ខេត្តមណ្ឌលគិរី ៖ អ្នកដាំបន្លែសុវត្ថិភាពសហគមន៍កសិកម្មសាមគ្គីមនោរម្យ កំពុងមមារញឹកប្រមូលផលស្ពៃក្តោប និងស្ពៃបូកគោក្នុងសប្តាហ៍ទីពីរនៃខែកុម្ភៈ នេះ ខណៈការបញ្ជាទិញកាន់តែមានច្រើនពីអតិថិជន ព្រោះគុណភាពនិងតម្លៃ ។ លោក…
ខេត្តមណ្ឌលគិរី ៖ អ្នកដាំបន្លែសុវត្ថិភាពសហគមន៍កសិកម្មសាមគ្គីមនោរម្យ កំពុងមមារញឹកប្រមូលផលស្ពៃក្តោប និងស្ពៃបូកគោក្នុងសប្តាហ៍ទីពីរនៃខែកុម្ភៈ នេះ ខណៈការបញ្ជាទិញកាន់តែមានច្រើនពីអតិថិជន ព្រោះគុណភាពនិងតម្លៃ ។
លោក ភិន ផន ប្រធានសហគមន៍បន្លែសុវត្ថិភាពកសិកម្មសាមគ្គីមនោរម្យ កាលពីថ្ងៃអាទិត្យកន្លងទៅនេះបានឲ្យដឹងថា បច្ចុប្បន្ន បងប្អូនអ្នកដាំដុះបន្លែបានចងក្រងគ្នាជាសហគមន៍ មានចំការច្រើនទីតាំងក្នុងក្រុងសែនមនោរម្យដែលអាចផ្គត់ផ្គង់ទៅដល់អ្នកបញ្ជាទិញ យកទៅលក់នៅតាមបណ្តាផ្សារទំនើបនានា និងខេត្តផ្សេងៗ ។
លោក ភិន ផន បន្តថា រាល់ថ្ងៃនេះបន្លែដែលទទួលបានការបញ្ជាទិញច្រើនជាងគេពីសំណាក់មហាជន គឺស្ពៃក្តោប និងស្ពៃបូកគោ ដោយសារវាមានរសជាតិឆ្ងាញ់ប្លែកពីតំបន់ដទៃ ទើបទទួលបានការគាំទ្រយ៉ាងច្រើនបែបនេះ។
រឿងរសជាតិមួយបែប បើនិយាយពីគុណភាពបន្លែដែលដាំដោយប្រជាសហគមន៏នៅក្រុងសែនមនោរម្យ គឺធានាពីសុវត្ថិភាពជូនដល់សុខភាពរបស់អ្នកបរិភោគ១០០% ដ្បិតការដាំដុះគឺសុទ្ឋតែមានការត្រួតពិនិត្យបានយ៉ាងត្រឹមត្រូវពីអ្នកជំនាញ និងការជួយផ្នែកបច្ចេកទេសពីមន្ត្រីមន្ទីរកសិកម្មផងដែរ។
ប្រធានសហគមន៏បន្លែសុវត្ថិភាពកសិកម្មសាមគ្គីមនោរម្យបានបន្ថែមថា ស្ពៃក្តោបនិងស្ពៃបូកគោ ដែលលោកកំពុងប្រមូលផលនេះ គឺលក់បានតម្លៃចាប់ពីប្រាំមួយពាន់រៀលទៅប្រាំពីរពាន់រៀល ។ ក្រៅពីស្ពៃបូកគោ និងស្ពៃក្តោប សហគមន៍បន្លែសុវត្ថិភាពកសិកម្មសាមគ្គីមនោរម្យ នៅមានដាំបន្លែជាច្រើនទៀតរួមមាន មើមយ៉េន ការ៉ុត ត្រប់ សាលាដ៏ ឆៃថាវ…។
យ៉ាងណាក៏ដោយ បើតាមការបញ្ជាក់ពីលោក ភិន ផន ទោះបីកសិករបានប្រមូលផ្តុំគ្នាជាសហគមន៏ ដើម្បីផ្គត់ផ្គង់ បន្លែតាមការបញ្ជាទិញពីអតិថិជន ក៏នៅមានការខ្វះខាតបរិមាណបន្លែម្តងម្កាលនារដូវវស្សាសម្រាប់ទីផ្សារ ដែលតម្រូវឲ្យកសិករត្រូវបង្កើនការដាំដុះបន្ថែម។
លោក ភិន ផន ប្រធានសហគមន៏បន្លែសុវត្ថិភាពកសិកម្មសាមគ្គីមនោរម្យបានផ្តាំផ្ញើដល់បងប្អូនកសិករទាំងអស់ ដែលកំពុងប្រកបរបរដាំបន្លែដូចគ្នា សូមសិក្សាបច្ចេកទេសពីមន្ត្រីជំនាញឲ្យបានច្បាស់លាស់ ព្រោះនៅពេលដែលបន្លែដែលយើងដាំដុះមានគុណភាពល្អ មានសុវត្ថិភាព យើងនិងទទួលបានតម្លៃថ្លៃពីការបញ្ជាទិញ។
មិនត្រឹមប៉ុណ្ណោះ បងប្អូនប្រជាកសិករ ត្រូវចេះរួបរួមគ្នាសាមគ្គីជាសហគមន៏ ដើម្បីមានឱកាស សហការជាមួយក្រុមហ៊ុនទទួលទិញបន្លែឬពីផ្សារទំនើបនានានៅរាជធានីភ្នំពេញ ដែលអាចធានាពីតម្លៃទីផ្សារល្អសម្រាប់អ្នកដាំដុះផ្ទាល់ ។
លោក សេង សៅ ប្រធានការិយាល័យក្សេត្រសាស្ត្រ និងផលិតភាពកសិកម្មនៃមន្ទីរកសិកម្មខេត្តមណ្ឌលគិរីបានឲ្យដឹងថា បន្លែសុវត្ថិភាពគឺមានទីផ្សារច្រើនសម្រាប់នាំចេញ ជាពិសេស គឺស្ពៃក្តោប និងស្ពៃបូកគោ ។
លោក សេង សៅ បានបញ្ជាក់ថា សម្រាប់ឆ្នាំ២០២៤កន្លងទៅ ការងារបង្កបង្កើនផលដំណាំសាកវប្បកម្មបន្លែ ល្ហុង ឪឡឹក ម្នាស់ ស្វាយ ទុរេន ប័រ ក្រូចវល្លិ៍ និងស្រកានាគ អនុវត្តបានសរុបចំនួន ២ ៤១២ហិកតា កើនលើសឆ្នាំ២០២៣ចំនួន៦៣ហិកតា និងមានទិន្នផលមធ្យម១២តោនក្នុងមួយហិកតា ស្មើបរិមាណផលសរុប២៧៦០៨តោន ៕
ចែករំលែកព័តមាននេះ