រាជធានីភ្នំពេញ៖ កម្លាំងគណៈបញ្ជាការឯកភាពខណ្ឌកំបូលបានចុះបង្ក្រាបល្បែងចិនមួយកន្លែងដែលជ្រកក្រោមស្លាកហាងលក់ទំនិញមួយយីហោ«ទំនិញគ្រប់មុខ1$» ដោយដកហូតបានវត្ថុតាងពាក់ព័ន្ធនិងល្បែងមួយចំនួននាំយកទៅរក្សាទុកនៅអធិការដ្ឋាននគរបាលខណ្ឌកំបូល ប៉ុន្តែជនជាតិចិនដែលជាអ្នកបើកល្បែងខាងលើបានរត់គេចខ្លួនបាត់ ។
ទីតាំងល្បែងនោះស្ថិតនៅតាមបណ្តោយផ្លូវជាតិលេខ៤ ក្នុងភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ ហើយត្រូវបានសមត្ថកិច្ចចុះបង្ក្រាបកាលពីវេលាម៉ោង១០និង១០នាទីព្រឹកថ្ងៃទី៣ ខែឧសភា ឆ្នាំ២០២៥ ។ ដោយមានការសហការពីម្ចាស់ដីដែលជាជនជាតិខ្មែរផងដែរ ។
កម្លាំងសមត្ថកិច្ចខាងលើប្រាប់ឲ្យដឹងថា ក្នុងពេលកន្លងមកមានជនជាតិចិនម្នាក់ឈ្មោះ DUAN CHENGYAN ភេទស្រី អាយុ៥៣ឆ្នាំ កាន់លិខិតឆ្លងដែនលេខ EE4727164 បានជួលដីមួយកន្លែងខាងលើនោះពីស្ត្រីជនជាតិខ្មែរម្នាក់ហើយបានបើកហាងលក់ដូរមួយយីហោ «ទំនិញគ្រប់មុខ1$» ។ បើគេមើលពីខាងក្រៅគឺជាហាងលក់ដូរ ប៉ុន្តែនៅក្នុងនោះមានបង្កប់នូវល្បែងចិនមួយដោយខុសច្បាប់ ដោយឡែកម្ចាស់ដីដែលបានជួលឲ្យជនជាតិចិននោះ ក្រោយពីបានដឹងថា ទីតាំងរបស់ដីខ្លួនត្រូវជនជាតិចិនជួលបើកហាងដើម្បីបិទបាំងល្បែងបែបនេះក៏បានរាយការណ៍ជូនអាជ្ញាធរ ។ គាត់បានសំណូមពរឲ្យអាជ្ញាធរចុះបង្ក្រាប ព្រមទាំងដកហូតយកសម្ភារៈល្បែងផងដែរ ព្រោះគាត់ជួលទីតាំងដីនោះទៅឲ្យជនជាតិចិន គឺដើម្បីរកសុីស្របច្បាប់តែប៉ុណ្ណោះ ពុំមែនជួលឲ្យប្រព្រឹត្តអំពើខុសច្បាប់បែបនេះទេ ។
សមត្ថកិច្ចបានប្រាប់ឲ្យដឹងបន្តទៀតថា ក្រោយទទួលបានព័ត៌មានខាងលើកម្លាំងគណៈបញ្ជាការឯកភាពខណ្ឌកំបូល បានចុះទៅត្រួតពិនិត្យនិងបង្ក្រាបតែម្ដង ប៉ុន្តែស្ត្រីជនជាតិចិនដែលជាអ្នកបើកល្បែងនោះបានរត់គេចខ្លួនបាត់ ។ បន្ទាប់មកកម្លាំងសមត្ថកិច្ចខាងលើបានដកហូតសម្ភារៈពាក់ព័ន្ធនិងល្បែងសុីសងរួមមាន៖តុបាការ៉ាត់ចំនួន៨គ្រឿង ,ទូបាញ់ត្រីចំនួន២គ្រឿង , តុហ្គេមមូល ចំនួន១គ្រឿង ,បៀមួយចំនួន កាក់លុយមួយចំនួន ,កៅអីសរុបចំនួន ១០០គ្រឿង ,តុសរុបចំនួន ៥គ្រឿង ,ទូរទស្សន៍ចំនួន១គ្រឿង ,កុំព្យូទ័រ ចំនួន១គ្រឿង ម៉ាស៊ីនត្រជាក់ចំនួន៦គ្រឿង ,ទូទឹកកក និងទូដាក់ចានចំនួន ២គ្រឿង, ម៉ូនីទ័រ LCD ចំនួន ២គ្រឿង ,បំពង់ពន្លត់អគ្គីភ័យចំនួន ៤បំពង់,ម៉ាស៊ីនរាប់លុយចំនួន ១គ្រឿង ,ធុងហ្គាសចំនួន២ធុង(ធុងតូច១ និងធុងធំ១) ,ទូក្លាសេចំនួន ១គ្រឿង ,ឡាបូលាងចាន ចំនួន១, តុដាក់ម្ហូបចំនួន១, ចង្ក្រានបាយចំនួន១, ឆ្នាំងស៊ុបចំនួន ១ ។
ប្រភពដដែលបានឲ្យដឹងទៀតថាយោងតាមកិច្ចសន្យាជួលដីដែលបានធ្វើឡើងរវាងម្ចាស់ដីនិងជនជាតិចិននោះ ត្រង់ប្រការ៧ ចំណុច ៧.៦ បានចែងថា ភាគី “ខ”(អ្នកជួលដី)ត្រូវធានាថា មិនត្រូវប្រើប្រាស់ដីជួលខាងលើនេះ ធ្វើជាកន្លែងរកស៊ីខុសច្បាប់ ។ ប្រសិនបើមានបញ្ហាផ្សេងៗកើតឡើងដោយសកម្មភាពរបស់ភាគី “ខ” ដែលល្មើសនឹងច្បាប់នោះ គឺ ភាគី “ខ” ជាអ្នកទទួលខុសត្រូវទាំងស្រុងចំពោះមុខច្បាប់ជាធរមាន ដោយមិនជាប់ពាក់ព័ន្ធជាមួយនិងភាគី “ក”(ម្ចាស់ដី)ឡើយ។ ប៉ុន្តែក្រោយពីជួលដីខាងលើនោះរួចជនជាតិចិនរូបនោះសំបកក្រៅបានបើកហាងលក់ទំនិញ ប៉ុន្តែខាងក្នុងបង្កប់ដោយល្បែងសុីសងខុសច្បាប់ ។
សមត្ថកិច្ចខាងលើបានបញ្ជាក់ប្រាប់បន្ថែមទៀតថា នៅក្នុងប្រតិបត្តិការនោះ ស្ត្រីជាម្ចាស់ទីតាំងដីដែលបានជួលឲ្យជនជាតិចិននោះបានសហការជាមួយគណៈបញ្ជាការឯកភាពខណ្ឌកំបូលតាំងពីដើមដល់ចប់ គាត់មិនបានឃុបឃិតស៊ុមគ្រលំជាមួយជនជាតិចិននោះឡើយ ។ ដោយឡែកកម្លាំងគណៈបញ្ជាការឯកភាពខណ្ឌកំបូល បានសម្រេចនាំយកសម្ភារៈវត្ថុតាងដែលដកហូតនោះទាំងអស់ទៅរក្សាទុកជាបណ្តោះអាសន្ននៅអធិការដ្ឋាននគរបាលខណ្ឌកំបូល ដើម្បីស្នើសុំមតិដឹកនាំបន្តពីគណៈបញ្ជាការឯកភាពរដ្ឋបាលរាជធានីភ្នំពេញ និងចាត់ការតាមនីតិវិធីច្បាប់៕
ចែករំលែកព័តមាននេះ