ខេត្តកំពង់ស្ពឺ ៖ មុខសញ្ញាជួញដូរថ្នាំញៀនម្នាក់ត្រូវបានសមត្ថកិច្ចឃាត់ខ្លួនបន្ទាប់ពីជនសង្ស័យរូបនេះបានប្រើប្រាស់រូបភាពជួលក្មេងឱ្យទៅទិញថ្នាំញៀនយកមកឱ្យខ្លួនដើម្បីលក់បន្ត ។ ការឃាត់ខ្លួននេះនៅវេលាម៉ោង០២រសៀល ថ្ងៃទី២២ ខែតុលា ឆ្នាំ២០១៧ ស្ថិតនៅចំណុចផ្លូវលំខាងលិចភូមិអង្គតាឯក ឃុំភ្នំតូច…
ខេត្តកំពង់ស្ពឺ ៖ មុខសញ្ញាជួញដូរថ្នាំញៀនម្នាក់ត្រូវបានសមត្ថកិច្ចឃាត់ខ្លួនបន្ទាប់ពីជនសង្ស័យរូបនេះបានប្រើប្រាស់រូបភាពជួលក្មេងឱ្យទៅទិញថ្នាំញៀនយកមកឱ្យខ្លួនដើម្បីលក់បន្ត ។ ការឃាត់ខ្លួននេះនៅវេលាម៉ោង០២រសៀល ថ្ងៃទី២២ ខែតុលា ឆ្នាំ២០១៧ ស្ថិតនៅចំណុចផ្លូវលំខាងលិចភូមិអង្គតាឯក ឃុំភ្នំតូច ស្រុកឧដុង្គ ខេត្តកំពង់ស្ពឺ ។
ជនសង្ស័យមានឈ្មោះ ងោល សៅរី ហៅ ទីន ភេទប្រុស អាយុ៣៤ឆ្នាំ ចំណែកក្មេងដែលជននេះជួលមានឈ្មោះឌ.ដ អាយុ១២ឆ្នាំ រស់នៅភូមិ-ឃុំពាំងល្វា ស្រុកឧដុង្គ ខេត្តកំពង់ស្ពឺ ជាមួយគ្នា ។
តាមប្រភពព័ត៌មានពីសមត្ថកិច្ចបានប្រាប់ថា ក្នុងពេលចុះល្បាតដល់ចំណុចខាងលើកម្លាំងរបស់លោកប្រទះឃើញកុមារាម្នាក់(ក្មេងប្រុសខាងលើ)រស់នៅភូមិ-ឃុំខាងលើដែលគួរឱ្យសង្ស័យក៏បានឃាត់ធ្វើការឆែកឆេ ។ ក្រោយឃាត់ខ្លួនឆែកឆេរសមត្ថកិច្ចរកឃើញនៅក្នុងខ្លួនរបស់គេគឺមានម្សៅក្រាមពណ៍សសង្ស័យថា ជាគ្រឿងញៀនចំនួន១កញ្ចប់ ។ ក្រោយមកកុមារានោះបានឆ្លើយសារភាពថា ថ្នាំញៀននោះមិនមែនជារបស់ខ្លួនឡើយគឺខ្លួនត្រូវបានឈ្មោះ ងោល សៅរី ហៅ ទីន ដែលរស់នៅភូមិឃុំជាមួយគ្នាជាអ្នកជួលគេ១ម៉ឺនរៀលឱ្យទៅទិញគ្រឿងញៀនពីជនម្នាក់ដែលគេពុំស្គាល់ថ្នាំញៀននោះទេ គឺគេទិញក្នុងតម្លៃចំនួន៥០ម៉ឺនរៀល ។
ក្រោយពីបានចម្លើយសារភាពរបស់កុមារាខាងលើរួចមកសមត្ថកិច្ចរបស់លោកបានបន្តទៅឃាត់ខ្លួនឈ្មោះ ងោល សៅរី នៅនឹងផ្ទះរបស់គេតែម្តង ។ នៅចំពោះមុខសមត្ថកិច្ចជនសង្ស័យបានឆ្លើយសារភាពថា ថ្នាំញៀនទាំងអស់ពិតជារបស់ខ្លួនឯងប្រាកដមែន ហើយកុមារានោះក៏គេជាអ្នកជួលឱ្យទៅទិញថ្នាំញៀនយកមកឱ្យខ្លួនហើយក៏ឱ្យជួយលក់ថ្នាំញៀនផងដែរដោយឱ្យតម្លៃក្នុង១ថ្ងៃ១០០០០រៀល ៕
ចែករំលែកព័តមាននេះ