រាជធានីភ្នំពេញ ៖ អតីតអ្នកអត្ថាធិប្បាយព័ត៌មានដ៏ឆ្នើមប្រចាំវិទ្យុអាស៊ីសេរី២នាក់ ត្រូវបានកម្លាំងសមត្ថកិច្ចចម្រុះខណ្ឌមានជ័យ ដឹកនាំដោយលោកពេជ្រ កែមុនី អភិបាលខណ្ឌធ្វើការឃាត់ខ្លួន បញ្ចូនទៅកាន់ស្នងការដ្ឋាននគរបាលរាជធានីភ្នំពេញ ក្រោយសង្ស័យថា ពួកគេបានលួចលាក់ដំឡើងវិទ្យុផ្សព្វផ្សាយព័ត៌មាន ដោយខុសច្បាប់ចេញទៅក្រៅប្រទេស ។
ការឃាត់ខ្លួន ធ្វើឡើងក្នុងការពិនិត្យរដ្ឋបាលនៅក្នុងសណ្ឋាគារមួយកន្លែងយីហោ «ម៉ារ
ឌី» ស្ថិតនៅចំណុចគល់ស្ពានអាកាសស្ទឹងមានជ័យ តាមផ្លូវមុនីរ៉េត ក្នុងភូមិ៥ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ កាលពីវេលាម៉ោង០៨នាទីយប់ ថ្ងៃទី១៤ វិច្ឆិកា ដោយមានការចូលរួមពីព្រះរាជអាជ្ញាររងអមសាលាដំបូងរាជធានីភ្នំពេញ លោកអ៊ុំ សុភ័ក្ត្រ នគរបាលសន្តិសុខផ្ទៃក្នុងក្រសួងមហាផ្ទៃ និងមន្ត្រីជំនាញពាក់ព័ន្ធជាច្រើនទៀតផងដែរ ។
មន្ត្រីសមត្ថកិច្ចបានប្រាប់ឱ្យដឹងថា អតីតបុគ្គលិកវិទ្យុអាស៊ីសេរី ( RFA ) ដែលត្រូវបានអាជ្ញាធរឃាត់ខ្លួន ម្នាក់ឈ្មោះ អ៊ួង ឈិន ភេទប្រុស អាយុជាង៤០ឆ្នាំ មានទីលំបច្ចុប្បន្នស្ថិតនៅផ្ទះលេខ៩២ ផ្លូវលេខ១៨ ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ និងម្នាក់ទៀតឈ្មោះយាង សុធារិន្ទ (ហៅយាង សុជាមេត្តា) ភេទប្រុស អាយុ៣៥ឆ្នាំ ។
លោកឌី រ័ត្នខេមរុណ អភិបាលរងខណ្ឌមានជ័យឱ្យដឹងថា ជនសង្ស័យបានមកជួលបន្ទប់លេខE04 ជាន់ទី៧ នៃសណ្ឋាគារខាងលើ ក្នុងតម្លៃ២០០ដុល្លារ ដោយកម្លាំងអាជ្ញាធរសង្ស័យថា បានលួចលាក់តម្លើងជាបន្ទប់ផ្សាយព័ត៌មាន តាមវិទ្យុដោយខុសច្បាប់នៅចំណុចខាងលើ ក្រោយរកឃើញឧបករណ៍ពាក់ព័ន្ធមួយចំនួន ។
ចំពោះមុខកម្លាំងអាជ្ញាធរចម្រុះ លោកអ៊ួង ឈិន បានឆ្លើយថា រូបលោកបានជួលបន្ទប់សណ្ឋាគារនេះ ដើម្បីបើកស្ទីឌីយោច្រៀងខារ៉ាអូខេ និងថតវីដេអូ ក្នុងកម្មវិធីរៀបអាពាហ៍ពិពាហ៍ និងពិធីបុណ្យផ្សេងៗ សម្រាប់អាណិកជនជួលទៅតាម តម្រូវការជាក់ស្តែង និងគ្រោងរៀបចំថតចម្រៀង សម្រាប់លក់កម្សាន្តតជាលក្ខណៈគ្រួសារតែប៉ុណ្ណោះ មិនមានបំណងក្នុងគោលដៅអ្វីផ្សេងឡើយ ។
យ៉ាងណាមិញ ក្រោយការសាកសួរនាំយ៉ាងល្អិតល្អន់រួចមក លោកអ៊ួង ឈិន ត្រូវបានកម្លាំងអាជ្ញាធរចម្រុះ ដោយមានការឯកភាពពីព្រះរាជអាជ្ញាររង បានសម្រេចធ្វើការឃាត់ខ្លួនបញ្ចូនទៅកាន់ស្នងការដ្ឋាននគរបាលរាជធានីភ្នំពេញទាំងយប់ ដើម្បីសាកសួរនាំបន្ថែម និងបន្តនីតិវិធី។
ក្នុងការឃាត់ខ្លួន កម្លាំងអាជ្ញាធរចម្រុះ បានរកឃើញ ម៉ាស៊ីកុំព្យូទ័រ Dastop ៤គ្រឿង Laptopមួយគ្រឿង Mixer មួយគ្រឿង Speaker មួយគូរ ទូរទស្សន៍ ២គ្រឿង Moniter Speaker មួយគូរ Microphone ចំនួន៥ រួមទាំងសម្ភារៈពាក់ព័ន្ធនឹងការតម្លើងស្ទីឌីយោវិទ្យុមួយចំនួនធំទៀតផងដែរ ។
គួររំលឹកថា វិទ្យុអាស៊ីសេរី (RFA) ត្រូវបានគេដឹងថា ជាវិទ្យុមួយដែលមានទំនោរទៅរកបក្សប្រឆាំង និងគាំទ្រ ដោយសហរដ្ឋអាមេរិក ត្រូវបានសំរេចផ្អាកប្រតិបត្តិការរបស់ខ្លួននៅកម្ពុជា និងបិទការិយាល័យទាំងស្រុង នេះបើតាមសេចក្ដីថ្លែងការណ៍របស់វិទ្យុនេះ ដែលត្រូវបានផ្សព្វផ្សាយកាលពីល្ងាចថ្ងៃទី១២ កញ្ញា ឆ្នាំ២០១៧ កន្លងទៅ ។
នៅវេលាព្រឹកថ្ងៃទី១៥ វិច្ឆិកា នេះ កម្លាំងចម្រុះខណ្ឌមានជ័យ រួមទាំងមន្ទីរ ក្រសួងពាក់ព័ន្ធ នឹងចុះទៅពិនិត្យបន្ទប់ជួលជនសង្ស័យម្តងទៀត ដើម្បីពិនិត្យរកការពិតដូចដែលកម្លាំងអាជ្ញាធរសង្ស័យថា បានលួចលាក់ផ្សព្វផ្សាយព័ត៌មានដោយខុស
ច្បាប់ ៕
ចែករំលែកព័តមាននេះ