រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងសមត្ថកិច្ចប៉ុស្តិ៍រដ្ឋបាលនគរបាលបឹងទំពុនទី១ ធ្វើការឃាត់ខ្លួន ក្រោយពីធ្វើសកម្មភាពរំលោភសេពសន្ថវៈលើក្មេងស្រីអាយុ១១ឆ្នាំម្នាក់ ហេតុការណ៍កើតឡើងកាលពីវេលាល្ងាចថ្ងៃទី០៧ ខែវិច្ឆិកា ឆ្នាំ២០១៧ នៅចំណុចបន្ទប់ផ្ទះជួលមួយកន្លែង ស្ថិតក្នុងភូមិសន្សំ៥ សង្កាត់បឹងទំពុន១ ខណ្ឌមានជ័យ ។
ជនសង្ស័យឈ្មោះ នុំ ចាន់ណាក់ ភេទប្រុស អាយុ៣៥ឆ្នាំ មុខរបរមិនពិតប្រាកដ ស្នាក់នៅកន្លែងកើតហេតុខាងលើ ។ ជនសង្ស័យជាមុខសញ្ញាជាប់ពន្ធនាគារ និងប្រើប្រាស់ថ្នាំញៀនយ៉ាងសកម្ម ។
ប្រភពព័ត៌មានឲ្យដឹងថា នៅវេលាល្ងាចថ្ងៃទី០៧ ខែឆ្នាំខាងលើក្មេងស្រីរងគ្រោះបានចេញមករត់លេងនៅខាងក្រៅបន្ទប់ផ្ទះជួលជាមួយក្មេងៗក្នុងភូមិ២ទៅ៣នាក់ផ្សេងទៀត ។ លុះមួយសន្ទុះក្រោយមកក្មេងៗទាំងនោះបានត្រឡប់ទៅផ្ទះវិញអស់ ។ ជនសង្ស័យខាងលើឃើញក្មេងស្រីរងគ្រោះឈរតែម្នាក់ឯង ក៏ចាប់ខ្ទប់មាត់ចូលក្នុងបន្ទប់ផ្ទះជួលអ្នកជិតខាងក្បែរនោះ ធ្វើសកម្មភាពរំលោភសេពសន្ថវៈដោយប្រើដៃលេងប្រដាប់ភេទក្មេងស្រីរងគ្រោះ បណ្តាលឲ្យហូរឈាមពេញបន្ទប់រងរបួសធ្ងន់ធ្ងរ ។ ភ្លាមៗបន្ទាប់ពីរំលោភរួច ក្មេងស្រីបានរត់ចេញមកក្រៅស្រែកឲ្យគេឯងជួយ បង្កការភ្ញាក់ផ្អើលដល់អ្នកក្បែរនោះជួយនាំទៅមន្ទីរពេទ្យ និងខលទូរស័ព្ទទំនាក់ទំនងទៅកាន់អាណាព្យាបាលមកជួយមើលកូនស្រីផងដែរ ។ ដោយឡែកជនសង្ស័យ ក្រោយធ្វើសកម្មភាពរួច បានរត់គេចបាត់ស្រមោលតាំងពីល្ងាចថ្ងៃកើតហេតុ លុះវេលាព្រឹកឡើងជនរូបនោះបានត្រឡប់មកផ្ទះវិញ ក៏ត្រូវកម្លាំងនគរបាលមូលដ្ឋានចុះធ្វើការឃាត់ខ្លួនតែម្តង ។
ចំណែកក្មេងស្រីរងគ្រោះ កំពុងស្ថិតក្នុងការសង្គ្រោះបន្ទាន់នៅមន្ទីរពេទ្យឯកជនមួយ ដោយសារនាងត្រូវរងរបួសទ្វារមាសធ្ងន់ធ្ងរខ្លាំង ។
បច្ចុប្បន្នជនសង្ស័យត្រូវឃុំខ្លួនបណ្តោះអាសន្ននៅប៉ុស្តិ៍រដ្ឋបាលនគរបាលបឹងទំពុន១ រង់ចាំកសាងសំណុំរឿងបញ្ចូនទៅតុលាការចាត់ការតាមនីតិវិធីច្បាប់ ៕
ចែករំលែកព័តមាននេះ