រាជធានីភ្នំពេញ ៖ រថយន្តដឹកអង្ករធុនធំមួយគ្រឿង ខណៈបើកចុះពីស្ពានជាន់ហ្វ្រាំងមិនស៊ី ហើយអ្នកបើកបរខ្លាចបុកអ្នកដំណើរតាមយានយន្តខាងមុខ ក៏បង្ខំចិត្តបួងចង្កួតឲ្យទៅបុកផ្ទប់នឹងបង្កាន់ដៃស្ពាន និងបង្កការភ្ញាក់ផ្អើលឡើងកាលពីវេលាម៉ោង៩និង៤៥នាទីព្រឹកថ្ងៃទី១៧ ខែវិច្ឆិកា នៅលើស្ពានព្រះមុនីវង្សថ្មី ក្នុងសង្កាត់ច្បារអំពៅទី១…
រាជធានីភ្នំពេញ ៖ រថយន្តដឹកអង្ករធុនធំមួយគ្រឿង ខណៈបើកចុះពីស្ពានជាន់ហ្វ្រាំងមិនស៊ី ហើយអ្នកបើកបរខ្លាចបុកអ្នកដំណើរតាមយានយន្តខាងមុខ ក៏បង្ខំចិត្តបួងចង្កួតឲ្យទៅបុកផ្ទប់នឹងបង្កាន់ដៃស្ពាន និងបង្កការភ្ញាក់ផ្អើលឡើងកាលពីវេលាម៉ោង៩និង៤៥នាទីព្រឹកថ្ងៃទី១៧ ខែវិច្ឆិកា នៅលើស្ពានព្រះមុនីវង្សថ្មី ក្នុងសង្កាត់ច្បារអំពៅទី១ ខណ្ឌច្បារអំពៅ ។
រថយន្តប្រភេទយីឌុបដឹកអង្ករនេះ ពាក់ផ្លាកលេខ ព្រះសីហនុ ៣A-១៨៥៥ បើកបរដោយបុរសម្នាក់ឈ្មោះ ភិន ឧត្តម អាយុ២៤ឆ្នាំ មានស្រុកកំណើតនៅក្រុងពោធិ៍សាត់ ខេត្តពោធិ៍សាត់ ដឹកអង្ករយកទៅដាក់នៅក្រុមហ៊ុនខ្មែរហ៊្វូត ស្ថិតនៅទល់មុខវត្តនិរោធ ។
ប្រភពព័ត៌មាននៅកន្លែងកើតហេតុឲ្យដឹងថា រថយន្តខាងលើបើកឡើងស្ពានព្រះមុនីវង្សថ្មីដៅពីលិចទៅកើត បំណងយកអង្ករទៅដាក់នៅក្រុមហ៊ុន ។ លុះទៅដល់ចំណុចចុះស្ពានស្រាប់តែជាន់ហ្វ្រាំងមិនស៊ី ខណៈដែលមានអ្នកដំណើរជាច្រើននៅពីមុខរថយន្ត ធ្វើឲ្យអ្នកបើកបរបង្ខំចិត្តបួងចង្កូតឲ្យទៅបុកផ្ទប់នឹងបង្កាន់ដៃស្ពានបណ្តាលរងការខូចខាតទាំងរថយន្ត និងបង្កាន់ដៃស្ពានតែម្តង ។ ទោះជាយ៉ាងណា ការសម្រេចបែបនេះរបស់អ្នកបើកបរអាចឲ្យចៀសផុតពីគ្រោះថ្នាក់ដល់អាយុជីវិតមនុស្ស ព្រោះបើមិនដូច្នោះទេ មិនដឹងថាមានមនុស្សប៉ុន្មាននាក់ឡើយដែលនឹងត្រូវស្លាប់ដោយសាររថយន្តដាច់ហ្វ្រាំងនេះ ។ ទោះជាយ៉ាងណា ក៏បណ្តាលឲ្យកកស្ទះចរាចរណ៍នៅចំណុចខាងលើអស់មួយសន្ទុះធំដែរ ។
ក្រោយកើតហេតុ សមត្ថកិច្ចមូលដ្ឋានបានសហការជាមួយមន្ត្រីជំនាញ ចុះអន្តរាគមន៍វាស់វែងនិងអូសយករថយន្តខាងលើទៅរក្សាទុកនៅការិយាល័យនគរបាលចរាចរណ៍ផ្លូវគោករាជធានីភ្នំពេញ រងចាំដោះស្រាយតាមនីតិវិធី នៅពេលក្រោយ ។ ប្រជាពលរដ្ឋនិយាយថា កាលពីពេលកន្លងទៅ នៅគល់ស្ពានព្រះមុនីវង្សថ្មីត្រើយខាងកើតនេះ តែងកើតមានគ្រោះថ្នាក់ចរាចរណ៍ដែលបង្កឡើងដោយសាររថយន្តដឹកទំនិញធុនធំ ពិសេសរថយន្តបែនដឹកដីជាដើម ដែលពេលបើកចុះស្ពានមិនបានប្រយ័ត្នជ្រុលទៅបុករះអ្នកដំណើរ បង្កមានមនុស្សស្លាប់ និងរងរបួសជាច្រើននាក់ផងដែរ ។ កត្តាទាំងនេះ គឺដោយសាររថយន្តទាំងនោះជាប្រភេទរថយន្តដឹកទំនិញធ្ងន់ៗ ជាហេតុធ្វើឲ្យរថយន្តមិនអាចទ្រនឹងទម្ងន់ទំនិញបានស្របពេលត្រូវចុះចំណោតស្ពានផងនោះ ក៏បង្កឲ្យមានជាការដាច់ហ្វ្រាំង ឬជាន់ហ្វ្រាំងមិនស៊ី កើតមានគ្រោះថ្នាក់ដល់អ្នកដទៃតែម្តង ។
អធិការរងនគរបាលខណ្ឌច្បារអំពៅ លោកឯក សារ៉ន បានឲ្យដឹងថា ជាទូទៅរាល់រថយន្តដឹកទំនិញទាំងអសគឺអនុញ្ញាតឲ្យដឹកត្រឹមតែ២៥តោនប៉ុណ្ណោះ បើគិតទាំងទម្ងន់របស់រថយន្តផង ប៉ុន្តែបើលើសពីនេះត្រូវឃាត់យកមករក្សាទុកភ្លាមៗ ។ ប៉ុន្តែការឃាត់ឬហាមឃាត់រថយន្តដឹកទំនិញដែលដឹកលើសចំណុះនេះ ជាដែនសមត្ថកិច្ចរបស់មន្ត្រីជញ្ចីងថ្លឹងរថយន្ត ឬតាមបណ្តាគោលដៅជញ្ចីងថ្លឹងនីមួយៗ ដែលអាចដឹងបានថារថយន្តទាំងនោះដឹកលើសចំណុះឬយ៉ាងណា ។ លោកអធិការរងបន្តថា នគរបាលមូលដ្ឋាន មានសិទ្ធិហាមឃាត់តែរថយន្តដឹកដី រថយន្តធុនធំណាដែលឆ្លងកាត់ស្ពានមុនម៉ោងកំណត់ ឬដឹកសំពីងសំពោងតែប៉ុណ្ណោះ ឯលើសពីនេះមិនមែនជាសមត្ថកិច្ចរបស់ថ្នាក់មូលដ្ឋានឡើយ ៕
ម៉ម វ៉ាន
ចែករំលែកព័តមាននេះ