ខេត្តពោធិ៍សាត់ ៖ នៅសាលប្រជុំស្ថានីយវិទ្យុនិងទូរទស្សន៍ខេត្ត កាលពីព្រឹកថ្ងៃទី២៥ ខែធ្នូ ឆ្នាំ២០២៥ ឯកឧត្តម ស៊ុម វឌ្ឍនៈ អនុរដ្ឋលេខាធិការក្រសួងព័ត៌មាន…
ខេត្តពោធិ៍សាត់ ៖ នៅសាលប្រជុំស្ថានីយវិទ្យុនិងទូរទស្សន៍ខេត្ត កាលពីព្រឹកថ្ងៃទី២៥ ខែធ្នូ ឆ្នាំ២០២៥ ឯកឧត្តម ស៊ុម វឌ្ឍនៈ អនុរដ្ឋលេខាធិការក្រសួងព័ត៌មាន ដោយមានការចូលរួមពីលោក ញឹក បានខេង អភិបាលរងខេត្ត បានអញ្ជើញជាអធិបតីភាពក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅបន្តសម្រាប់អនុវត្តការងារឆ្នាំ២០២៦ របស់មន្ទីរព័ត៌មានខេត្ត ។
លោក លាង ទិតដ្ឋាន ប្រធានមន្ទីរព័ត៌មានខេត្ត បានរាយការណ៍ជូនអំពីលទ្ធផលការងារឆ្នាំ២០២៥ ដែលសម្រេចបានក្នុងរយៈពេលពេញមួយឆ្នាំកន្លងមកនេះ ជាពិសេសការផ្សព្វផ្សាយព័ត៌មានបានទាន់ហេតុការណ៍ និងការគ្រប់គ្រងសន្តិសុខព័ត៌មានក្នុងខេត្តពោធិ៍សាត់ ។ ទិសដៅឆ្នាំ២០២៦ គឺរៀបចំផែនការយុទ្ធសាស្ត្រថ្មីៗ ដើម្បីពង្រឹងគុណភាពព័ត៌មាន បណ្តុះបណ្តាលសមត្ថភាពមន្ត្រី និងពង្រីកកិច្ចសហការជាមួយអ្នកសារព័ត៌មានក្នុងមូលដ្ឋាន ។
លោក ញឹម បានខេង អភិបាលរងខេត្ត បានមានប្រសាសន៍កោតសរសើរនិងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការនៃមន្ទីរព័ត៌មានខេត្ត ដែលបានបំពេញភារកិច្ចយ៉ាងសកម្ម ក្នុងការនាំយកព័ត៌មានពិត ពីសកម្មភាពអភិវឌ្ឍន៍របស់ខេត្តទៅកាន់សាធារណជនបានយ៉ាងរហ័ស និងទាន់សភាពការណ៍ ។ លោកបញ្ជាក់ថា ព័ត៌មានគឺជាស្ពានចម្លងដ៏សំខាន់រវាងរដ្ឋបាលខេត្តនិងប្រជាពលរដ្ឋ ក្នុងការចូលរួមចំណែករក្សាសន្តិសុខ សណ្តាប់ធ្នាប់ និងការអភិវឌ្ឍមូលដ្ឋាន ។
លោកអភិបាលរងខេត្ត បានផ្តល់នូវអនុសាសន៍គន្លឹះមួយចំនួនសម្រាប់ទិសដៅការងារឆ្នាំ២០២៦ គឺបន្តពង្រឹងសមត្ថភាពមន្ត្រីនិងអ្នកសារព័ត៌មានឱ្យប្រកាន់ខ្ជាប់នូវក្រមសីលធម៌វិជ្ជាជីវៈ ផ្សាយតែព័ត៌មានពិត ចៀសវាងការផ្សាយព័ត៌មានក្លែងក្លាយ ដែលបង្កឱ្យមានភាពវឹកវរក្នុងសង្គម ។ បន្តការផ្សព្វផ្សាយតាមប្រព័ន្ធឌីជីថលឱ្យកាន់តែទូលំទូលាយ ដើម្បីឆ្លើយតបទៅនឹងការរីកចម្រើននៃបច្ចេកវិទ្យាទំនើបនាពេលបច្ចុប្បន្ន ព្រមទាំងបន្តពង្រឹងសាមគ្គីភាពផ្ទៃក្នុង និងកិច្ចសហការល្អជាមួយមន្ទីរអង្គភាពជុំវិញខេត្ត ដើម្បីប្រមូលព័ត៌មានឱ្យបានគ្រប់ជ្រុងជ្រោយ ។
ឯកឧត្តម ស៊ុម វឌ្ឍនៈ បានកោតសរសើរចំពោះកិច្ចខិតខំប្រឹងប្រែងរបស់មន្ទីរព័ត៌មានខេត្តនាពេលកន្លងមក ។ ជាមួយគ្នានេះ ឯកឧត្តមបានផ្តល់អនុសាសន៍ឱ្យមន្ត្រីព័ត៌មានទាំងអស់ បង្កើនសមត្ថភាពក្នុងការកែច្នៃព័ត៌មានឱ្យកាន់តែសម្បូរបែបនិងទាក់ទាញ ប៉ុន្តែត្រូវរក្សាឱ្យបាននូវ «ការពិត» និង «ក្រមសីលធម៌» ដើម្បីក្លាយជាប្រភពព័ត៌មានដែលប្រជាពលរដ្ឋទុកចិត្ត និងឆ្លើយតបបានទាន់ពេលវេលាទៅនឹងសេចក្តីត្រូវការរបស់សង្គម ។
ឯកឧត្តម បានផ្ដាំផ្ញើដល់មន្ត្រីព័ត៌មានទាំងអស់ត្រូវបន្តធ្វើជាសេនាធិការដ៏រឹងមាំជូនក្រសួងព័ត៌មាននិងរដ្ឋបាលខេត្ត ដោយត្រូវចេះកែច្នៃព័ត៌មានឱ្យមានភាពទាក់ទាញ មានខ្លឹមសារអប់រំនិងឆ្លុះបញ្ចាំងពីការពិត ដើម្បីបម្រើផលប្រយោជន៍ជាតិ និងប្រជាជនឱ្យកាន់តែប្រសើរឡើងព្រមទាំងបន្តខិតខំបំពេញភារកិច្ច ប្រកាន់ខ្ជាប់នូវក្រមសីលធម៌វិជ្ជាជីវៈ ដើម្បីជាប្រយោជន៍ដល់សង្គមជាតិ និងប្រជាជន ។
ក្នុងឱកាសនោះ ឯកឧត្តម ស៊ុម វឌ្ឍនៈ បានឧបត្ថម្ភថវិកាចំនួន១០០ដុល្លារសហរដ្ឋអាមេរិក ចូលរួមជួយដល់កងទ័ពនិងប្រជាជនភៀសសឹក តាមរយៈលោក ញឹក បានខេង អភិបាលរងខេត្តផងដែរ៕
ចែករំលែកព័តមាននេះ