ខេត្តកំពង់ធំ ៖ ពាក់ព័ន្ធព័ត៌មានថា រាជរដ្ឋាភិបាលបានចេញអនុក្រឹត្យដកហូតដីសម្បទានសេដ្ឋកិច្ចពីក្រុមហ៊ុន៤នៅតំបន់ព្រៃការពារអភិរក្សជីវចម្រុះ (ព្រៃឡង់) ដែលមានព្រំប្រទល់៤ខេត្ត និងព័ត៌មានលើកឡើងថា សម្តេចតេជោ ហ៊ុន សែន បានផ្តល់ដីសម្បទានសេដ្ឋកិច្ចទាំងនេះឱ្យទៅក្រុុមអ្នកតវ៉ាគ្រប់គ្រងការពារ និងថែរក្សានោះ អ្នកយកព័ត៌មានក៏បានសុំការបកស្រាយបន្ថែមពីអាជ្ញាធរខេត្តកំពង់ធំ ដែលក្នុងនោះលោកអភិបាលរងខេត្ត អ៊ុត សំអន បានឱ្យដឹងថា កន្លងមកមានក្រុមហ៊ុន៤បានស្នើសុំវិនិយោគនៅតំបន់ព្រៃឡង់នេះមែន ប៉ុន្តែដោយផ្អែកលើការសិក្សារបស់ក្រសួងកសិកម្មតាមរយៈរដ្ឋបាលព្រៃឈើបានពិនិត្យឃើញថា ព្រៃក្នុងគម្រោងនេះគឺប៉ះពាល់ទាំងស្រុងលើព្រៃការពារអភិរក្សជីវចម្រុះ ទើបរាជរដ្ឋាភិបាលបានចេញអនុក្រឹត្យមួយគឺលុបចោលគម្រោងស្នើសុំនេះ ។
ស្រដៀងគ្នានេះដែរ ខណ្ឌរដ្ឋបាលព្រៃឈើកំពង់ធំបានឱ្យដឹងថា ក្រុមហ៊ុន៤គឺឈ្មោះ EHL2 អភិវឌ្ឍន៍កៅស៊ូខូអិលធីឌី EHL1, EHL អភិវឌ្ឍន៍កៅស៊ូខូអិលធីឌី, PVP អិុនណាស់សូណាល់ បានស្នើសុំវិនិយោគលើដីចំនួនជាង៥ម៉ឺុនហិកតា នៅតំបន់ព្រៃការពារអភិរក្សជីវចម្រុះ (ព្រៃឡង់) នេះ។ ប៉ុន្តែសំណើសុំវិនិយោគនេះត្រូវបានរាជរដ្ឋាភិបាលលុបចោល ។ គឺមិនមានន័យដូចដែលអ្វីជាការលើកឡើងរបស់ក្រុមអ្នកញុះញង់ដែលឆ្លៀតឱកាសបង្កបញ្ហាថា រាជរដ្ឋាភិបាលចេញ ស.ជ.ណ ដកហូតដីសម្បទានសេដ្ឋកិច្ចនៅតំបន់ព្រៃឡង់យកទៅប្រគល់ឱ្យអ្នកណាគ្រប់គ្រងនោះឡើយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