រាជធានីភ្នំពេញ ៖ ថ្ងៃទី២៨ កញ្ញា ឆ្នាំ២០១២ វេលាម៉ោង៨និង៣០នាទី នៅវិមានសន្តិភាព មានបើកអង្គប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី៤ ដើម្បីឆ្លង ៖
រាជធានីភ្នំពេញ ៖ ថ្ងៃទី២៨ កញ្ញា ឆ្នាំ២០១២ វេលាម៉ោង៨និង៣០នាទី នៅវិមានសន្តិភាព មានបើកអង្គប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី៤ ដើម្បីឆ្លង ៖
១-សេចក្តីព្រាងច្បាប់ស្តីពីការរៀបចំ និងប្រព្រឹត្តទៅនៃឧត្តមក្រុមប្រឹក្សាការពារជាតិ ។
២-សេចក្តីព្រាងព្រះរាជក្រឹត្យ ស្តីពីការរៀបចំ និងប្រព្រឹត្តទៅនៃក្រុមប្រឹក្សាជាតិអភិវឌ្ឍន៍បៃតង និងសេចក្តីព្រាងអនុក្រឹត្យ ស្តីពីការរៀបចំ និងការប្រព្រឹត្តទៅរបស់អគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍បៃតង ។
៣-សេចក្តីព្រាងអនុក្រឹត្យ ស្ត្រីពីការរៀបចំ និងការប្រព្រឹត្តទៅរបស់អគ្គលេខាធិការដ្ឋាននៃគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា។
៤-បញ្ហាផ្សេងៗ សំណើសុំការយល់ព្រមពីគណៈរដ្ឋមន្ត្រី ដើម្បីសុំសច្ចាប័នពីស្ថាប័ននីតិប្បញ្ញតិ្តលើ ៖
៤.១-កិច្ចព្រមព្រៀងស្តីពីការបង្កើតវិទ្យាស្ថានអភិវឌ្ឍន៍បៃតងសាកល
៤.២-អនុសញ្ញាអន្តរជាតិ ស្តីពីនិយតកម្មនៃការនេសាទបាឡែន ។
ក្រោមពីស្តាប់របាយការណ៍ និងមតិពិភាក្សាផ្លាស់ប្តូរយោបល់រួចមក កិច្ចប្រជុំពេញអង្គគណៈរដ្ឋមន្ត្រីបានសម្រេចងនុម័តនូវ ៖
១-សេចក្តីព្រាងច្បាប់ ស្តីពីការរៀបចំ និងប្រព្រឹត្តទៅនៃឧត្តមក្រុមប្រឹក្សាការពារជាតិ
រដ្ឋធម្មនុញ្ញនៃព្រះរាជាណាចក្រកម្ពុជា ត្រូវបានប្រកាសដាក់ឱ្យប្រើតាំងពីឆ្នាំ១៩៩៣ មានរយៈពេលជិត២០ឆ្នាំហើយ ។ រដ្ឋធម្មនុញ្ញបានបញ្ញត្តិឱ្យបង្កើតស្ថាប័នកំពូលៗដ៏សំខាន់មួយចំនួន រួមទាំង«ឧត្តមក្រុមប្រឹក្សាការពារជាតិ»ផងដែរ ។ ក្នុងរយៈពេលបីអាណត្តិកន្លងទៅ រាជរដ្ឋាភិបាលកម្ពុជាបានរៀបចំតាក់តែង និងសុំការអនុម័តច្បាប់ ជាពិសេសច្បាប់សម្រាប់រៀបចំស្ថាប័នកំពូលៗដូចជា ៖
-ច្បាប់ស្តីពីការរៀបចំ និងប្រព្រឹត្តទៅនៃឧត្តមក្រុមប្រឹក្សានៃអង្គចៅក្រមឆ្នាំ១៩៩៤
