អតីតជើងឯកពិភពលោកក្នុងប្រភេទទម្ងន់ Welterweightនិង Light-Welterweightរីកគី ហាតតុន(ឈ្នះ៤៥ ចាញ់ ផ្តួលដៃគូឱ្យសន្លប់ ៣២លើក)នឹងវិលត្រឡប់ចូលសង្វៀនប្រកួតសាជាថ្មីនៅថ្ងៃទី២៤ខែវិច្ឆិកាដោយជួបជាមួយកីឡាករអ៊ុយក្រែន យ៉ាឆេស្លាវ សឹនឆឹនកូ(Vyacheslav Senchenko)។ ការប្រកួតគ្រោងនឹងរៀបចំធ្វើនៅសង្វៀន Evening News Arenaក្រុង Manchester ប្រទេសអង់គ្លេស ។
ហាតតុនដែលបានប្រកាសលាឈប់ពីវិស័យកីឡាប្រដាល់ក្រោយពីចាញ់ប៉ាក់គីអាវដោយសន្លប់ក្នុងទឹកទី២កាលពីឆ្នាំ២០០៩បានប្រកាសវិលចូលប្រកួតជាថ្មីកាលពីដើមខែនេះ ។ ថ្លែងក្នុងសន្និសីទកាសែតមួយ កីឡាករអង់គ្លេសរូបនេះបានបញ្ជាក់ថា ៖«ក្នុងពេលនេះ ខ្ញុំស្ទើរតែទ្រាំចាំមិនបាន ។ ខ្ញុំជឿជាក់ថា កីឡាករសឹនឆឹនកូនឹងផ្តល់ការប្រកួតដ៏ល្អមួួយដល់ខ្ញុំ ។ នេះជាការប្រកួតមួយដែលខ្ញុំមានទំនុកចិត្តថា ខ្លួនឯងនឹងឈ្នះ ។ សឹនឆឹនកូបានចាញ់ការប្រកួតចុងក្រោយរបស់ខ្លួនជាមួយកីឡាករ Pauli Malignaggi ប៉ុន្តែគេមានប្រវត្តិប្រកួតល្អ ។ ខ្ញុំវិញក៏បានត្រៀមខ្លួនរួចរាល់ហើយដែរ ។ ខ្ញុំគិតថា ខ្ញុំពិតជាអាចផ្តល់ការប្រកួតដ៏ល្អមួយដល់អ្នកទស្សនា »។
ហាតតុនគឺជាកីឡាករម្នាក់ក្នុងចំណោមបណ្តាកីឡាករមានប្រជាប្រិយភាពបំផុតរបស់អង់គ្លេស ប៉ុន្តែឆ្លងកាត់ប៉ុន្មានឆ្នាំថ្មីៗនេះ គេបានជួបបញ្ហាជាច្រើន ។ គេផឹកស្រា និងជក់ការកូអុីនហើយបានស្ថិតក្នុងមជ្ឈមណ្ឌលស្តានិតិសម្បទាកាលឆ្នាំ២០១០ទៀតផង ។
គេបាននិយាយថា ៖«មានឯកសារដែលគេរៀបចំក្រងក្រងយ៉ាងល្អរៀបរាប់ពីអ្វីដែលកើតឡើងចំពោះរូបខ្ញុំ ។ ជីវិតរបស់ខ្ញុំបានក្លាយដូចជា បបរខាប់ ។ ពេលនេះខ្ញុំបានត្រឡប់មកប្រកួតដើម្បីដណ្តើមខ្សែក្រវាត់ពិភពលោកជាថ្មីម្តងទៀត »។
ដោយឡែក សឹនឆឹនកូវ័យ៣៥ឆ្នាំនឹងផ្តល់នូវការតេស្តដ៏លំបាកមួយសម្រាប់ហាតតុន ។ នៅក្នុង៣៣ប្រកួត កីឡាករអ៊ុយក្រែនរូបនេះចាញ់តែ១ប៉ុណ្ណោះ ។ គេធ្លាប់ផ្តួលដៃគូឱ្យសន្លប់បាន២១លើកផងដែរ ។ សឹនឆឹនកូគឺជាអតីតម្ចាស់ខ្សែក្រវាត់ពិភពលោកស្ថាប័ន WBAក្នុងប្រភេទទម្ងន់ Welterweight ៕
ចែករំលែកព័តមាននេះ