រាជធានីភ្នំពេញ ៖ ថ្លែងនៅចំពោះមុខអ្នកសារព័ត៌មានជាច្រើនស្ថាប័ន សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា តួនាទីអ្នកសារព័ត៌មាន មានសារៈសំខាន់ណាស់ក្នុងការចូលរួមលុបបំបាត់…
រាជធានីភ្នំពេញ ៖ ថ្លែងនៅចំពោះមុខអ្នកសារព័ត៌មានជាច្រើនស្ថាប័ន សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា តួនាទីអ្នកសារព័ត៌មាន មានសារៈសំខាន់ណាស់ក្នុងការចូលរួមលុបបំបាត់ AI ដែលផ្សព្វផ្សាយព័ត៌មានមិនពិត ដែលប៉ះពាល់ដល់សង្គមជាតិ ។
ក្នុងពិធីជួបសំណេះសំណាល និងពិសាអាហារសាមគ្គី ជាមួយអ្នកសារព័ត៌មាន លើកទី៧ ឆ្នាំ២០២៥ នាយប់ថ្ងៃទី៣ ខែឧសភា ឆ្នាំ២០២៥ សម្តេចបវតធិបតី ហ៊ុន ម៉ាណែត នាយករដ្ឋមន្ត្រី បានថ្លែងថា ៖ «ខ្ញុំសូមអរគុណណាស់ សម្រាប់បងប្អូនអ្នកសារព័ត៌មាន ដែលដើរតួនាទី ដែលបានចូលរួមជាមួយរដ្ឋាភិបាល ក្នុងការជួយរកដំណោះស្រាយបញ្ហា និងក្តាប់ជាប់នូវបញ្ហា ដើម្បីជួយប្រជាជន និងប្រទេសជាតិ» ។
សម្តេចបវរធិបតី ហ៊ុន ម៉ាណែត ក៏បានកោតសរសើរចំពោះក្រសួងព័ត៌មាន ដែលបានសម្របសម្រួលរៀបចំជួបជុំអ្នកសារព័ត៌មានជាមួយរាជរដ្ឋាភិបាល ។ ជាមួយគ្នានោះដែរ ក៏បានអរគុណដល់អ្នកសារព័ត៌មានទាំងរដ្ឋ និងឯកជន ដែលបានចូលរួមផ្សព្វផ្សាយគោលនយោបាយ និងលិខិតបទដ្ឋានគតិយុត្តិរបស់រាជរដ្ឋាភិបាល ទៅកាន់ប្រជាពលរដ្ឋឲ្យទទួលព័ត៌មានពិត និងគ្រប់ជ្រុងជ្រោយ ហើយនាំយក នូវសំណូមពរ និងក្តីកង្វល់នានា ក៏ដូចជាទស្សនៈនានារបស់ប្រជាពលរដ្ឋ ។
ជាមួយគ្នានោះដែរ សម្តេចបវរធិបតី នាយករដ្ឋមន្ត្រី បានគូសបញ្ជាក់ថា ៖ «នៅក្នុងសង្គមប្រជាធិបតេយ្យ សារព័ត៌មាន គឺជាអំណាចទី៤ បន្ទាប់ពីអំណាចនីតិបញ្ញាត្តិ អំណាចនីតិប្រតិបត្តិ និងអំណាចតុលាការ ហើយសារព័ត៌មាន មានឥទ្ធិពលផ្នែកនយោបាយ និងវេទិការនានា» ។
សម្តេចបវរធិតី បានសង្កត់ធ្ងន់ថា ៖ «បច្ចេកវិទ្យាព័ត៌មានសិម្បនិមិទ្ធ (AI) បច្ចេកទេសផ្សេងៗ គឺជាឧបករណ៍ វាមិនអាចទៅធ្វើអាក្រក់នោះទេ គឺវាអាស្រ័យលើមនុស្សជាអ្នកធ្វើវា ។ អ៊ីចឹងចាំបាច់វានៅតែកត្តាមនុស្សចាំបាច់ក្នុងការពង្រឹងអភិក្រម ក្រមសីលធម៌និងការទទួលខុសត្រូវរបស់អ្នកចែកចាយនៅជាគន្លឹះ តាមក្រមវិជ្ជាជីវៈ» ។
ក្នុងឱកាសនោះដែរ សម្តេចបវរធិបតី បានក៏បានលើកឡើងថា អាវុធទំនើបយ៉ាងណាក្តី ក៏មិនអាចសម្លាប់មនុស្សបាន ដោយខ្លួនឯងបានដែរ មានតែមនុស្សទេ ដែលសម្រេចបាញ់គ្នា ឬបង្កើតសង្គ្រាម ។ អ៊ីចឹងប្រព័ន្ធ AI ក្តី បច្ចេកវិទ្យាឌីជីថលក្តី តាមទូរសព្ទដៃក្តី វាពុល ឬមិនពុល វាគ្រោះថ្នាក់ ឬមិនគ្រោះថ្នាក់ គឺអាស្រ័យលើមនុស្សជាអ្នកប្រើ ។
នៅចំពោមុខអ្នកសារព័ត៌មាន សម្តេចបវរធិបតី បានគូសសង្កត់ធ្ងន់ថា ៖ «អ្នកសារព័ត៌មាន គឺជាតួអង្គសំខាន់ណាស់ ក្នុងការទប់ក្នុងការធានា និងការជួយទប់ ធ្វើយ៉ាងម៉េចកុំឲ្យ AI ឬបចេ្ចកវិទ្យា ក្លាយជាគ្រោះថ្នាក់សង្គមជាតិ» ៕
ចែករំលែកព័តមាននេះ