រាជធានីភ្នំពេញ ៖ នៅរសៀលម៉ោង២ថ្ងៃសៅរ៍ទី១៨ វិច្ឆិកា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹងដល់កំណត់ត្រូវប្រកួតដណ្ដើមពិន្ទុអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។ អ្វីដែលគេកត់សម្គាល់គឺការប្រកួតលើកនេះកីឡាករកម្ពុជាល្បីឈ្មោះប៉ះសុទ្ធតែជាមួយកីឡាករជើងចាស់មកពីប្រទេសថៃដែលគេមិនទាន់ដឹងថា តើអ្នកណានឹងយកបាន៣ពិន្ទុនៅឡើយទេ ។
ការប្រកួតដែលនឹងចាប់ផ្ដើមឡើងពីម៉ោង២រសៀលស្អែកនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលរសៀលថ្ងៃសម្រាក ដែលមនុស្សម្នាក្នុងក្រុងនិយមមកទស្សនាដល់ស្ទីឌីយោ ហើយនៅចន្លោះការប្រកួតរបស់គូនីមួយៗក៏មានការប្រគំតន្ត្រីផង ហើយមុនការប្រដាល់គឺជាវេទិកាតន្ត្រីបន្តផ្ទាល់ ។ កីឡាករកម្ពុជា២រូប គឺជើងខ្លាំង ឌុម កែវដា និងសេង ស្រឿន នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅថ្ងៃនោះ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា៤រូបដែលមានឈ្មោះដណ្ដើមយកខ្សែក្រវាត់ក្នុងព្រឹត្តិការណ៍ប្រដាល់នោះ កីឡាករ ឌុម កែវដា គឺជាជើងខ្លាំងវ័យក្មេងម្នាក់ដែលលោករំពឹងខ្ពស់ បើទោះជាគេត្រូវប្រឈមនឹងកីឡាករថៃល្អជាគូប្រកួតក្ដី ។ គេត្រូវប៉ះប្រកួតជាមួយកីឡាករថៃឈ្មោះ ភេត ឆៃដែន ក្នុងនាមជាគូរងឯកដណ្ដើមពិន្ទុអន្តរជាតិនៅថ្ងៃសៅរ៍ស្អែក។
លោកថា ជំនួបពួកគេជារឿងសំខាន់ ដោយសារអ្នកណាឈ្នះក្រៅពីបានពិន្ទុហើយ គឺត្រូវទទួលបានទំនុកចិត្តពីអ្នកគាំទ្រទៅទៀត ។ ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរនោះទេ ហើយនឹងធ្លាក់ដោយស្វ័យប្រវត្តិតែម្ដង ។ លោកថា កីឡាករ ឌុម កែវដា អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបរវាងឌុម កែវដា ជាមួយកីឡាករថៃជាដៃគូពិតជាមិនធម្មតាសម្រាប់ការប្រកួតទាំងមូល ។ លោកថា កីឡាករកម្ពុជារូបនេះមានការឈានឡើងសមត្ថភាព ហើយការប្រកួតប៉ុន្មានលើកចុងក្រោយក៏ល្អផងដែរ ទើបលោកយល់ថាគេអាចបាន៣ពិន្ទុពីការប្រកួតនៅថ្ងៃស្អែក បើទោះជាមុននេះបន្តិចគេវាយជាមួយថៃល្អខ្លះ និងមិនសូវល្អខ្លះនៅលើសង្វៀនអន្តរជាតិក្ដី ។ លោកនិយាយថា ឌុម កែវដា នៅតែចាត់ទុកថាជាជើងខ្លាំងនៅលើសង្វៀន ទើបលោករំពឹងខ្ពស់សម្រាប់ការប្រកួតលើកនេះ ។ កីឡាករថៃដែលត្រូវប្រកួតជាមួយ ឌុម កែវដា ធ្លាប់ប្រកួត៨១លើក ឈ្នះ៦៤លើក ចាញ់១៧លើក និងមិនដែលស្មើ ក្នុងពេលដែលកីឡាករកម្ពុជាធ្លាប់ប្រកួតរហូតដល់៨១លើក ឈ្នះ៦៦លើក ចាញ់១៣លើក និងស្មើ២លើក ។
សម្រាប់កីឡាករ សេង ស្រឿន លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករថៃឈ្មោះ កែវ កាងវ៉ាន នៅក្នុងព្រឹត្តិការណ៍ប្រដាល់អន្តរជាតិដណ្ដើមពិន្ទុនេះក្នុងនាមជាគូឯកផងដែរ ។ លោកថា ការប្រកួតរបស់ពួកគេ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលសេង ស្រឿន គឺជាកីឡាករមិនធម្មតា ដោយលោកបានចាត់ទុកថាគឺជាជើងខ្លាំង និងធនធានកីឡាករវ័យក្មេងដ៏កម្រនោះផង ។ ជាក់ស្ដែងគេឈ្នះជាប្រចាំគ្រប់ពេលគេឡើងប្រកួតជាមួយកីឡាករបរទេសនាពេលកន្លងមក ទើបមានមុខបានឡើងនៅក្នុងព្រឹត្តិការណ៍នេះ ។ លោកថា កីឡាករថៃជាដៃគូគេគឺជាកីឡាករវ័យក្មេងល្បីឈ្មោះ ប៉ុន្តែគេមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់លើកីឡាករកម្ពុជាជាធំ ។ កីឡាករថៃធ្លាប់ប្រកួត៧៨លើក ឈ្នះ៦២លើក ចាញ់១៥លើក និងស្មើ១លើក រីឯកីឡាករកម្ពុជាធ្លាប់ប្រកួត៦៦លើក ឈ្នះ៥៦លើក ចាញ់តែ១០លើក និងមិនធ្លាប់ស្មើ ។
នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិបែបនេះមិនខុសគ្នា ខណៈនៅប៉ុស្តិ៍លេខ៥ព្រែកកំពិស ក៏មានការប្រកួតជម្រុះ១៦នាក់យក៨នាក់ចាប់ពីម៉ោង៥ល្ងាចតទៅ ៕
ចែករំលែកព័តមាននេះ