ខេត្តបន្ទាយមានជ័យ ៖ ប្រជាពលរដ្ឋដែលរងគ្រោះដោយសារទឹកជំនន់ចំនួន៣០០គ្រួសារក្នុងក្រុងសិរីសោភ័ណ បានមកទទួលអំណោយសង្គ្រោះបន្ទាន់ពីក្រុមហ៊ុនខ្មែរប្រ៊ូវើរី លីមីតធី ដែលជាក្រុមហ៊ុនផលិតស្រាបៀរកម្ពុជា ។ ពិធីនេះបានប្រព្រឹត្តទៅកាលពីរសៀលថ្ងៃទី២៨ កញ្ញា ២០១២ ក្រោមអធិបតីភាពលោកអ៊ុង អឿន ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងមានការចូលរួមពីលោកជំទាវឧកញ៉ា ភាព ហៀក ប្រធានក្រុមប្រឹក្សាភិបាលក្រុមហ៊ុនខ្មែរប្រ៊ូវើរី លីមីតធី, លោកឧកញ៉ា លាង ឃុន ប្រធានអគ្គនាយកក្រុមហ៊ុនខ្មែរប្រ៊ូវើរី លីមីតធី ព្រមទាំងមន្ត្រីរាជការនានាជុំវិញខេត្ត ក្រុង សង្កាត់យ៉ាងច្រើនកុះករផងដែរ ។
លោកអ៊ុំ រាត្រី អភិបាលក្រុងសិរីសោភ័ណបានឡើងមានមតិស្វាគមន៍ និងធ្វើសេចក្តីរាយការណ៍សង្ខេបពីស្ថានភាពទឹកជំនន់ បន្ទាប់ពីទឹកជំនន់នៅស្រុកម៉ាឡៃ និងក្រុងប៉ោយប៉ែត ក្នុងក្រុងសិរិសោភ័ណ រងគ្រោះនូវទឹកជំនន់នៅថ្ងៃទី២២ កញ្ញា ២០១២ បណ្តាលឱ្យប៉ះពាល់ដល់លំនៅឋានរបស់ប្រជាពលរដ្ឋរាប់ពាន់ខ្នង ហើយត្រូវបានជម្លៀសចេញពីផ្ទះទៅកាន់ទីទួលសុវត្ថិភាព និងទៅស្នាក់នៅបណ្តោះអាសន្នជាមួយបងប្អូនចំនួន៤៩៥គ្រួសារ ។ ប្រជាពលរដ្ឋដែលមកទទួលអំណោយពីក្រុមហ៊ុនខ្មែរប្រ៊ូវើរី លីមីតធី ជាក្រុមហ៊ុនផលិតស្រាបៀរកម្ពុជា ដែលដឹកនាំដោយលោកជំទាវឧកញ៉ា ភាព ហៀក យកមកចែកជូននាពេលនេះមានចំនួន៣០០គ្រួសារមកពី៣សង្កាត់ក្នុងក្រុងសិរីសោភ័ណ គឺសង្កាត់ព្រះពន្លា ចំនួន១១២គ្រួសារ, សង្កាត់ទឹកថ្លាចំនួន៧២គ្រួសារ និងសង្កាត់អូរអំបិលចំនួន១១៦គ្រួសារ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