ខេត្តបាត់ដំបង ៖ អាជ្ញាធរគ្រប់អង្គភាពពាក់ព័ន្ធក្នុងស្រុកសង្កែ បានកោះប្រជុំភ្លាមៗដើម្បីរកដំណោះស្រាយអំពីការខ្វែងគំនិតគ្នាក្នុងស្ថាប័នព្រះពុទ្ធសាសនា ក្រោយពីមានការផ្ទុះអធិករណ៍មួយ កាលពីចុងសប្ដាហ៍មុននៅក្នុងវត្តស្វាយធំ ស្ថិតនៅភូមិស្វាយធំ ឃុំអូរដំបង២ ស្រុកសង្កែ រវាងអ្នកភូមិរាប់រយនាក់ដែលគាំទ្រព្រះសង្ឃក្នុងវត្តជាមួយ«អាចារ្យតែថេះ» ២នាក់ដែលប្រឆាំងព្រះសង្ឃ ។ ការរកដំណោះស្រាយបានបញ្ចប់ ដោយគណៈកម្មការបានសម្រេចឯកភាពតាមសំណូមពរភាគច្រើនរបស់ប្រជាពលរដ្ឋដែលគាំទ្រព្រះសង្ឃ តែបានបដិសេធចោលវិញ នូវរបាយការណ៍ឈ្នានីស ថែមទាំងសម្រេចបញ្ចប់ភារកិច្ចតាមអាចារ្យទាំង២នាក់នេះពីក្នុងវត្តទៀតផង ។
នៅព្រឹកថ្ងៃទី២៧ កញ្ញា អាជ្ញាធរឃុំអូរដំបង២ បានជួបប្រជុំជាមួួយព្រះសង្ឃ និងប្រជាពលរដ្ឋប្រមាណ២០០នាក់ នៅក្នុងវត្តស្វាយធំ ដើម្បីប្រកាសជូនដំណឹងអំពីការសម្រេចបណ្ដោះអាសន្នរបស់អាជ្ញាធរដែលត្រូវរៀបចំរចនាសម្ព័ន្ធគ្រប់គ្រងវត្តស្វាយធំនេះជាថ្មី ។ មេឃុំអូរដំបង២ លោកហុក សុគុន មានប្រសាសន៍ថា ក្នុងកិច្ចប្រជុំនោះ អាជ្ញាធរស្រុក និងអង្គភាពពាក់ព័ន្ធនានាក្នុងស្រុកសង្កែបានឯកភាពសម្រេចជ្រើសតាំងគ្រូចៅអធិការស្ដីទី គ្រូសូត្រឆ្វេង- ស្ដាំ ក្នុងវត្តស្វាយធំ ជាបណ្ដោះអាសន្នតាមសំណូមពររបស់ប្រជាពលរដ្ឋ រួមជាមួយនឹងការជ្រើសតាំងគណៈកម្មការ និងអាចារ្យវត្តនេះជាថ្មីផងដែរ ខណៈអាចារ្យ២នាក់គឺអាចារ្យថង និងអាចារ្យម៉ិ ដែលជំទាស់នឹងមតិមហាជនភាគច្រើន ជាពិសេសជាមួយព្រះសង្ឃត្រូវបញ្ចប់តំណែងពីក្នុងវត្តដែរ ។
លោកហុក សុគុន បានបន្តថា ការជ្រើសតាំងមន្រ្តីសង្ឃ និងគណៈកម្មការ តាអាចារ្យក្នុងវត្តស្វាយធំ ជាថ្មីនេះ ក៏បានធ្វើឡើងតាមសំណូមពររបស់មហាជន ដែលស្នើមិនឱ្យជ្រើសរើសព្រះសង្ឃ ឬតាអាចារ្យ គណៈកម្មការវត្តពីកន្លែងផ្សេងមកគ្រប់គ្រងវត្តនេះ ។ លោកបានប្រាប់ថា ព្រះសង្ឃ៣អង្គដែលត្រូវជ្រើសតាំងបណ្ដោះអាសន្នរួមមាន ១-ភិក្ខុនាម សន សម្បត្តិ ព្រះជន្ម៣០ឆ្នាំ ជាចៅអធិការស្ដីទី ២-ភិក្ខុនាម សុវណ្ណ មុន្នី ព្រះជន្ម៣១ឆ្នាំជាគ្រូសូត្រស្ដាំ និង៣-ភិក្ខុនាម កៅ សុខ ព្រះជន្ម៧១ឆ្នាំ ជាគ្រូសូត្រឆ្វេង ។ ដោយឡែក នៅមានបេក្ខជនជាគណៈកម្មការ និងតាអាចារ្យ១៥រូបទៀត ក៏ត្រូវបានជ្រើសតាំងរួចហើយដែរ ប៉ុន្តែក្នុងនោះអង្គប្រជុំបានឯកភាពជ្រើសរើសយកបេក្ខជន៣នាក់តែងតាំងជាប្រធានគណៈកម្មការវត្ត លោកតាអាចារ្យ និងហេរញ្ញិក តែគ្មានឈ្មោះអាចារ្យថង និងអាចារ្យម៉ិ នៅក្នុងចំណោមនេះទេ ។ លោកមេឃុំបញ្ជាក់ថា ការជ្រើសតាំងថ្នាក់ដឹកនាំក្នុងវត្តស្វាយធំជាថ្មីនេះ គឺធ្វើឡើងតាមសំណូមពរភាគច្រើនរបស់មហាជន ដែលជាពុទ្ធបរិស័ទចំណុះជើងវត្តទាំងមូល។
ជាមួយនឹងការប្រកាសតំណែងបណ្ដោះអាសន្នដល់ព្រះសង្ឃ និងគណៈកម្មការ លោកតាអាចារ្យក្នុងវត្តស្វាយធំនេះ ប្រជាពលរដ្ឋ និងព្រះសង្ឃដែលគង់ក្នុងវត្តនេះបានសាទរ បើទោះជាគ្រូចៅ អធិការមុននាមជា ហ៊ឺ បានបដិសេធមិនទទួលតំណែងចៅអធិការវត្តនេះវិញក្ដី ។ អ្នកភូមិនិយាយថា ពុទ្ធបរិស័ទ និងព្រះសង្ឃក្នុងវត្តទាំងអស់ បានស្នើឱ្យអតីតចៅអធិការវត្តព្រះនាមជា ហ៊ឺ ទទួលតំណែងជាគ្រូចៅអធិការវិញ ក្រោយពីត្រូវមន្រ្តីសង្ឃ និងមន្រ្តីធម្មការស្រុកដកហូតតំណែង និងត្រារបស់ព្រះអង្គ កាលពីសប្ដាហ៍មុនតែព្រះអង្គបដិសេធដោយសំអាងថា ព្រះអង្គមានវ័យជរា និងមានការភ្លេចភ្លាំងច្រើន ។ ប៉ុន្តែព្រះអង្គសុខចិត្តបួសនៅក្នុងវត្តនេះបន្តក្នុងនាមជាភិក្ខុវិញក៏បានដែរ ។
គួររំលឹកថា កាលពីថ្ងៃទី២៣ កញ្ញា កន្លងទៅនេះ ក្នុងវត្តស្វាយធំ បានផ្ទុះអធិករណ៍ដ៏ចម្រូងចម្រាសមួយដោយសារមានការដកហូតតំណែងគ្រូចៅអធិការវត្តនាមជា ហ៊ឺ ព្រះជន្ម៧៣ឆ្នាំដែលធ្វើឡើងស្ងាត់ៗពីសំណាក់មន្រ្តីសង្ឃ និងមន្រ្តីធម្មការស្រុកសង្កែ។មហាជនរាប់រយនាក់រួមជាមួយព្រះសង្ឃគង់ក្នុងវត្តនេះផងអះអាងថា ការដកតំណែងព្រះតេជគុណជា ហ៊ឺ ពីចៅអធិការវត្តនោះ គឺធ្វើឡើងដោយយោងលើរបាយការណ៍មួលបង្កាច់របស់អាចារ្យឈ្មោះស