ខេត្តបាត់ដំបង ៖ គ្រួសារមួយបានប្រទះឃើញបំណែកឆ្អឹងជាច្រើន និងបំណែកក្រឡ ដែលធ្វើអំពីដីដុត ពេលដែលគ្រួសារគាត់កំពុងជីករណ្ដៅធ្វើត្រង់សេនៅខាងក្រោយផ្ទះ កាលពីព្រឹកថ្ងៃទី២៥ ធ្នូ នៅក្នុងភូមិអូរស្រឡៅ ឃុំអូរដំបង១…
ខេត្តបាត់ដំបង ៖ គ្រួសារមួយបានប្រទះឃើញបំណែកឆ្អឹងជាច្រើន និងបំណែកក្រឡ ដែលធ្វើអំពីដីដុត ពេលដែលគ្រួសារគាត់កំពុងជីករណ្ដៅធ្វើត្រង់សេនៅខាងក្រោយផ្ទះ កាលពីព្រឹកថ្ងៃទី២៥ ធ្នូ នៅក្នុងភូមិអូរស្រឡៅ ឃុំអូរដំបង១ ស្រុកសង្កែ ដែលចោមរោមមើលដាក់ការសង្ស័យថា ជា«កំណប់ឆ្អឹង និងក្រឡ ដែលកប់ក្នុងដីតាំងពីមនុស្សសម័យបុរាណ» ។
គិតត្រឹមថ្ងៃទី២៦ ធ្នូ នេះ គេមិនទាន់ឃើញមានមន្ត្រីជំនាញ ឬមន្ត្រីមូលដ្ឋានចុះទៅពិនិត្យវត្ថុប្លែកៗដែលគ្រួសារខាងលើនេះ ជីកដីប្រទះឃើញនោះនៅឡើយទេ ។ អ្នកស្រី ថាំង ឡេក អាយុ៦២ឆ្នាំ បានប្រាប់កោះសន្តិភាពថា កូនចៅគាត់បានប្រទះឃើញ បំណែកឆ្អឹង និងបំណែកក្រឡបុរាណទាំងនោះនៅពេលជីករណ្ដៅធ្វើត្រង់សេ ។ អ្នកស្រីនិយាយថា វត្ថុទាំងនោះ បានប្រទះឃើញក្នុងជម្រៅដីប្រហែល១ម៉ែត្រនៅខាងក្រោយផ្ទះគាត់ ដែលមានប្រវត្តិរស់នៅតកូនតចៅច្រើនជំនាន់មកហើយ ។
គាត់បញ្ជាក់ថា អ្នកជីកដីបានរកឃើញបំណែកឆ្អឹង ដែលស្រដៀងនឹងឆ្អឹងមនុស្ស រីឯឆ្អឹងខ្លះទៀត ស្រដៀងទៅនឹងថ្គាម ឬធ្មេញសត្វដំរី ហើយថែមទាំងរកឃើញមានបំណែកឆ្អឹងលលាដ៍ក្បាលទៀតផង ដែលមានកម្រាស់ក្រាស់ៗ ។ គាត់បានបន្ថែមថា ឆ្អឹងខ្លះរកឃើញនៅក្នុងក្រឡដែលបែកខ្ទេចខ្ទាំ និងខ្លះទៀតជីកឃើញរាយប៉ាយនៅក្នុងដីក្បែរៗគ្នានោះ ។ បើនិត្យជាក់ស្ដែង លើវត្ថុដែលរកឃើញក្នុងដីខាងលើនេះ គេឃើញមានបំណែកក្រឡដូចធ្វើអំពីដីដុត បំណែកឆ្អឹងដូចឆ្អឹងស្មងជើងមនុស្ស តែមានទំហំធំជាងបន្តិច មានឆ្អឹងច្រើនដុំ ដែលស្រដៀងទៅនឹងថ្គាម ឬធ្មេញសត្វដំរី និងមានបំណែកចម្លែកៗជាច្រើនដុំទៀត ពណ៌ក្រម៉ៅហើយធ្ងន់ស្រដៀងទៅនឹងដុំថ្ម ដែលគេមិនអាចសន្និដ្ឋានបានថា ជាវត្ថុអ្វីឡើយ ។