-ច្បាប់ស្តីការរៀបចំ និងប្រព្រឹត្តទៅនៃក្រុមប្រឹក្សារាជសម្បត្តិឆ្នាំ២០០៤ ។
ស្ថាប័នកំពូលទាំងនេះកំពុងដំណើរការយ៉ាងរលូនដើម្បីជួយព្រះមហាក្សត្រលើការងារសំខាន់ៗជាច្រើន និងធានាដល់ការប្រព្រឹត្តទៅនៃស្ថាប័នកំពូលទាំងបីដោយនិរន្តរភាព ។
សេចក្តីព្រាងច្បាប់ស្តីពីការរៀបចំ និងប្រព្រឹត្តទៅនៃឧត្តមប្រឹក្សាការពារជាតិ ជាច្បាប់រៀបចំអង្គការកំពូលទាក់ទងជាមួយស្ថាប័នព្រះមហាក្សត្រ និងស្ថាប័ននីតិប្រតិបត្តិ ដើម្បីទទួលខុសត្រូវលើការងារសំខាន់ៗក្នុងការធានាការពាររដ្ឋធម្មនុញ្ញា ការពារឯករាជ្យជាតិ អធិបតេយ្យ បូរណភាពទឹកដីនៃព្រះរាជាណាចក្រកម្ពុជា និងធានាការអនុវត្តតួនាទី ភារកិច្ច សមត្ថកិច្ចរបស់កងយោធពលខមេរភូមិន្ទ ។
សមាសភាពនៃឧត្តមក្រុមប្រឹក្សាការពារជាតិ មានព្រះមហាក្សត្រជាព្រះអធិបតី នាយករដ្ឋមន្ត្រីជាអនុប្រធាន និងឥស្សរជនជាន់ខ្ពស់សំខាន់ៗនៃរាជរដ្ឋាភិបាលជាសមាជិក ។
សេចក្តីព្រាងច្បាប់ស្តីពីការរៀបចំ និងប្រព្រឹត្តទៅនៃឧត្តមក្រុមប្រឹក្សាការពារជាតិ មានចំនួន០៦ជំពូក និង១១មាត្រា ។
២-សេចក្តីព្រាងព្រះរាជក្រឹត្យស្តីពីការរៀបចំ និងការប្រព្រឹត្តទៅនៃក្រុមប្រឹក្សាជាតិអភិវឌ្ឍន៍បៃតង និងសេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់អគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍បៃតង ព្រះរាជាណាចក្រកម្ពុជា បានចុះហត្ថលេខាជាមួយនឹងប្រទេសហត្ថលេខីចំនួន១៦ទៀតលើកិច្ចព្រមព្រៀងក្នុងការបង្កើតវិទ្យាស្ថានអភិវឌ្ឍន៍បៃតង(GGGI)ដែលជាអង្គការអន្តរជាតិ ។
ផលប្រយោជន៍ចម្បងក្នុងនាមជាសមាជិកអង្គការអន្តរជាតិ GGGI គឺជំរុញសេដ្ឋកិច្ចកម្ពុជាឆ្ពោះទៅកាន់សេដ្ឋកិច្ចបៃតង ដែលផ្តោតលើប្រសិទ្ធភាពប្រើប្រាស់ធនធានធម្មជាតិ ចីរភាពបរិស្ថាន ការពារបៃតង បច្ចេកវិទ្យាបៃតង និងកំណែទម្រង់សេដ្ឋកិច្ចដោយគិតគូរបន្ថែមលើការលើកទឹកចិត្តបៃតងដូចជា ពន្ធបៃតង ហិរញ្ញវត្ថុបៃតង ពិសេសឥណទានបៃតង មីក្រូហិរញ្ញវត្ថុបៃតង និងវិនិយោគទុនបៃតង ។ ផ្អែកលើភាពជោគជ័យនៃគោលនយោបាយឈ្នះ-ឈ្នះរបស់សម្តេចអគ្គមហាសេនាបតីតេជោ ហ៊ុន សែន និងជោគជ័យនៃគោលនយោបាយ យុទ្ធសាស្ត្រចតុកោណ ក្រុមប្រឹក្សាជាតិអភិវឌ្ឍន៍បៃតងសរសេរអក្សរកាត់ ក.