ខេត្តពោធិ៍សាត់ ៖ បុរសវ័យកណ្ដាលម្នាក់ត្រូវរថយន្ដបុកបែកក្បាលហូរឈាម និងបាក់ជើងម្ខាង ខណៈជិះកង់ឆ្លងថ្នល់មិនមានការប្រុងប្រយ័ត្ន កាលពីវេលាម៉ោង១៦និង៥៥នាទីរសៀល ថ្ងៃទី២៧ ខែតុលា ឆ្នាំ២០១៧ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ២១២ ២១៣ ស្ថិតក្នុងភូមិដើមច្រេស ឃុំបឹងខ្នារ ស្រុកបាកាន ខេត្តពោធិ៍សាត់ ។
សមត្ថកិច្ចមូលដ្ឋានឲ្យដឹងថា ជនរងគ្រោះឈ្មោះ សឿន សេន ភេទប្រុស អាយុ៤១ឆ្នាំជាជាងជួសជុលរថយន្ដនៅភូមិបឹងខ្នារ ឃុំបឹងខ្នារ ស្រុកបាកាន ។ បែកក្បាលហូរឈាម និងបាក់ជើងខាងស្ដាំ បណ្ដាលឲ្យរងរបួសយ៉ាងធ្ងន់ធ្ងរបំផុត ដែលអ្នកទៅឈរមើលពុំមានអ្នកណាសង្ឃឹមរស់នោះឡើយ ។
ប្រជាពលរដ្ឋដែលឃើញហេតុការណ៍បានប្រាប់សមត្ថកិច្ចឲ្យដឹងថា មុនដំបូងជនរងគ្រោះជិះកង់ចេញពីផ្លូវកៅស៊ូផ្សារបឹងខ្នារពីត្បូងទៅជើងហើយ បានឆ្លងផ្លូវជាតិលេខ៥ដោយពុំបានមើលឆ្វេងមើលស្ដាំ ។ ខណៈនោះស្រាប់តែមានរថយន្តមួយគ្រឿងប្រភេទដឹងអ្នកដំណើរ ពណ៌ស ពាក់ស្លាកលេខ ភ្នំពេញ ២AK-៤២១៨ ធ្វើចរាចរក្នុងទិសដៅពីកើតទៅទិសលិច បានបុកយ៉ាងពេញទំហឹង បណ្ដាលឲ្យជនរងគ្រោះខ្ទាតចេញពីកង់បោកក្បាលនឹងថ្នល់សន្លប់ស្ដូកស្ដឹង ។ ឃើញហេតុការរន្ធត់បែបនេះ អ្នកបើកបរមិនស្គាល់អត្តសញ្ញាណទុករថយន្ដចោលគេចខ្លួនបាត់តែម្ដង ។ ជនរងគ្រោះបាក់ជើងខាងស្ដាំ និងរងរបួសត្រង់ក្បាលយ៉ាងធ្ងន់ធ្ងរបំផុត បានត្រូវសមត្ថកិច្ចបញ្ជូនទៅសង្គ្រោះនៅមន្ទីរពេទ្យបង្អែកខេត្តពោធិ៍សាត់ ដែលភាគច្រើនមិនសង្ឃឹមរស់នោះឡើយ ។
វត្ថុតាងកង់ និងរថយន្ត បានយកទៅរក្សាទុកជាបណ្ណោះអាសន្ន នៅប៉ុស្តិ៍នគរបាលរដ្ឋបាលបឹងខ្នារ ដើម្បីដោះស្រាយទៅតាមច្បាប់ចរាចរណ៍ផ្លូវគោក ៕
ចែករំលែកព័តមាននេះ