ខេត្តត្បូងឃ្មុំ ៖ ឃាតកម្មយ៉ាងសាហាវព្រៃផ្សៃមួយ បណ្តាលឱ្យពីរនាក់ប្តីប្រពន្ធស្លាប់ក្នុងថ្លុកឈាម ដោយសារត្រូវជនមិនស្គាល់មុខកាប់ប្រហារសុសសាច់ ស្លាប់នៅលើផ្ទះរបស់ខ្លួន ។ ហេតុការណ៍ដ៏យង់ឃ្នងនេះ ត្រូវបានសមត្ថកិច្ចសន្និដ្ឋានថា អាចកើតឡើងនៅចន្លោះម៉ោង៧…
ខេត្តត្បូងឃ្មុំ ៖ ឃាតកម្មយ៉ាងសាហាវព្រៃផ្សៃមួយ បណ្តាលឱ្យពីរនាក់ប្តីប្រពន្ធស្លាប់ក្នុងថ្លុកឈាម ដោយសារត្រូវជនមិនស្គាល់មុខកាប់ប្រហារសុសសាច់ ស្លាប់នៅលើផ្ទះរបស់ខ្លួន ។ ហេតុការណ៍ដ៏យង់ឃ្នងនេះ ត្រូវបានសមត្ថកិច្ចសន្និដ្ឋានថា អាចកើតឡើងនៅចន្លោះម៉ោង៧ ទៅ៨យប់ថ្ងៃទី២០ តុលា ស្ថិតនៅភូមិទី៥ ឃុំរកាខ្នុរ ស្រុកក្រូចឆ្មារ តែរហូតមកដល់វេលាម៉ោង១០ព្រឹកថ្ងៃទី២១ តុលា ទើបបង្កឱ្យមានការភ្ញាក់ផ្អើល ដឹងដល់សមត្ថកិច្ចចុះទៅពិនិត្យសពនៅលើផ្ទះ ។
លោកវរសេនីយ៍ឯក សាំ ហេង អធិការនគរបាលស្រុកក្រូចឆ្មារ បានប្រាប់ឱ្យដឹងថា អ្នកដែលស្លាប់នៅក្នុងហេតុការណ៍នេះប្តីឈ្មោះ គឹម សេងគាង អាយុ៤៨ឆ្នាំ មានមុខរបរទិញលក់ម៉ូតូ ស្លាប់នៅរានផ្ទះបាយ ឯប្រពន្ធឈ្មោះ ហួយ ពៅ អាយុ៤៥ឆ្នាំ មានរបរលក់ខោអាវជជុះបានស្លាប់នៅមាត់ទ្វារលើផ្ទះ ។ ការកាប់ប្រហារនេះមិនមានអ្នកណាម្នាក់បានដឹងនោះទេ ។
សមត្ថកិច្ចថា ការស្លាប់នេះឃាតករអាចមានគ្នាយ៉ាងតិចក៏ពីរនាក់ដែរ ទើបធ្វើសកម្មភាពបែបនេះបានដោយមិនមានការភ្ញាក់ផ្អើលដល់អ្នកភូមិ ហើយទំនងជាមនុស្សស្គាល់គ្នាទៀតផងទើបអាចឡើងទៅលើផ្ទះនៅពេលយប់បាន ។អធិការនគរបាលស្រុកក្រូចឆ្មារប្រាប់បន្តថា កាលពីយប់ថ្ងៃកើតហេតុនោះ ប្រជាពលរដ្ឋក្បែរខាងបានឮសូរសំលេងស្ត្រីជាប្រពន្ធបានស្រែកខុសពីធម្មតា បន្ទាប់មកបាននាំគ្នាដើរទៅមើលមានភ្លើងពិលបញ្ជាំងព្រោងព្រាត ។ ស្របពេលដែលទៅជិតដល់មុខផ្ទះស្រាប់តែស្ងាត់មិនបានឮសំលេងអ្វីបន្តទៀត នឹកស្មានតែប្តីប្រពន្ធនេះឈ្លោះប្រកែកគ្នា រួចក៏នាំគ្នាដើរត្រឡប់មកផ្ទះដេកធម្មតាវិញ ។