ជ.អ.ប នឹងក្លាយជាយន្តការគ្រឹះឆ្លើយតបទៅនឹងគោលការណ៍សេដ្ឋកិច្ចបៃតងរបស់អង្គការសហប្រជាជាតិ ផ្តោតលើកិច្ចការពារបរិស្ថាន ការអភិវឌ្ឍសេដ្ឋកិច្ច និងការកាត់បន្ថយភាពក្រីក្រដែលអង្គការសហប្រជាជាតិបានប្រជុំសម្រេចយកគោលការណ៍នេះនៅក្នុងសន្និសីទកំពូលភពផែនដី Rio-20 នៅប្រទេសប្រេស៊ីល ចាប់ពីថ្ងៃទី២០ ដល់ថ្ងៃទៅ២២ មិថុនា ឆ្នាំ២០១២ ។ ដូច្នេះ ប្រទេសកម្ពុជានឹងដើរតួឈានមុខគេ និងជាគំរូក្នុងការអនុវត្តគោលនយោបាយអភិវឌ្ឍន៍បៃតងសហប្រជាជាតិ នៅក្នុងបណ្តាប្រទេសអាស៊ាន និងអាស៊ីប៉ាស៊ីហ្វិក ។
សេចក្តីព្រាងព្រះរាជក្រឹត្យស្តីពីការបង្កើតក្រុមប្រឹក្សាជាតិអភិវឌ្ឍន៍បៃតងមាន០៦ជំពូក និង១១មាត្រា ។
សេចក្តីព្រាងអនុក្រឹត្យ ស្តីពីការរៀបចំ និងការប្រព្រឹត្តទៅរបស់អគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍បៃតង មាន០៥ជំពូក និង១២មាត្រា ។
អគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍បៃតង ដែលត្រូវបានបង្កើតដោយអនុក្រឹត្យនេះ មានតួនាទីជាសេនាធិការផ្ទាល់ក្នុងការរៀបចំសេចក្តីព្រាងលិខិតបទដ្ឋានគតិយុត្តគោលនយោបាយ ផែនការយុទ្ធសាស្ត្រ ផែនការសកម្មភាព និងកម្មវិធីអភិវឌ្ឍន៍បៃតងដោយបញ្ជ្រាបទៅក្នុងផែនការអភិវឌ្ឍជាតិ ។
៣-សេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់អគ្គលេខាធិការដ្ឋាននៃគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ព្រះរាជក្រឹត្យលេខ នស/រកត/០២១២/០៧៩ចុះថ្ងៃទី១៦ កុម្ភៈ ឆ្នាំ២០១២ បានបង្កើតគណៈកម្មាធិការគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជាដែលហៅកាត់ថា គ.អ.ឆ.ក ។ អនុវត្តតាមស្មារតីនៃព្រះរាជក្រឹត្យនេះ អគ្គលេខាធិការដ្ឋានគ.អ.ឆ.ក ត្រូវបានបង្កើត ដើម្បីធ្វើជាសេនាធិការផ្ទាល់របស់ គ.អ.ឆ.ក.ក្នុងការគ្រប់គ្រង និងអភិវឌ្ឍន៍នៅឆ្នេរសមុទ្ររួមមាន ឆ្នេរសមុទ្រ ដីចំណីឆ្នេរសមុទ្រ តំបន់រណប កោះ ដៃសមុទ្រ ស្ទឹង ព្រែក ផ្លូវទឹកដែលតភ្ជាប់ទៅនឹងសមុទ្រ និងផ្ទៃទឹកដែលជាប់នឹងឆ្នេរសមុទ្រនៃព្រះរាជាណាចក្រកម្ពុជា ប្រកបដោយនិរន្តរភាពនិងការទទួលខុសត្រូវ ។