អ្នកភូមិដែលចោមរោមពិនិត្យមើលបំណែក ដែលគេសង្ស័យជា «កាកសំណល់ពីមនុស្សសម័យបុរាណ» នោះ បានលើកឡើងប្រហាក់ប្រហែលគ្នាថា «វត្ថុទាំងនេះ អាចកប់ក្នុងដីរាប់រយឆ្នាំកន្លងមកហើយ មិនមែនទើបកើតមាននៅក្នុងសម័័យកាលនេះទេ» ។ ពលរដ្ខខ្លះបាននិយាយថា កន្លងទៅនេះ ដីនៅតំបន់នោះ ជាពិសេស នៅក្បែរៗ«អូរស្រឡៅ»អ្នកភូមិធ្លាប់ជីកដីចាក់គ្រឹះធ្វើផ្ទះប៉ះចំណែកបុរាណបែបនេះ ច្រើនកន្លែងហើយ តែពុំមាននរណាបានដឹងថា វាជាអ្វីទេ ។
ហើយក៏មិនធ្លាប់ឃើញមន្ត្រីជំនាញ ឬមន្ត្រីក្នុងមូលដ្ឋានចុះពិនិត្យ ឬសួរនាំមួយម៉ាត់ម្ដងណាដែរ ។ អ្នកភូមិបានបញ្ជាក់ថា «ដីនៅតំបន់ភូមិអូរស្រឡៅ ជាដីភូមិចាស់ដែលមានសម័យដើមធ្លាប់រស់នៅ ទើបមានកាកសំណល់បុរាណកប់សល់ក្នុងដីបែបនេះ» ។ បើនិយាយពីប្រវត្តិដីដែលជីករណ្ដៅធ្វើត្រង់សេប្រទះឃើញបំណែកឆ្អឹងខាងលើនេះ បើតាមអ្នកស្រី ថាំង ឡេក បានលើកឡើងដូច្នេះថា «ដីផ្ទះរបស់ខ្ញុំនេះ ជាកេរ្តិ៍ដំណែលដូនតា ច្រើនជំនាន់ហើយ ។ ខ្ញុំមិនដែលជីកកកាយ ឬចាក់ដីលុបបន្ថែមទេ ។ ខ្ញុំគ្រាន់តែកាប់គាស់ផ្នែកខាងលើៗដាំដំណាំ ។ ប៉ុន្តែនៅថ្ងៃទី២៥ ធ្នូ ដោយឃើញកប៉ាល់ហោះថៃ ហោះឆ្វែលពីលើញឹកញាប់ ថែមទាំងមានទម្លាក់គ្រាប់បែកផ្ទុះលាន់កក្រើកដីនៅស្រុកបាណន់ផង ទើបខ្ញុំប្រាប់ឲ្យកូនៗ នាំគ្នាជីកដីខាងក្រោយផ្ទះធ្វើត្រង់សេ ហើយក៏ប្រទះឃើញបំណែកឆ្អឹង និងបំណែកក្រឡចាស់ៗទាំងនោះ» ។
អ្នកស្រី ថាំង ឡេក បាននិយាយបន្ថែមថា គាត់សង្ស័យរបស់របរដូចវត្ថុបុរាណទាំងនេះ អាចមានសេសសល់ច្រើនទៀត នៅក្នុងដីរបស់គាត់ ។ ព្រោះកូនៗគាត់ជីកដីទៅឃើញមាននៅរាយប៉ាយពាសពេញរណ្ដៅត្រង់សេ ហើយពួកគេបានប្រមូលយកមករក្សាទុក ក្រែងមានមន្ត្រីជំនាញ ឬអាជ្ញាធរណាចុះមកត្រូតពិនិត្យ ។
ពេលនេះ កូនៗរបស់គាត់បានយកវត្ថុទាំងនោះទៅលាងទឹកឲ្យស្អាត ដើម្បីរក្សាទុកហើយ ។ ប៉ុន្តែយ៉ាងណា ទាំងអ្នកជីករណ្ដៅត្រង់សេ ទាំងអ្នកភូមិដែលបានទៅពិនិត្យបំណែកឆ្អឹង និងបំណែកក្រឡនោះមិនទាន់ហានសន្និដ្ឋានជាក់លាក់ថា វាជាអ្វី ? ជាឆ្អឹងមនុស្ស ឬឆ្អឹងសត្វ ? ហើយវាជាកាកសំណល់របស់មនុស្សបុរាណ ឬយ៉ាងណានោះទេ ? គេគ្រាន់តែប្រហាក់ប្រហែលថា «វត្ថុទាំងនោះ អាចជារបស់មនុស្សជំនាន់ដើម ដែលរស់នៅតំបន់នោះរាប់រយឆ្នាំកន្លងមកហើយ ព្រោះបំណែកឆ្អឹងខ្លះ ត្រូវបានដាក់ក្នុងក្រឡ រួចកប់ចោលក្នុងដីចម្រៅដល់ទៅ១ម៉ែត្រ» ៕
ចែករំលែកព័តមាននេះ