ខេត្តពោធិ៍សាត់ ៖ ដោយសង្កេតឃើញសិស្សក្រីក្រ និងនៅឆ្ងាយពីសាលារៀនភាគច្រើនបោះបង់ការសិក្សាដោយសារតែឪពុកម្តាយ ឬអាណាព្យាបាលគ្មានលទ្ធភាពផ្តល់ឱ្យកូនទៅរៀនរហូតចប់ចុងចប់ដើមនោះ នៅថ្ងៃទី២៦ តុលា ២០១២ អង្គការកម្ពុជា ដើម្បីកុមារ និងការអភិវឌ្ឍដែលហៅ កាត់ថា COCD បានរៀបចំធ្វើពិធីចែកអាហារូបករណ៍ដល់សិស្សចំនួន១៨១នាក់ដែលមកពីសាលាចំនួន១៧ ក្នុងស្រុកភ្នំក្រវាញ និងស្រុកវាលវែងក្នុងនោះមានទាំងបឋមសិក្សា អនុវិទ្យាល័យ និងវិទ្យាល័យ។
លោកសួន ប្រាជ្ញា នាយកប្រតិបត្តិនៃអង្គការ COCD បានជម្រាបជូនថា អង្គការ COCD បានបង្កើតឡើងនៅឆ្នាំ ២០០៨ មានការិយាល័យកណ្តាលនៅរាជធានីភ្នំពេញ មានសាខាចំនួន៣ គឺនៅស្រុកឈូក ខេត្តកំពត នៅស្រុកភ្នំក្រវាញ និងស្រុកវាលវែង ខេត្តពោធិ៍សាត់នេះ ក្រោមការជួយគាំទ្រពីអង្គការ Lotus Outreach International និងអង្គការ Terredes Hommes Netherlands ។ ជាអង្គការមិនមែនរដ្ឋាភិបាលមិនរកប្រាក់ចំណេញ មិនប្រកាន់បក្សនយោបាយ និងសាសនា ហើយអនុវត្តការងារដោយផ្តោតសំខាន់ទៅលើសុខុមាលភាពសង្គមសម្រាប់ប្រជាជនរស់នៅតំបន់ដាច់ស្រយាល និងជំរុញឱ្យសង្គមកម្ពុជាក្លាយជាសង្គមមួយដែលមានការការពារ និងគោរពសិទ្ធិកុមារ ។ កម្មវិធីសំខាន់ៗរបស់អង្គការមាន៤ គឺលើកកម្ពស់វិស័យអប់រំ សុខភាពបឋម សន្តិសុខស្បៀង ប្រឆាំងការជួញដូរ និងកេងប្រវ័ញ្ចលើកុមារ ។ ការចែកអាហារូបករណ៍ដល់សិស្សទាំង១៨១នាក់ ថ្ងៃនេះម្នាក់ៗទទួលបានសម្លៀកបំពាក់១កំប្លេ សៀវភៅ១០ក្បាល កាតាប១ ប៊ិច៣ដើម ខ្មៅដៃ១ ជ័រលុប១ បន្ទាត់១ មួក១ និងស្បែកជើងមួយសម្រាប់ ។ ដោយឡែកសិស្សស្រីចំនួន១០៨នាក់ដែលនៅឆ្ងាយពីសាលា ហើយឪពុកម្តាយក្រីក្រខ្លាំងនោះជូនកង់ម្នាក់១គ្រឿងទៀត ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