ខេត្តស្វាយរៀង ៖ ភ្លៀងផ្គរលាយឡំខ្យល់កន្ត្រាក់ បាក់រលំសង្កត់ពីលើរថយន្តទំនើប ១គ្រឿងជាប់ពីលើ ខណៈរថយន្តបើកបរចេញពីផ្សាររាត្រី បង្កឲ្យអ្នកនៅក្នុងរថយន្តភ័យស្លន់ស្លោ បើកទ្វាររថយន្តរត់ចេញមកទាំងព្រលឹងចុងសក់ ។
ករណីនេះ បានកើតឡើងនៅវេលាម៉ោង០៤និង១០នាទីរសៀលថ្ងៃទៅ១៦ ខែឧសភា ឆ្នាំ២០២៤ នៅខាងមុខផ្សាររាត្រី ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ។
បើតាមសមត្ថកិច្ចបានប្រាប់ឲ្យដឹងថា មុនពេលកើតហេតុ គេឃើញរថយន្តទំនើប១គ្រឿង ម៉ាកអាល់ហ្វាត ពណ៌ស ពាក់ស្លាកលេខភ្នំពេញ 2CA-3366 បើកបរដឹកភ្ញៀវចេញពីផ្សាររាត្រី លុះមកដល់ចំណុចកើតហេតុខាងលើ ស្រាប់តែប៉ាន់ណូ ផ្លាកយីហោផ្សាររាត្រី បានបាក់ដួលរលំសង្កត់ចំពីលើតែម្តង បង្កឲ្យអ្នកធ្វើដំណើរ មានការភ័យនាំគ្នារត់រកកន្លែងមានសុវត្ថិភាព ខណៈភ្លៀងផ្គរខ្យល់កន្ត្រាក់យ៉ាងខ្លាំង បក់បោកមកដល់ក្រុងបាវិត ហើយនៅតាមដងផ្លូវជាតិលេខ១ ក៏មានដួលរលំប៉ាន់ណូជាច្រើនទៀតផងដែរ ៕
![](https://kohsantepheapdaily.com.kh/wp-content/uploads/2024/05/6f435fde503c5568689d395716fddd36.jpg)
![](https://kohsantepheapdaily.com.kh/wp-content/uploads/2024/05/b62de3b2167259b6a9a511d5f1845b4e.jpg)
ចែករំលែកព័តមាននេះ