បងស្រីហៃ លាងយន រស់នៅភូមិវត្តកណ្តាល ឃុំទឹកវិល ស្រុកស្អាង ខេត្តកណ្តាល ។ គាត់មានបទពិសោធន៍ដាំដុះដំណាំជាច្រើនប្រភេទដូចជា ត្រសក់ ខ្ទឹម សណ្តែក ម្ទេស ល្ហុង ត្រាវ អំពៅ ស្ពៃខៀវ ស្ពៃក្តោប ស្ពៃក្រញាញ់ ខាត់ណាផ្កា ខាត់ណាស្លឹកជាដើម ។ បទពិសោធន៍នេះ គាត់ចេះតាមឪពុកម្តាយរបស់គាត់តាំងពីបុរាណមក ។ ក្នុងមួយរដូវ១,៥ខែ គាត់ទទួលបានប្រាក់ចំណេញជាង២លានរៀល ។
១-ការរៀបចំដី និងការដាំ
ចំពោះដីសំរាប់ដាំស្ពៃខៀវ គាត់បានធ្វើការភ្ជួររាស់ឱ្យរាបស្មើ និងម៉ដ្ឋល្អ រើសស្មៅចេញឱ្យអស់ រួចដាក់ជីទ្រាប់បាត ដូចជា ជីអាចម៍គោ ។ បន្ទាប់មក គាត់លើកជារង ដែលមានទទឹងពី១ ទៅ១,២ម៉ែត្រ កំពស់២ទឹក បណ្តោយទៅតាមទំហំដី និងចន្លោះពីរងមួយ ទៅមួយ០,៥ម៉ែត្រ ។
គាត់មិនបានធ្វើការសាបកូនទេ គឺគាត់ព្រោះគ្រាប់យកតែម្តង ដោយយកគ្រាប់លាយជាមួយផេះ ដើម្បីសាបឱ្យបានស្មើល្អ ។ ក្រោយពីព្រោះគ្រាប់រួចហើយ គាត់បានយកចំបើងគ្របពីលើ ដើម្បីការពារសត្វល្អិតចង្រៃ និងជំងឺផ្សេងៗ ។ រួចស្រោចទឹកមួយថ្ងៃ២ដង ព្រឹកម្តង និងល្ងាចម្តង។ ក្រោយពីព្រោះគ្រាប់បាន១សប្តាហ៍ គាត់បានដកចំបើងចេញវិញ ហើយនៅពេលដែលស្ពៃដុះបានរយៈពេលពី១៥ទៅ២០ថ្ងៃ គាត់ចាប់ផ្តើមធ្វើការដករំលោះកូនស្ពៃ ដោយទុកតែកូនស្ពៃណាដែលថ្លោសល្អ និងរក្សាចំងាយពីដើមមួយ ទៅមួយប្រវែង២តឹក ។
២-ការថែទាំ
ចំពោះការថែទាំ គាត់នៅតែបន្តការស្រោចទឹកមួយថ្ងៃ២ដងដដែល ។ រហូតដល់ស្ពៃធំ គាត់បន្ថយការស្រោចទឹកនៅមួយថ្ងៃម្តង។ បន្ទាប់ពីធ្វើការរំលោះកូនស្ពៃរួចមក គាត់ចាប់ផ្តើមធ្វើការដកស្មៅជ្រុំគល់ និងដាក់ជីបំប៉នបន្ថែមលើដំណាំដោយប្រើជីអ៊ុយរ៉េ១ស្លាបព្រា លាយទឹក១ប៉ោត ស្រោចបន្ថែមជួយដល់ការលូត
លាស់ ។ ចំពោះជីធម្មជាតិ (លាមកសត្វគាត់ដាក់ទ្រាប់បាតរងតែម្តងប៉ុណ្ណោះ) ។
ចំពោះសត្វល្អិតដែលបំផ្លាញដំណាំមានដូចជា សត្វទៀកគូ ដង្កូវស៊ីត្រួយ ដង្កូវស៊ីស្លឹក ដង្កូវយោលទោង ។ រីឯជំងឺដែលគាត់ធ្លាប់ជួបប្រទះមានដូចជា ក្រាភ្លើង ក្រហមបណ្តូល និងរបួសត្រួយ។ ចំពោះវិធានការកំចាត់គឺគាត់ឧស្សាហ៍ចុះត្រួតពិនិត្យចាប់ដង្កូវ និងដកដើមដែលមានជំងឺចោល។
ការប្រមូលផល
គិតពីដាំ រហូតដល់ប្រមូលផលមានរយៈពេល៤០ទៅ៥០ថ្ងៃ ។ ដោយគាត់ធ្វើការកាត់ត្រឹមគល់ស្ពៃ ហើយប្រមូលផលតែ១សា ទាំងអស់តែម្តង។ ដោយមិនបានទុកពូជទេ នៅរដូវក្រោយគាត់នឹងទិញពូជពីផ្សារមកដាំទៀត ។
ក្នុងនោះគាត់ចំណាយទៅលើពូជអស់១គីឡូក្រាមតំលៃ២២.០០០រៀល ជីគីមី១០គីឡូក្រាម អស់ប្រាក់ចំនួន៦០.០០០រៀល បូមទឹកអស់១១០.០០០រៀល សរុបចំណាយអស់ប្រាក់ចំនួន១៩២.០០០រៀល ។ បើទូទាត់លើការចំណាយក្នុងរដូវដាំដុះរយៈពេល១,៥ខែ គាត់ទទួលបានប្រាក់ចំណេញសុទ្ធ២.១៥៨.០០០រៀល ។
សរុបមក បច្ចេកទេសសំខាន់ៗក្នុងការដាំស្ពៃមាន ៖
-ភ្ជួររាស់ដោយកៀរឱ្យស្មើល្អ ទើបលើកជារងដាំ
-ព្រោះគ្រាប់លើរង ដោយយកគ្រាប់លាយជាមួយផេះ ហើយសាបគ្រាប់ឱ្យបានស្មើល្អ
-យកចំបើងគ្របពីលើគ្រាប់ ដែលទើបព្រោះនោះ ដើម្បីកុំឱ្យខ្ទាតគ្រាប់នៅពេលស្រោចទឹក
-នៅពេលកូនស្ពៃដុះ ត្រូវដកកូនចេញខ្លះ ដោយទុកតែកូនស្ពៃដែលថ្លោសល្អ និងទុកចន្លោះពីដើមមួយទៅមួយប្រវែង២តឹក
-ធ្វើការថែទាំដកស្មៅ ជាពិសេសនៅពេលកូនស្ពៃនៅតូច
-ដាក់ជីលាមកសត្វទ្រាប់បាតរង និងស្រោចទឹកបំប៉នតាមការកំណត់ឱ្យបានត្រឹមត្រូវ ៕ (ដកស្រង់ចេញពីទស្សនាវដ្តីកសិករ)
ចែករំលែកព័តមាននេះ