ខេត្តស្ទឹងត្រែង ៖ ក្រុមអ្នកជំនាញបុរាណវិទ្យា បាននិងកំពុងចុះសិក្សាស្រាវជ្រាវយ៉ាងយកចិត្តទុកដាក់លើការរកឃើញនូវ ឡបុរាណចំនួន ៩កន្លែង នៅតាមបណ្តោយច្រាំងទន្លេមេគង្គ ក្នុងស្រុកបុរីអូរស្វាយសែនជ័យ ខេត្តស្ទឹងត្រែង ។…
ខេត្តស្ទឹងត្រែង ៖ ក្រុមអ្នកជំនាញបុរាណវិទ្យា បាននិងកំពុងចុះសិក្សាស្រាវជ្រាវយ៉ាងយកចិត្តទុកដាក់លើការរកឃើញនូវ ឡបុរាណចំនួន ៩កន្លែង នៅតាមបណ្តោយច្រាំងទន្លេមេគង្គ ក្នុងស្រុកបុរីអូរស្វាយសែនជ័យ ខេត្តស្ទឹងត្រែង ។
តាមការប្រទះឃើញ ឡបុរាណនេះបានកើតឡើងបន្ទាប់ពីមានការបាក់ដី នៅតាមមាត់ច្រាំងទន្លេ។ ហើយការឃើញសំណង់ ឡបុរាណនោះ គឺមានចំនួន ៩កន្លែង នៅទីតាំងចំនួន ៣ផ្សេងគ្នា ។ ៧ ឡ នៅចំណុចកន្ទុយកោះហាន។ ១ ឡ នៅខាងក្រោមកំពង់ដរ សាលាឃុំកោះស្នែង។ ១ ឡ នៅកោះខ្លី ។ ឡបុរាណទាំងនេះ មានរូបរាង រួមជាមួយនឹងកាកសំណល់ជាច្រើនដូចជា ថ្មកំបោរ អាចម៍ដែក និងវត្ថុធាតុដើមផ្សេងៗទៀត ដែលជំរុញឱ្យមានការវិភាគ ដើម្បីកំណត់អាយុកាល និងមុខងារពិតប្រាកដរបស់វា ។
នៅថ្ងៃទី២៤ ខែធ្នូ ឆ្នាំ២០២៥ លោក ឡុង វិទូ ប្រធាននាយកដ្ឋានបុរាណវិទ្យា និងបុរេប្រវត្តិ បានដឹកនាំក្រុមមន្ត្រីជំនាញ ចុះពិនិត្យផ្ទាល់។ ក្រុមជំនាញបានយកសំណាក ធ្យូងសមាសធាតុដែក កំបោរថ្ម និងធាតុផ្សំផ្សេងៗទៀត ពីកាកសំណល់ឡបុរាណទៅធ្វើការវិភាគ ដើម្បីដឹងជាលក្ខ
ណវិទ្យាសាស្ត្រថា តើមនុស្សជំនាន់ដើម គាត់ធ្វើអ្វី ដែលពាក់ព័ន្ធទៅនឹង រ៉ែដែក ឬទង់ដែង ។
លោក ឡុង វិទូ បានបញ្ជាក់ថា មិនទាន់អាចសន្និដ្ឋានមុខងារអ្វីពិតប្រាកដបានទេ លុះត្រាតែមានលទ្ធផលវិភាគបែបវិទ្យាសាស្ត្រ។
ផ្ទុយពីការសង្ស័យរបស់ក្រុមជំនាញ លើការរលាយរ៉ែ លោក វណ្ណ សំផន ជាប្រជាពលរដ្ឋរស់នៅក្នុងឃុំកោះស្នែង បានអះអាងផ្អែកលើការនិទានតៗគ្នារបស់ចាស់ទុំថា ៖ «តាមការឱ្យដឹងពីចាស់ទុំ ច្រើនជំនាន់មក ឡនេះខ្មែរដើមធ្វើឡើងសម្រាប់ ដុតថ្មកំបោរ ហើយយកទៅលាបផ្ទះ កាលពីសម័យនោះ ដែលមានអាយុកាលច្រើនសតវត្សរ៍មកហើយ» ។
លោក ភោគ សុវិសិដ្ឋ អភិបាលរងស្រុកបុរីអូរស្វាយសែនជ័យ បានសង្កត់ធ្ងន់ថា សំណង់បុរាណនេះជា សម្បត្តិវប្បធម៌បុរាណ និងមានទំនាក់ទំនងនឹងវិស័យទេសចរណ៍នៅចំណុចកោះហាន ដូច្នេះអាជ្ញាធរ ត្រូវតែការពារ។ អាជ្ញាធរឃុំ និងប៉ុស្តិ៍នគរបាលបានដាក់ កម្លាំងការពារ និងផ្សព្វផ្សាយ ដល់ប្រជាពលរដ្ឋផងដែរ។ ដោយឡែកសម្រាប់ភ្ញៀវទេសចរ អាចមកមើលបាន តែហាមប៉ះពាល់ដាច់ខាត រង់ចាំក្រុមការងារបច្ចេកទេសសិក្សាសិន។
ការរកឃើញនេះកំពុងក្លាយជាទីតាំងស្រាវជ្រាវដ៏សំខាន់មួយទៀតក្នុងប្រទេសកម្ពុជា ដើម្បីបំភ្លឺពីបច្ចេកវិទ្យា និងជីវភាពរបស់បុព្វបុរសខ្មែរនាសម័យកាលដើម ៕
ចែករំលែកព័តមាននេះ