ថង អាយុ៧៣ឆ្នាំ និងអាចារ្យក្រៅវត្តឈ្មោះរឿង ឆាន ហៅម៉ិ អាយុ៥០ឆ្នាំ ។ អ្នកភូមិឱ្យដឹងទៀតថា ព្រះសង្ឃក្នុងវត្តទាំងអស់រាប់ទាំងពលរដ្ឋរាប់រយនាក់ផង បានគាំទ្រមិនឱ្យមានការដកតំណែងចៅអធិការវត្តនាមជា ហ៊ឺ ទេ លើកលែងតែអាចារ្យឡេមឡឺម២នាក់ប៉ុណ្ណោះប្រឆាំង ហើយថែមទាំងធ្វើរបាយការណ៍ភូតកុហកមួលបង្កាច់ចៅអធិការវត្តជូនមន្រ្តីសង្ឃ និងមន្ត្រីធម្មការស្រុកឱ្យដកតំណែងព្រះអង្គទៀត ពិតជាគ្មានសីលក្នុងខ្លួនមែន ។ ប៉ុន្តែនៅថ្ងៃកើតហេតុនោះ អាចារ្យស ថង បានបដិសេធថា គាត់មិនបានធ្វើរបាយការណ៍ចោទប្រកាន់ទេ បើទោះជាអក្សរដែលសរសេរក្នុងរបាយការណ៍នោះត្រូវព្រះសង្ឃ និងអ្នកភូមិរាប់រយនាក់អះអាងថា ជាអក្សរគាត់ក្ដី ។ អាចារ្យថង បាននិយាយបែបយករួចខ្លួនថា រឿងដកតំណែងចៅអធិការវត្តនាមជា ហ៊ឺ មិនពាក់ព័ន្ធនឹងគាត់ទេ ហើយរបាយការណ៍មានខ្លឹមសារ៨ចំណុចចោទប្រកាន់ចៅអធិការនោះក៏មិនមែនជារបាយការណ៍គាត់ដែរ គឺអាចជារបាយការណ៍របស់មន្រ្តីថ្នាក់លើ ដែលតាមដានសកម្មភាពព្រះអង្គកន្លងមកនេះ ។
យ៉ាងណាក្ដី អធិករណ៍ក្នុងវត្តស្វាយធំ ត្រូវបានបញ្ចប់ហើយ ត្រឹមអាជ្ញាធរឃុំបានប្រកាសធ្វើតាមសំណូមពរភាគច្រើនរបស់ព្រះសង្ឃ និងប្រជាពលរដ្ឋនៅក្នុងមូលដ្ឋាន ។ អាជ្ញាធរក៏បានប្រកាសនៅចំពោះមុខព្រះសង្ឃ និងប្រជាពលរដ្ឋផងដែរ នូវរាល់ការបញ្ចប់ភារកិច្ចរបស់«អាចារ្យតែថេះ»២នាក់ដែលអ្នកភូមិហៅថា អាចារ្យ«មេរោគ» ។ លោកហុន សុគុន មេឃុំអូរដំបង២បានបញ្ជាក់ថា ឈ្មោះស ថង និងឈ្មោះរឿង ឆាន ហៅម៉ិ ពួកគាត់គ្មានភារកិច្ចចាត់ចែងការងារក្នុងវត្តស្វាយធំទៀតទេ តែក្នុងនាមជាពុទ្ធបរិស័ទពួកគាត់មានសិទ្ធិគ្រប់គ្រាន់ក្នុងការធ្វើបុណ្យទាននៅវត្តនេះ ។ លោកមេឃុំបញ្ជាក់បន្ថែមថា ចំពោះតំណែងគ្រូចៅអធិការវត្ត គ្រូសូត្រឆ្វេង គ្រូសូត្រស្ដាំ និងតំណែងជួរគណៈកម្មការ អាចារ្យ ដែលទើបជ្រើសតាំងថ្មីនេះ នឹងប្រកាសជាផ្លូវការនៅពេលខាងមុខ ៕
ចែករំលែកព័តមាននេះ