្ឌកម្មថ្មីៗប្រឆាំងបណ្តាសហគ្រាសកូរ៉េខាងជើង ព្រមទាំងប្រឆាំងបណ្តាសហគ្រាសចិនផងដែរ ដើម្បីធ្វើឱ្យកូរ៉េខាងជើងកាន់តែឯកោថែមទៀត ហើយសង្ឃឹមថា បែបនេះនឹងចាប់បង្ខំប្រទេសនោះ ឱ្យព្រមចរចាលើកម្មវិធីនុយក្លេអ៊ែររបស់ខ្លួន ។
លោក STEVE MNUCHIN រដ្ឋមន្ត្រីរតនាគារអាមេរិកក្នុងសេចក្តីប្រកាសមួយនិយាយថា ទណ្ឌកម្មថ្មីទាំងនេះសំដៅលើបណ្តាសហគ្រាសចិនដែលធ្វើពាណិជ្ជកម្មជាមួយកូរ៉េខាងជើង ដែលមានទឹកប្រាក់ដល់ច្រើនរយលានដុល្លារ ។ សរុបជនជាតិចិនម្នាក់ ក្រុមហ៊ុន និងស្ថាប័ន១៣ ព្រមទាំងនាវា២០គ្រឿង ទទួលរងទណ្ឌកម្មទាំងនេះ ។
ប្រធានាធិបតីអាមេរិក លោកដូណាល់ ត្រាំ កាលពីថ្ងៃទី២០ វិច្ឆិកា បានបញ្ចូលប្រទេសកូរ៉េខាងជើងទៅក្នុងបញ្ជីខ្មៅអាមេរិកនៃបណ្តារដ្ឋ ដែលជួយទ្រទ្រង់ដល់ភេរវកម្មដែលជំរុញឱ្យមានទណ្ឌកម្មខ្លាំងថ្មីៗទៀត ។
រដ្ឋមន្ត្រីការបរទេសអាមេរិក លោក REX TILLERSON អះអាងថា ទណ្ឌកម្មអន្តរជាតិទាំងឡាយដែលអនុម័ត ដោយក្រុមប្រឹក្សាសន្តិសុខ អ.ស.ប ជាការឆ្លើយតបចំពោះការសាកល្បងនុយក្លេអ៊ែរ និងមីស៊ីលបាលីស្ទិកថ្មីៗ ព្រមទាំងបណ្តាទណ្ឌកម្មជាឯកតោភាគីទាំងឡាយសម្រេចដោយសហរដ្ឋអាមេរិក ចាប់ផ្តើមធ្វើឱ្យមានការប៉ះពាល់ខ្លាំងលើសេដ្ឋកិច្ចកូរ៉េខាងជើងហើយ ។
កាលពីថ្ងៃទី២១ វិច្ឆិកា ក្រសួងរតនាគារអាមេរិកប្រកាសពីការដាក់ទណ្ឌកម្មលើក្រុមហ៊ុនអាហរណ-នីហរណ៤របស់ចិន ព្រមទាំងម្ចាស់ដែលជាជនជាតិចិនម្នាក់ ។ ក្រុមហ៊ុនចិនទាំង៤នោះគឺក្រុមហ៊ុន DANDONG KEHUA ECONOMY AND TRADE CO.LTD ក្រុមហ៊ុន DANDONG XIANGHE TRANDING CO.LTD និងក្រុមហ៊ុន DANDONG HONGDA TRADE CO.LTD មានឯកទេសក្នុងការធ្វើពាណិជ្ជកម្មកុំព្យូទ័រយួរដៃ និងរ៉ែ ព្រមទាំងលោក SUN SIDONG និងសហគ្រាស DANDONG DONGYUAN INDUSTRIAL CO. LTD របស់លោកដែលនាំចេញទៅកាន់កូរ៉េខាងជើង ។
ចំពោះខាងកូរ៉េខាងជើង ទណ្ឌកម្មថ្មីៗសំដៅលើបណ្តារដ្ឋបាល ទីភ្នាក់ងារ និងបណ្តាសហគ្រាសដឹកជញ្ជូនផ្លូវសមុទ្រ ។ នាវា២០គ្រឿងដោតទង់ជាតិកូរ៉េខាងជើង ក៏រងទណ្ឌកម្មថ្មីទាំងនេះដែរ ព្រោះទទួលការចោទប្រកាន់ជាពិសេសថា ចូលរួមក្នុងយុទ្ធសាស្ត្រនៃរបបកូរ៉េខាងជើងពង្វាងទណ្ឌកម្មអន្តរជាតិ ។ រួចក្រុមហ៊ុន KOREA SOUTH-SOUTH COOPERATION CORPORATION ជាក្រុមហ៊ុននាំចេញពលករកូរ៉េខាងជើង ពិសេសទៅចិន រុស្ស៊ី កម្ពុជា និងប៉ូឡូញ ដើម្បីរកចំណូលសម្រាប់ប្រទេសក៏ជាប់ទាក់ទិននឹងទណ្ឌកម្មថ្មីនេះដែរ ៕
ចែករំលែកព័តមាននេះ