រាជធានីភ្នំពេញ ៖ ក្រសួងការបរទស និងសហប្រតិបត្តិការអន្តរជាតិ ថ្ងៃទី២៥ ខែធ្នូ ឆ្នាំ២០២៥ បានចេញសេចក្តីប្រកាសព័ត៌មានពីជំនួបតាមទូរសព្ទរវាង ឯកឧត្តមឧបនាយករដ្ឋមន្ត្រី ប្រាក់…
រាជធានីភ្នំពេញ ៖ ក្រសួងការបរទស និងសហប្រតិបត្តិការអន្តរជាតិ ថ្ងៃទី២៥ ខែធ្នូ ឆ្នាំ២០២៥ បានចេញសេចក្តីប្រកាសព័ត៌មានពីជំនួបតាមទូរសព្ទរវាង ឯកឧត្តមឧបនាយករដ្ឋមន្ត្រី ប្រាក់ សុខុន និង ឯកឧត្តមរដ្ឋមន្តី Jean-Noël BARROT ស្តីពីជម្លោះព្រំដែនកម្ពុជា-ថៃ ។
បើតាមសេចក្តីប្រកាសព័ត៌មាន ថា នៅរសៀលថ្ងៃទី២៣ ខែធ្នូ ឆ្នាំ២០២៥ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួង ការបរទេស និងសហប្រតិបត្តិការអន្តរជាតិ បានសន្ទនាតាមទូរសព្ទជាមួយ ឯកឧត្តម Jean-Noël BARROT រដ្ឋមន្ត្រីក្រសួងអឺរ៉ុប និងការបរទេស នៃសាធារណរដ្ឋបារាំង អំពីបច្ចុប្បន្នភាព នៃជម្លោះព្រំដែនកម្ពុជា-ថៃ ។
ជាកិច្ចចាប់ផ្តើម ឯកឧត្ដមឧបនាយករដ្ឋមន្ត្រី បានថ្លែងអំណរគុណ និងកោតសរសើរចំពោះការបន្តគាំទ ឥតងាករេរបស់បារាំង ចំពោះដំណោះស្រាយជម្លោះព្រំដែនកម្ពុជា-ថៃ ដោយសន្តិវិធី និងការគោរពច្បាប់ អន្តរជាតិ ជាពិសេសកិច្ចព្រមព្រៀងបទឈប់បាញ់នៅថ្ងៃទី២៨ ខែកក្កដា ឆ្នាំ២០២៥ និងសេចក្ដីថ្លែងការណ៍រួម ទីក្រុងគូឡាឡាំពួ នៅថ្ងៃទី២៦ ខែតុលា ឆ្នាំ២០២៥ ។
ឯកឧត្តមឧបនាយករដ្ឋមន្ត្រី បានជម្រាបជូនភាគី បារាំង អំពីផលប៉ះពាល់ដ៏ធ្ងន់ធ្ងរ នៃអរិភាពដែលកំពុងបន្តកើតមាន ដែលតម្រូវឱ្យមានការជម្លៀសជនស៊ីវិល កម្ពុជាប្រមាណជាងកន្លះលាននាក់ និងការបង្កឱ្យមានវិបត្តិមនុស្សធម៌យ៉ាងធ្ងន់ធ្ងរ ។
ឯកឧត្តមឧបនាយក រដ្ឋមន្ត្រី មានប្រសាសន៍ថា ការវាយប្រហារមិនរើសគោលដៅរបស់យោធាថៃ បានបំផ្លិចបំផ្លាញខ្ទេចខ្ទីនូវ ហេដ្ឋារចនាសម្ព័ន្ធស៊ីវិល និងបង្កការខូចខាតយ៉ាងដំណំដល់ប្រាសាទបុរាណកម្ពុជាមួយចំនួន រួមទាំងតំបន់ បេតិកភណ្ឌពិភពលោករបស់អង្គការយូណេស្កូផងដែរ ។
ឯកឧត្តមឧបនាយករដ្ឋមន្ត្រី បានសម្ដែងការព្រួយ បារម្ភយ៉ាងខ្លាំងចំពោះស្ថានការណ៍ ដែលកាន់តែធ្ងន់ធ្ងរអាក្រក់ទៅ ដោយបានកត់សម្គាល់ថា ការវាយប្រហាររបស់យោធាថ ទាំងផ្លូវគោក ផ្លូវទឹក និងផ្លូវអាកាស បានវាតទីចូលជ្រៅមកក្នុងទឹកដីកម្ពុជា រហូតដល់ចម្ងាយ ៩០គីឡូម៉ែត្រពីព្រំដែន ដែលជាការឈ្លានពានរបស់ថៃ មកលើអធិបតេយ្យភាព និងបូរណភាពទឹកដីរបស់កម្ពុជា ដែលជារដ្ឋសមាជិកអាស៊ានដូចគ្នា ។
ក្នុងន័យនេះ ឯកឧត្តមឧបនាយករដ្ឋមន្ត្រី បានគូសបញ្ជាក់អំពីភាពចាំបាច់ ក្នុងការបញ្ឈប់ជាបន្ទាន់ នូវការឈ្លានពានប្រដាប់អាវុធដោយខុសច្បាប់ពីសំណាក់ប្រទេសថៃ មកលើកម្ពុជា ។
