រាជធានីភ្នំពេញ ៖ កីឡាករ ផល សុផាត មកពីក្លិបកងរាជអាវុធហត្ថរាជធានីភ្នំពេញ ទីបំផុតបានក្លាយជាម្ចាស់ជើងឯកខ្សែក្រវាត់ CBF ទម្ងន់៦៥គីឡូក្រាមទាល់តែបាន បន្ទាប់ពីផ្តួលកីឡាករថៃ LEK PHETH ឱ្យសន្លប់នៅក្នុងទឹកទី១ ជុំទី១ និងយកឈ្នះ កីឡាករ លាង សីុពេជ្រ មកពីសមាគមកីឡាប្រដាល់ខេត្តកោះកុង ដោយពិន្ទុនៅវគ្គប្រកួតផ្តាច់ព្រ័ត្រលើសង្វៀនស្តាតចាស់ កាលពីយប់ថ្ងៃសៅរ៍ ទី២៩ កញ្ញា កន្លងមកនេះ ។
ស្ថានីយទូរទស្សន៍អប្សរា សហការជាមួយសហព័ន្ធកីឡាប្រដាល់កម្ពុជា ក្រោមការឧបត្ថម្ភពីសណ្ឋាគារណាហ្គាវើល តែងតែរៀបចំឱ្យមានព្រឹត្តិការណ៍ប្រកួតប្រដាល់ក្បាច់ខ្មែរបុរាណជាលក្ខណៈអន្តរជាតិបែបនេះជារៀងរាល់មួយខែម្តង ដោយមានទស្សនិកជនចូលរួមគាំទ្រយ៉ាងច្រើនកុះករ ។
ការប្រកួតនៅជុំទី១ ក្នុងទឹកទី១ ផល សុផាត បានប្រើស្នៀតជើងទាត់ត្រូវដៃខាងឆ្វេង LEK PHETH យ៉ាងពេញទំហឹង ធ្វើឱ្យកីឡាករជនជាតិថៃរូបនេះរបួសមិនអាចប្រកួតតទៅទៀតបាន ។ ចំណែកកីឡាករ លាង សីុពេជ្រ បានយកឈ្នះកីឡាករ NOU BIL A LEK ជនជាតិបែលហ្ស៊ិកនៅត្រឹមទឹកទី៣ ដែលជាការប្រកួតនៅជុំទី១ដូចគ្នា ។ លាង សីុពេជ្រ ដែលបានឡើងទៅប្រកួតនៅវគ្គផ្តាច់ព្រ័ត្រជាមួយ ផល សុផាត នេះត្រូវវាយ៥ទឹកពេញទំរំាឈ្នះកីឡាករបែលហ្ស៊ិក ។ ទោះបីយ៉ាងណា សីុពេជ្រ មិនមានសំណាងគ្រងតំណែងជាម្ចាស់ខ្សែក្រវាត់ CBF នេះឡើយ ព្រោះតំណែងមួយនេះបានធ្លាក់ទៅលើកណ្តាប់ដៃ ផល សុផាត ដែលជាអ្នកឈ្នះ ។
ប៉ុន្តែអ្វីដែលធ្វើឱ្យគេមានការចាប់អារម្មណ៍ខ្លាំងជាងនេះទៅទៀតនោះ គឺការប្រកួតក្នុងប្រភេទទម្ងន់យក្ស រវាងកីឡាករ យ៉ាក់ កោះយ៉ មកពីសមាគមកីឡាប្រដាល់ខេត្តកោះកុង និងកីឡាករ YA SIN A LEK ជនជាតិបែលហ្ស៊ិក ក្នុងទម្ងន់១១០គីឡូក្រាម ។ គូនេះកោះយ៉ ត្រូវ ALEK វាយឱ្យសន្លប់ក្នុងទឹកទី២ ។
ជំនួបគ្នារវាងកីឡាករ សែន រ៉ាឌី ម្ចាស់មេដាយប្រាក់សីុហ្គេម និងកីឡាករថៃ SONIDETH SIT CHANATH កាន់តែ កក្រើកពេញសង្វៀនប្រដាល់តែម្តង ព្រោះរ៉ាឌី បានធ្វើឱ្យកីឡាករថៃរូបនេះ ត្រូវអាជ្ញាកណ្តាលបញ្ឈប់នៅត្រឹមទឹកទី៣យ៉ាងអស់ចិត្តបំផុត ។ នៅទឹកទី១ CHANATH បានប្រើស្នៀតជង្គង់ និងស្នៀតកណ្តាប់ដៃវាយមកលើរ៉ាឌីយ៉ាងសន្ធាប់ ប៉ុន្តែរ៉ាឌី បានប្រើស្នៀតជង្គង់ និងស្នៀតកណ្តាប់ដៃ បូករួមទាំងស្នៀតជើង វាយបកសងវិញយ៉ាងសាហាវបំផុតនៅក្នុងទឹកទី២ ធ្វើឱ្យកីឡាករថៃម្នាក់នេះបាត់បង់ជំហរប្រកួតស្ទើរតែទាំងស្រុង និងត្រូវអាជ្ញាកណ្តាលរាប់៨ម្តង ។ ចូលដល់ទឹកទី៣ ដោយឃើញ CHANATH ស្រុតកម្លាំងច្រើន រ៉ាឌី បានបង្កើនការវាយសម្រុកកាន់តែសាហាវជាងមុន ជាពិសេសស្នៀតជង្គង់របស់គេ បានបុកចូលពោះទឹកពេញៗដល់ថ្នាក់គូប្រកួតតដៃលែងកើត ទើបអាជ្ញាកណ្តាលលោក មាស វណ្ណឌី បញ្ឈប់លែងឱ្យប្រកួតតែម្តង ។
កីឡាករ LEK PHETH ដោយសារតែមានបញ្ហារបួសដៃមិនអាចប្រកួតកើត ត្រូវអាជ្ញាកណ្តាលប្រកាសឱ្យចាញ់កីឡាករ NO BIL A LEK ដោយស្វ័យប្រវត្តិនៅវគ្គផ្តាច់ព្រ័ត្រ ដែលជាការប្រកួតយកតំណែងលេខ៣ ខណៈលេខ២បានទៅលើកីឡាករ លាង សីុពេជ្រ ។ កីឡាករ យិន ឌីណា មកពីសមាគមកីឡាប្រដាល់ក្រសួងកសិកម្ម ប្រកួតឈ្នះពិន្ទុកីឡាករថៃ YORT THONG CHHAY ៕
ចែករំលែកព័តមាននេះ