ខេត្តសៀមរាប ៖ កាលពីថ្ងៃទី២០ ខែធ្នូ ឆ្នាំ២០២៥កន្លងទៅ កុមារីម្នាក់ដែលភៀសសឹកមកពីខេត្តឧត្តរមានជ័យ មកស្នាក់នៅក្នុងខេត្តសៀមរាបដោយសារផ្សែងពុល ហើយទទួលមរណភាពនៅក្នុងមន្ទីរពេទ្យគន្ធបុប្ផាអង្គរ ត្រូវបានរដ្ឋបាលខេត្ត ឧបត្ថមជូនគ្រឿងឧបភោគបរិភោគនិងថវិកា…
ខេត្តសៀមរាប ៖ កាលពីថ្ងៃទី២០ ខែធ្នូ ឆ្នាំ២០២៥កន្លងទៅ កុមារីម្នាក់ដែលភៀសសឹក
មកពីខេត្តឧត្តរមានជ័យ មកស្នាក់នៅក្នុងខេត្តសៀមរាបដោយសារផ្សែងពុល ហើយទទួល
មរណភាពនៅក្នុងមន្ទីរពេទ្យគន្ធបុប្ផាអង្គរ ត្រូវបានរដ្ឋបាលខេត្ត ឧបត្ថមជូនគ្រឿងឧបភោគ
បរិភោគនិងថវិកា ជូនដល់ក្រុមគ្រួសារសព ដើម្បីជាការចូលរួមរំលែកទុក្ខ ។
ក្នុងឱកាសនោះ លោកស្រី ស៊ិន ណម និងលោកស្រី ជា សុខនួន សមាជិកាក្រុមប្រឹក្សាខេត្ត តំណាងរដ្ឋបាលខេត្ត បាននាំយកអំណោយនិងថវិការបស់រដ្ឋបាលខេត្ត ឧបត្ថម្ភជូនដល់គ្រួសារ
នៃសពកុមារី សេង សុខេង ហៅ គា អាយុ១៤ឆ្នាំ ដែលបានទទួលមរណភាពកាលពីវេលាម៉ោងប្រមាណ១២និង៥៥នាទីយប់ថ្ងៃទី២០ ខែធ្នូ ឆ្នាំ២០២៥ ដោយសារត្រូវផ្សែងពុល និងភាពតក់ស្លុតភ័យខ្លាចគ្រាប់ផ្លោងរបស់ទាហានសៀមឈ្លានពាន ។ កុមារីរូបនេះ បានជម្លៀសមកពីជួរមុខក្នុងភូមិសាមគ្គី ឃុំត្រពាំងប្រីយ៍ ស្រុកអន្លង់វែង ខេត្តឧត្តមានជ័យ ។
សូមបញ្ជាក់ថា ក្រុមគ្រួសាររបស់កុមារីខាងលើ បានភៀសសឹកមកស្នាក់នៅក្នុងបរិវេណវត្ត
ប្រាសាទត្រាំនាគ កាលពីថ្ងៃទី៩ ខែធ្នូ ឆ្នាំ២០២៥ ហើយស្នាក់នៅបាន២យប់ ក៏បញ្ចូនកុមារីរូបនេះទៅព្យាបាលនៅមន្ទីរពេទ្យគន្ធបុប្ផាអង្គរសៀមរាប បានរយៈពេល៧យប់ ក៏ទទួលមរណភាពបាត់ទៅ ។
ក្រោយពីកុមារីរូបនេះមរណភាពភ្លាម និងដោយមានការយកចិត្តទុកដាក់ពីឯកឧត្តម ប្រាក់ សោភ័ណ អភិបាលខេត្ត ក៏ដូចជាការជួយសម្រាលទុក្ខលំបាករបស់បងប្អូនភៀសសឹកមកស្នាក់នៅក្នុងខេត្តសៀមរាប ឯកឧត្តមក៏បានឱ្យក្រុមការងារនាំយកគ្រឿងឧបភោគបរិភោគរួមមាន អង្ករ២បាវ ស្នើនឹង១០០គីឡូក្រាម មីខ្លាឃ្មុំ៤កេស ត្រីខ៤យួរ សាច់ក្រក៥គីឡូក្រាម ទឹកបរិសុទ្ធ៤កេស ទឹកក្រូចកូកាកូឡា៤កេស និងប្រាក់២លានរៀល ទៅជូនដល់ក្រុមគ្រួសារនៃសពផងដែរ ៕
ចែករំលែកព័តមាននេះ