ក្នុងឱកាសកិច្ចសន្ទនានេះ ឯកឧត្តមឧបនាយករដ្ឋមន្ត្រី បានជម្រាបជូនឯកឧត្តម Jean-Noel BARPOE, អំពីលទ្ធផល នៃកិច្ចប្រជុំពិសេសរបស់រដ្ឋមន្ត្រីការបរទេសអាស៊ាន ស្តីពីស្ថានការណ៍បច្ចុប្បន្នរវាងកម្ពុជា និងថ ដែលបានប្រព្រឹត្តទៅនៅទីក្រុងគូឡាឡាំពួ ប្រទេសម៉ាឡេស៊ី នាថ្ងៃទី២២ ខែធ្នូ ឆ្នាំ២០២៥ ។
ឯកឧត្តម ឧបនាយករដ្ឋមន្ត្រី បានគូសបញ្ជាក់អំពីកិច្ចខិតខំប្រឹងប្រែងតាមរយៈផ្លូវការទូត ដែលបានធ្វើឡើងដោយប្រទេសម៉ាឡេស៊ី ក្នុងនាមប្រធានអាស៊ាន ក៏ដូចជាប្រទេសចិន តាមរយៈដំណើរទស្សនកិច្ចមកកម្ពុជារបស់ប្រេសិតពិសេស ទទួលបន្ទុកកិច្ចការអាស៊ី នៃក្រសួងការបរទេសនៃសាធារណរដ្ឋប្រជាមានិតចិន ព្រមទាំងការអន្តរាគមរបស់សហរដ្ឋអាម៉េរិក រវាងកម្ពុជា និងថៃនេះ ។
ក្នុងគោលបំណងសម្រួលដល់ការបញ្ឈប់ជាបន្ទាន់នូវជម្លោះប្រដាប់អាវុធ
ជាការឆ្លើយតប ឯកឧត្តម Jean-Noël BARROT បានកោតសរសើរចំពោះសេចក្ដីថ្លែងការណ៍របស់ប្រធានអាស៊ាន នៅក្នុងកិច្ចប្រជុំពិសេសរបស់រដ្ឋមន្ត្រីការបរទេសអាស៊ាន ស្តីពីស្ថានការណ៍បច្ចុប្បន្នរវាងកម្ពុជា-ថៃ កាលពីថ្ងៃទី២២ ខែធ្នូ ឆ្នាំ២០២៥ នៅទីក្រុងគូឡាឡាំពួ ប្រទេសម៉ាឡេស៊ី ដែលបានសង្កត់ធ្ងន់លើការបន្ត កិច្ចសន្ទនាឡើងវិញ ដើម្បីដោះស្រាយជម្លោះព្រំដែន ។
ឯកឧត្តម បានស្វាគមន៍ចំពោះកិច្ចប្រជុំគណៈកម្មាធិការ ព្រំដែនទូទៅ ដែលប្រព្រឹត្តទៅនៅថ្ងៃទី២៤ ខែធ្នូ ឆ្នាំ២០២៥នេះ ដែលជាជំហានវិជ្ជមានមួយឆ្ពោះទៅមុខ ។
លើសពីនេះ ឯកឧត្តម Jean-Noël BARROT បានសម្តែងការគាំទ្ររបស់ប្រទេសបារាំងចំពោះរាល់កិច្ចផ្តួចផ្តើមរបស់ប្រទេសម៉ាឡេស៊ី ចិន និងសហរដ្ឋអាមេរិក ដើម្បីសម្រេចឱ្យបាននូវដំណោះស្រាយដោយ សន្តិវិធី តាមរយៈផ្លូវការទូត ។
ក្នុងអំឡុងពេល នៃការសន្ទនា ឯកឧត្តមឧបនាយករដ្ឋមន្ដ្រី និងឯកឧត្តម Jean-Noël BARROT បានឆ្លៀតឱកាសផ្លាស់ប្តូរទស្សនៈ ដើម្បីពង្រឹងបន្ថែម នូវចំណងមិត្តភាពដ៏យូរអង្វែងរវាងកម្ពុជា និងបារាំង និងបានរំលឹកនូវដំណើរទស្សនកិច្ចជាប្រវត្តិសាស្ត្ររបស់លោកឧត្តមសេនីយ៍ឆាល ដឺ ហ្គោល មកកាន់ ព្រះរាជាណាចក្រកម្ពុជា ដែលពេលនោះ លោកបានថ្លែងសុន្ទរកថាដ៏ល្បីល្បាញ ដោយអំពាវនាវឱ្យមានការគោរពអធិបតេយ្យភាព និងបូរណភាពទឹកដីរបស់កម្ពុជា ។
ជាកិច្ចបញ្ចប់ ឯកឧត្តមឧបនាយករដ្ឋមន្ត្រី ប្រាក់ សុខុន បានបញ្ជាក់ឡើងវិញ នូវការប្តេជ្ញាចិត្តឥតងាករេ របស់កម្ពុជា ចំពោះដំណោះស្រាយដោយសន្តិវិធី យុត្តិធម៌ និងចីរភាព ដោយឈរលើមូលដ្ឋានច្បាប់អន្ដរជាតិ និងសន្ធិសញ្ញា ព្រមទាំងកិច្ចព្រមព្រៀងដែលមានស្រាប់ ។ ឯកឧត្តម បានសង្កត់ធ្ងន់លើតម្រូវការក្នុងការអនុវត្ត ឱ្យបានពេញលេញ ប្រកបដោយភាពស្មោះត្រង់ និងសុទ្ធចិត្តនូវបទឈប់បាញ់ជាបន្ទាន់ ការបញ្ឈប់អរិភាព និងការកសាងទំនុកចិត្តគ្នាទៅវិញ ទៅមកឡើងវិញ ។ ឯកឧត្តម ក៏បានទាមទារឱ្យមានការដោះលែងទាហានកម្ពុជា ដែលជាប់ឃុំទាំង១៨នាក់ ដូចមានចែងក្នុងសេចក្តីថ្លែងការណ៍រួមស្រាប់ ៕
ចែករំលែកព័តមាននេះ