ខេត្តមណ្ឌលគិរី ៖ ដើម្បីបញ្ជៀសការចែកចាយព័ត៌មានមិនពិតធ្វើឲ្យប៉ះពាល់ដល់សុវត្ថិភាពសង្គម ស្មារតីសាមគ្គីភាព និងសណ្តាប់ធ្នាប់សាធារណៈ មន្ទីរព័ត៌មានខេត្តមណ្ឌលគិរី នាថ្ងៃទី២៥ ខែធ្នូ ឆ្នាំ២០២៥ បានសហការជាមួយអាជ្ញាធរស្រុកកែវសីមា…
ខេត្តមណ្ឌលគិរី ៖ ដើម្បីបញ្ជៀសការចែកចាយព័ត៌មានមិនពិតធ្វើឲ្យប៉ះពាល់ដល់សុវត្ថិភាពសង្គម ស្មារតីសាមគ្គីភាព និងសណ្តាប់ធ្នាប់សាធារណៈ មន្ទីរព័ត៌មានខេត្តមណ្ឌលគិរី នាថ្ងៃទី២៥ ខែធ្នូ ឆ្នាំ២០២៥ បានសហការជាមួយអាជ្ញាធរស្រុកកែវសីមា ចុះផ្សព្វផ្សាយយ៉ាងទូលំទូលាយអំពីយុទ្ធនាការ «និយាយថាទេ ចំពោះព័ត៌មានក្លែងក្លាយ (Fake News)»។
យុទ្ធនាការអប់រំនេះត្រូវបានរៀបចំឡើងជាពីរទីតាំងសំខាន់ៗ រួមមាន សិស្សានុសិស្សនៃវិទ្យាល័យ ហ៊ុន សែន កែវសីមា និងមន្ត្រីរាជការនៃសាលាស្រុកកែវសីមា ។ ក្នុងឱកាសនោះមន្ត្រីជំនាញ នៃមន្ទីរព័ត៌មាន និងអាជ្ញាធរមូលដ្ឋាន បានលើកឡើងអំពីផលប៉ះពាល់ធ្ងន់ធ្ងរនៃការផ្សព្វផ្សាយ និងជឿតាមព័ត៌មានមិនពិត ជាពិសេសនៅលើបណ្ដាញសង្គម។ការផ្តោតសំខាន់ គឺរបៀបសម្គាល់អត្តសញ្ញាណនៃព័ត៌មានក្លែងក្លាយ ដោយពន្យល់ពីលក្ខណៈសម្គាល់មួយចំនួន ដូចជាប្រភពមិនច្បាស់លាស់ ការប្រើប្រាស់ចំណងជើងទាក់ទាញហួសហេតុ និងការបង្កាច់បង្ខូចកិត្តិយសអ្នកដទៃ។
ការអប់រំ ជំរុញឱ្យប្រជាពលរដ្ឋ សិស្សានុសិស្ស និងមន្ត្រីរាជការ ចេះពិចារណា ផ្ទៀងផ្ទាត់ព័ត៌មាន មុននឹងសម្រេចចិត្តចែកចាយបន្ត ។ ការដាស់តឿន ពីទោសទណ្ឌផ្លូវច្បាប់ ចំពោះការផ្សព្វផ្សាយព័ត៌មានបង្កចលាចល ប៉ះពាល់ដល់សន្តិសុខជាតិ ស្ថិរភាពនយោបាយ និងកិត្តិយសរបស់បុគ្គល ឬស្ថាប័ន។
យុទ្ធនាការនេះបានរួមចំណែកយ៉ាងសកម្មក្នុងការពង្រឹងចំណេះដឹងឌីជីថល (Digital Literacy) របស់ប្រជាពលរដ្ឋនិងបានផ្សព្វផ្សាយនូវសារអប់រំដ៏សំខាន់ថា មុននឹងចុចចែករំលែក (Share) សូមចំណាយដើម្បីពិចារណា និងផ្ទៀងផ្ទាត់ ។ និយាយថាទេ ចំពោះព័ត៌មានក្លែងក្លាយ គឺការចូលរួមថែរក្សាសុវត្ថិភាពសង្គមរបស់យើង ៕
ចែករំលែកព័តមាននេះ