រាជធានីភ្នំពេញ ៖ ខណៈពេលការប្រកួតកីឡាយានយន្តឆ្លងកាត់ឧបសគ្គដ៏ធំមិនធ្លាប់មានពីមុនមកនៅសល់ពេលជាង១ខែទៀតនឹងមកដល់ អ្នករៀបចំកម្មវិធីប្រកួតបានរៀបចំឱ្យមានកម្មវិធីពន្យល់ណែនាំទុកឱ្យហើយដល់អ្នកដែលមានបំណងចង់ចូលរួមប្រកួត ពីអ្នកជំនាញមកពីបរទេស ដើម្បីឱ្យពួកគេចេះមើលផែនទីបង្ហាញផ្លូវដោយខ្លួនឯងកុំឱ្យវង្វេង ។ កម្មវិធីនេះធ្វើឡើងនៅភោជនីយដ្ឋានមួយក្នុងខណ្ឌដូនពេញទល់មុខក្រសួងអប់រំ យុវជន និងកីឡា ។
តាមការឱ្យដឹងពីអ្នករៀបចំកម្មវិធីឱ្យដឹងថា ការប្រណាំងយានយន្តនេះធ្វើឡើងចាប់ពីថ្ងៃទី៩ដល់ថ្ងៃទី១១ ធ្នូ ឆ្នាំ២០១៧ ប៉ុន្តែអ្នកចូលរួមទាំងអស់តម្រូវឱ្យធ្វើដំណើរទៅដល់ទីកន្លែងឯខេត្តមណ្ឌលគិរីនៅថ្ងៃទី៨ ធ្នូ ។ ការប្រកួតនេះមានរថយន្តប្រហែល២០គ្រឿង និងម៉ូតូប្រហែល៣០គ្រឿងរួមជាមួយកីឡាករបរទេសចូលរួមច្រើន ។ តាមការឱ្យដឹងបន្ថែមនេះគឺជាលើកទី១ប៉ុណ្ណោះដែលកម្ពុជាយើងរៀបចំឱ្យមានព្រឹត្តិការណ៍ប្រកួតនេះឡើង ប៉ុន្តែនៅប្រទេសជិតខាងដូចជាប្រទេសថៃគេបានរៀបចំធ្វើឡើងជាង២០ឆ្នាំមកហើយ ។ ការប្រកួតនេះរៀបចំឡើងដោយអ្នកជំនាញកីឡាយានយន្ត KARA ក្រោមការឧបត្ថម្ភពីសហព័ន្ធកីឡាយានយន្តកម្ពុជា ។
នៅក្នុងកម្មវិធីណែនាំរយៈពេលជាងមួយម៉ោងនេះ អ្នកជំនាញបានពន្យល់ពួកគាត់ឱ្យយល់ច្បាស់អំពីរបៀបគិតទុកមុន តាមរយៈនៃការមើលផែនទីបង្ហាញផ្លូវដោយខ្លួនឯង មិនមែនដូចជាការប្រណាំងម៉ូតូCrossដែលមានស្លាកសញ្ញាបង្ហាញផ្លូវស្រាប់នោះទេ ។ ដូច្នេះហើយទើបអ្នកជំនាញត្រូវការទុកពេលឱ្យយូរធ្វើយ៉ាងណាត្រូវតែព្យាយាមមើលផែនទីដែលគណៈកម្មការរៀបចំការប្រកួតប្រគល់ឱ្យ ចាប់ពីពេលនេះទៅដើម្បីឱ្យមានការចំណាំច្បាស់ចំពោះផ្លូវដែលត្រូវជិះប្រណាំង ។ មន្ត្រីរៀបចំការប្រកួតបានឱ្យដឹងទៀតថា គោលបំណងសំខាន់ដែលរៀបចំឱ្យមានការប្រកួតនេះឡើង ដើម្បីជំរុញឱ្យវិស័យកីឡាយានយន្តនៅកម្ពុជាមានការរីកចម្រើនថែមទៀត ព្រោះថានេះជាព្រឹត្តិការណ៍នៃការប្រកួតលើកទី១នៅកម្ពុជា ដូច្នេះក្រុម KARAគេមានបំណងចង់ឱ្យអ្នកដែលស្រឡាញ់វិស័យកីឡាយានយន្តចូលរួមប្រកួតឱ្យបានកាន់តែច្រើន ។វិស័យកីឡាប្រណាំងយានយន្តបែបនេះនៅស្រុកគេមានការរីកចម្រើនខ្លាំងណាស់ ។ ដូច្នេះយើងចង់ឱ្យមានការរីកចម្រើនដូចនៅប្រទេសជិតខាងអញ្ចឹងដែរ ។
តាមការឱ្យដឹងបន្ថែមពីអ្នករៀបចំកម្មវិធីឱ្យដឹងថា ការប្រកួតនេះនឹងត្រូវរៀបចំធ្វើឡើងមួយឆ្នាំម្ដង និងលើកយកទៅធ្វើឱ្យបានគ្រប់ខេត្តតែម្ដង ។ សម្រាប់អ្នកដែលចង់ចូលរួមប្រកួតរថយន្តដែលមានគ្នា២នាក់ត្រូវបង់ថ្លៃប្រកួត១២០ដុល្លារនិងម៉ូតូ៥០ដុល្លារ ដែលគិតរហូតមកទល់ពេលនេះមានអ្នកមកចុះឈ្មោះចូលរួមប្រកួតជាបណ្ដើរៗហើយ ៕
ចែករំលែកព័តមាននេះ