សេចក្តីព្រាងអនុក្រឹត្យនេះមានចំនួន០៥ជំពូកនិង១៦មាត្រា។
៤-បញ្ហាផ្សេងៗ
អង្គប្រជុំពេញអង្គគណៈរដ្ឋមន្ត្រី បានអនុម័តបញ្ជូន កិច្ចព្រមព្រៀង ស្តីពីការបង្កើតវិទ្យាស្ថានអភិវឌ្ឍន៍បៃតងសាកល និងអនុសញ្ញាអន្តរជាតិ ស្តីពីនិយតកម្មនៃការនេសាទបាឡែន ទៅសុំការផ្តល់សច្ចាប័នពីស្ថាប័ននីតិប្បញ្ញត្តិ ។
ក្នុងគោលបំណងជំរុញ និងលើកទឹកចិត្តដល់ការធ្វើផលិតកម្មលើវិស័យកសិកម្ម សម្តេចអគ្គមហាសេនាបតីតេជោ ហ៊ុន សែន បានសម្រេចកែសម្រួលសេចកក្តីជូនដំណឹងលេខ៦៦០ ចុះថ្ងៃទី២២ មិថុនា ឆ្នាំ២០១២ ស្តីពីការបង់ពន្ធថ្លៃឈ្នួលដីសម្បទានសេដ្ឋកិច្ច ដោយសម្រេចតម្រូវឱ្យក្រុមហ៊ុនវិនិយោគដែលទទួលបានដីសម្បទានសេដ្ឋកិច្ចបង់ថ្លៃឈ្នួលដីចំនួន៥ដុល្លារសហរដ្ឋអាមេរិកក្នុង១ហិកតា ចាប់ពីឆ្នាំទី៦ នៃការវិនិយោគ ដោយមិនរើសអើងបែងចែកប្រភេទដីដែលត្រូវធ្វើផលិតកម្មក្នុងវិស័យកសិកម្មឡើយ ។ ថ្លៃឈ្នួលដីចំនួន៥ដុល្លារសហរដ្ឋអាមេរិកក្នុង១ហិកតានេះ នឹងត្រូវកើនឡើង១ភាគរយជារៀងរាល់ឆ្នំា ។
យោងតាមបទបញ្ជាលេខ០១បប ចុះថ្ងៃទី៧ ឧសភា ឆ្នាំ២០១២ ស្តីពីវិធានការពង្រឹង និងបង្កើនប្រសិទ្ធភាពនៃការគ្រប់គ្រងសម្បទានដីសេដ្ឋកិច្ច សម្តេចអគ្គមហាសេនាបតីតេជោ ហ៊ុន សែន បានរំលឹក និងបញ្ជាក់ជាថ្មីទៀតថា ការផ្អាកជាបណ្តោះអាសន្នការផ្តល់សម្បទានដីសេដ្ឋកិច្ច ត្រូវបន្តក្នុងរយៈពេលវែង ហើយអាចនឹងឈានទៅដល់ពេលដែលសម្តេចចូលនិវត្តន៍ពីឆាកនយោបាយ ។ សម្តេចតេជោបានបញ្ជាក់បន្ថែមថា ក្រុមហ៊ុនដែលទទួលបានសិទ្ធិគ្រប់គ្រង ដីសម្បទានសេដ្ឋកិច្ច អាចនឹងរកដៃគូក្រុមហ៊ុនវិនិយោគបាន តែមិនអនុញ្ញាតឱ្យមានការផ្ទេរសិទ្ធិគ្រប់គ្រងដីសម្បទានសេដ្ឋកិច្ចទៅក្រុមហ៊ុនផ្សេងទៀតបានឡើយ ។ ក្រុមហ៊ុនវិនិយោគណាដែលរំលោភ នឹងត្រូវដកហូតសិទ្ធិគ្រប់់គ្រង ហើយបង្កកដីសម្បទានសេដ្ឋកិច្ចដែលដកហូតទុកធ្វើជាដីសម្បទានសង្គមកិច្ចជូនប្រជាពលរដ្ឋ ៕
ចែករំលែកព័តមាននេះ