លុះមកដល់វេលាម៉ោង១០ព្រឹកថ្ងៃទី២១ តុលា ប្អូនប្រុសរបស់ស្ត្រីដែលស្លាប់ មិនបានឃើញបងរបស់ខ្លួនយកខោអាវមកលក់នៅផ្សារដូចសព្វមួយដងក៏ឆ្ងល់ និងមានការសង្ស័យថាអាចមានបញ្ហាអ្វីមួយក៏បានធ្វើដំណើរមកដល់ផ្ទះកើតហេតុតែម្តង ។ នៅពេលដែលរុញទ្វារខាងមុខចូលជាប់គន្លឹះ និងបានដើរទៅឡើងតាមជណ្តើរខាងក្រោយ ដែលមិនបានខ្ទាស់គន្លឹះនោះទេ ស្របពេលដែលរុញទ្វារក្រោយចូលទៅទើបបានឃើញបងរបស់ខ្លួននិងបងថ្លៃស្លាប់ក្នុងថ្លុកឈាមដោយការកាប់ប្រហារត្រូវជាច្រើនកន្លែង ។ ភ្លាមៗនោះទើបបង្កឱ្យមានការភ្ញាក់ផ្អើលដល់អ្នកជិតខាងនិងប៉ុស្តិ៍រដ្ឋបាល ចុះមកហ៊ុមព័ទ្ធកន្លែងកើតហេតុ ។
លោកវរសេនីយ៍ឯក សាំ ហេង អធិការនគរបាលស្រុកក្រូចឆ្មារបានបញ្ជាក់ថា ចំពោះសម្បត្តិទ្រព្យរបស់អ្នករងគ្រោះ ក្នុងនោះមានដូចជារថយន្តម៉ាកហាយឡែនដ័រ១គ្រឿង ម៉ូតូ៤គ្រឿង លុយ៣.៧០០ដុល្លារ ព្រមទាំងគ្រឿងអលង្ការមិនបានបាត់បង់នោះទេ ។ នៅរសៀលថ្ងៃទី២២ តុលា ទាក់ទិននឹងអំពើឃាតកម្មលើប្តីប្រពន្ធខាងលើនេះសមត្ថកិច្ចបានដាក់ការសន្និដ្ឋានថា មិនមែនជាករណីប្លន់សម្លាប់នោះទេ តែអាចទាក់ទងទៅនឹងរឿងគំនុំច្រើនជាង ។ ប្តីប្រពន្ធដែលស្លាប់នេះមានកូនចំនួនពីរនាក់ តែកូនៗមិនបាននៅជាមួយនោះទេ និងកំពុងតែបន្តការសិក្សានៅរាជធានីភ្នំពេញ ។ ចំពោះស្នាមកាប់វិញឃាតករអាចប្រើកាំបិតត្នោត ឬកាំបិតប៉័ងតោ គឺប្តីកាប់ត្រូវសុសសាច់១៥កន្លែង ចំណែកប្រពន្ធវិញក៏ត្រូវជាច្រើនកាំបិតដែរគឺកាប់ចិញ្ច្រាំទាល់តែស្លាប់ ។
លោកឧត្តមសេនីយ៍ត្រី ប្រាក់ ប៊ុនណុន ស្នងការរងនគរបាលខេត្តទទួលផែនព្រហ្មទណ្ឌបញ្ជាក់ថា ករណីខាងលើនេះជាអំពើឃាតកម្មដោយគំនុំមិនមែនជាអំពើប្លន់នោះទេ ព្រោះថាសម្បត្តិរបស់អ្នករងគ្រោះមិនបានបាត់បង់នោះឡើយ ។ សមត្ថកិច្ចគ្រប់លំដាប់ថ្នាក់កំពុងតែស្រាវជ្រាវលើករណីនេះដើម្បីវែកមុខឃាតករជុំវិញការសម្លាប់គ្មានធម៌មេត្តានេះ ។
ចែករំលែកព័តមាននេះ