ខេត្តស្វាយរៀង ៖ អាជ្ញាធរស្រុករមាសហែកបានបង្ហាញតួលេខប្រជាពលរដ្ឋរងគ្រោះដោយសារគ្រាប់បែកគីមីពុលជិត១០០នាក់ ហើយគិតទាំងអាជ្ញាធរបញ្ជូនមក២១នាក់ នៅថ្ងៃទី២៦-២៧ ខែតុលា ឆ្នាំ២០១៧ ។
អាជ្ញាធរស្រុករមាសហែក បានបង្ហាញថា ចាប់តាំងពីថ្ងៃទី៥ ខែតុលា ឆ្នាំ២០១៧ រហូតដល់ថ្ងៃទី២៧ ខែនេះមានប្រជាពលរដ្ឋរងគ្រោះដោយសារគ្រាប់បែកគីមីអាមេរិកជិត១០០នាក់ហើយដែលរងគ្រោះ ។
លោក ស៊ូ ម៉ុល អភិបាលរងស្រុករមាសហែក បានប្រាប់ភ្នាក់ងារសារព័ត៌មានឲ្យដឹងថា ប្រជាពលរដ្ឋរងគ្រោះដោយការសាយភាយនៃគ្រាប់បែកគីមីអាមេរិកមានទាំងមនុស្សចាស់ និងកូនក្មេងសរុប៩៩នាក់ ក្នុងនោះស្ត្រីមានចំនួន៦២នាក់ កុមារ៧នាក់ ។ ប្រជាពលរដ្ឋដែលទទួលរងផល់ប៉ះពាល់ដោយសារធាតុគ្រាប់បែកគីមី នៅក្នុងឃុំគគីរ និងឃុំអំពិល ស្រុករមាសហែក ប៉ះពាល់កន្លងមក និងថ្មីៗនេះ សរុប៩៩នាក់ ស្រី៦២នាក់ កុមារ៧នាក់ស្រី៤នាក់។ លោកបានបន្ថែមថា ចំពោះគ្រាប់បែកគីមី ដែលស៊ីម៉ាក់រកឃើញ ចំនួន១៥ទីតាំងថ្មីទៀតនោះ មិនទាន់ចុះប្រតិបត្តិការណ៍នៅឡើយទេ ក៏ប៉ុន្តែទោះជាយ៉ាងណាក៏ដោយ ក៏ត្រូវតែចុះប្រតិបត្តការណ៍ឆាប់ៗខាងមុខនេះ ។
ស្ត្រីឈ្មោះនុត ធី អាយុ២៧ឆ្នាំ នៅភូមិ គគីរឃុំគគីរបានឲ្យដឹងថា គាត់ទៅត្រាយស្មៅដាំដំឡូងស្រាប់តែមានអាការរមាស់ពេញខ្លួន និងក្តៅផ្សាគ្រាប់ភ្នែក រយៈពេល២ខែមកហើយ ព្យាបាលមិនជា ចេញតែរមាស់ និងក្តៅគ្រាប់ភ្នែក ឈឺក្បាលញ៉ាំអាហារមិនបាន ។
ចំណែកស្ត្រីម្នាក់ទៀត អាយុ២៦ឆ្នាំ នៅភូមិគគីរឃុំគគីរ មានពងកន្ទួលរលួយស្បែកពេញដងខ្លួនដៃជើង រយៈពេល២ខែមកហើយ ពេលគាត់ដើរទៅធ្វើការនៅក្នុងចំការដំឡូង ស្រាប់តែរោលរមាស់ឡើងកន្ទួលពេញដងខ្លួននិងដៃជើង រហូតរលួយស្បែក និងឈឺចុកចាប់ដល់ក្នុងឆ្អឹង ឈឺក្បាល និងក្តៅក្រហាយក្នុងភ្នែកព្យាបាលនៅមន្ទីរពេទ្យស្រុករមាសហែក និងទៅរកការព្យាបាលនៅក្លីនិកឯកជនតែមិនជា កាន់តែធ្ងន់ធ្ងរឡើង ៕
ចែករំលែកព័តមាននេះ