ខេត្តកំពង់ចាម ៖ ក្រោមការកែច្នៃប្រឌិតរបស់អាជ្ញាធរស្រុកបានប្រែក្លាយទំនប់៥កុម្ភះស្ថិតនៅក្រោយវត្តទួលឡូវ ក្នុងឃុំស្វាយទាប ស្រុកចំការលើ ទៅជាកន្លែងដែលមានសោភ័ណភាពគួរឲ្យចាប់អារម្មណ៏ ។ ជាមួយនោះនៅថ្ងៃទី០២ រហូតដល់ទី០៤ ខែវិច្ឆិកា…
ខេត្តកំពង់ចាម ៖ ក្រោមការកែច្នៃប្រឌិតរបស់អាជ្ញាធរស្រុកបានប្រែក្លាយទំនប់៥កុម្ភះស្ថិតនៅក្រោយវត្តទួលឡូវ ក្នុងឃុំស្វាយទាប ស្រុកចំការលើ ទៅជាកន្លែងដែលមានសោភ័ណភាពគួរឲ្យចាប់អារម្មណ៏ ។ ជាមួយនោះនៅថ្ងៃទី០២ រហូតដល់ទី០៤ ខែវិច្ឆិកា ឆ្នាំ២០១៧ បានបង្កើតព្រឹត្តិការសប្បាយៗដោយមានការប្រណាំងទូកង និងទារទឹកមានប្រជាពលរដ្ឋមកលេងកំសាន្តច្រើនកុះករមទាំងមានការស្នើសុំឲ្យមានការរៀបចំកម្មវិធីបែបនេះរៀងរាល់ឆ្នាំផងដែរ ។
លោក សុខ គីមសេង អាយុ៥៤ឆ្នាំ នៅភូមិតាំងក្រង ឃុំស្វាយទាប ប្រាប់ឲ្យដឹងនៅល្ងាចថ្ងៃទី០៤ ខែវិច្ឆិកា ឆ្នាំ២០១៧ ថាពីមុននៅក្រោយវត្តទួលឡូវពិតជាមានទំនប់ពោរពេញទៅដោយកំប្លោកច្រើនមែនតែក្រោយមកត្រូវបានអាជ្ញាធរបានសហការជាមួយនឹងចៅអធិការវត្តបានកែច្នៃប្រឌិតដោយបានចាក់បេតុងដើម្បីស្តុកទឹកទំនប់មិនឲ្យហូរចោល និងមានទឹកក្នុងទំនប់កាន់តែច្រើន ព្រមទាំងបានចាក់ផ្លូវបេតុងមានរៀបចំកន្លែងលក់ដូរជាច្រើនកន្លែងមានដាំដើមត្នោត ពិតជាមានភាពស្រស់ស្អាតមែន ។ លោកបន្តថា កន្លងមកពេលដែលមានការរៀបចំពិធីបុណ្យអ៊ុំទូក អកអំបុក និងសំពះព្រះខែបើចង់មើលគេប្រណាំងទូកងត្រូវតែធ្វើដំណើរទៅកាន់រាជធានីភ្នំពេញឯណោះ ព្រមទាំងមានការចំណាយសោហ៊ុយច្រើនថែមទៀត តែបើសម្រាប់អ្នកក្រវិញមិនអាចទៅមើលបាននោះទេ ។ តែមកដល់ឆ្នាំ២០១៧នេះអាជ្ញាធរស្រុកបានរៀបចំប្រណាំងទូកង និងទារទឹក មានរយៈពេលដល់ទៅ០៣ថ្ងៃគឺចាប់ផ្តើមពីថ្ងៃទី០២ដល់ទី០៤ ខែវិច្ឆិកា ឆ្នាំ២០១៧ មានអ្នកស្រុក និងអ្នកចំងាយបាននាំគ្នាមកលេងកំសាន្តច្រើនកុះករត្រង់ទំនប់០៥កុម្ភះខាងលើ ចំពោះរូបលោកផ្ទាល់នៅថ្ងៃបង្ហើយទី០៤ ខែវិច្ឆិកា ឆ្នាំ២០១៧ បាននាំសាច់ញាតិជាច្រើននាក់មកលេងឃើញថា ពិតជាសប្បាយមែន ។ រូបគាត់ផ្ទាល់ក៏ដូចជាអ្នកផ្សេងចង់ឲ្យមានការរៀបចំប្រណាំងទូកងក្នុង១ឆ្នាំមាន៣ដងក្នុងនោះមាន១-ពេលបុណ្យចូលឆ្នាំប្រពៃណីជាតិខ្មែរ, ២-ភ្ជុំបិណ្ឌ និង៣-បុណ្យអ៊ុំទូក អកអំបុក និងសំពះព្រះខែ ហើយសូមឲ្យមានព្រឹត្តិការបែបនេះ ជារៀងរាល់ឆ្នាំផងដែរ ។
លោកវរសេនីយ៏ឯក ខេង ស្រេង អធិការនគរបាលស្រុកចំការលើវិញប្រាប់ឲ្យដឹងដែរថា ដោយមានការយកចិត្តទុកដាក់របស់លោក ខ្លូត ចិន្តា អភិបាលស្រុកចំការលើបានប្រែក្លាយទំនប់០៥កុម្ភះដែលស្ថិតនៅភូមិថ្នល់បែកកើត ឃុំស្វាយទាប ស្រុកចំការលើ ទៅជាតំបន់ទេសចរណ៏មួយ និងមានការរៀបចំប្រណាំងទូកង និងទារទឹកសម្រាប់ឲ្យពលរដ្ឋកំសាន្តលេង ។ ដោយមិនបាច់ចំណាយការធ្វើដំណើរនៅកន្លែងឆ្ងាយត្បិតនៅថ្ងៃទី០២ដល់ទី០៤ ខែវិច្ឆិកា ឆ្នាំ២០១៧ មានទូកងតែចំនួន៤នោះទេហើយឆ្នាំខាងមុខអាជ្ញាធរស្រុកនឹងប្រឹងប្រែងចំនួនទូកឲ្យកាន់តែច្រើនជាងនេះហើយមានប្រជាពលរដ្ឋមកកំសាន្តលេងខ្ទង់ម៉ឺននាក់ ចំណែកការពង្រឹងសន្តិសុខ និងសណ្តាប់ធ្នាប់វិញបានល្អប្រសើរផងដែរ ៕
ចែករំលែកព័តមាននេះ