រាជធានីភ្នំពេញ ៖ ថ្ងៃទី២៧ កញ្ញា ឆ្នាំ២០១២ នៅសណ្ឋាគារឡឺរ៉ូយ៉ាល់មានកិច្ចប្រជុំលើកទី៣រវាងអគ្គនាយកដ្ឋានគយនិងរដ្ឋាករកម្ពុជា ជាមួយដៃគូអភិវឌ្ឍន៍ស្តីពី«វឌ្ឍនភាពនៃការអនុវត្តយុទ្ធសាស្ត្រ និងកម្មវិធីការងារកំណែទម្រង់ និងទំនើបកម្មរបស់អគ្គនាយកដ្ឋានគយនិងរដ្ឋាករកម្ពុជា២០០៩-២០១៣» ក្រោមអធិបតីភាពដ៏ខ្ពង់ខ្ពស់ លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកបណ្ឌិតប៉ែន ស៊ីម៉ន ប្រតិភូរាជរដ្ឋាភិបាលទទួលបន្ទុកជាអគ្គនាយកគយ និងរដ្ឋាករកម្ពុជា ។
កិច្ចប្រជុំនេះមានគោលបំណងផ្សព្វផ្សាយនូវលទ្ធផលសម្រេចបាននាពេលកន្លងមកនៃការអនុវត្តកម្មវិធីកំណែទម្រង់ និងទំនើបកម្មរដ្ឋបាលគយកម្ពុជារយៈពេល៥ឆ្នាំ២០០៩-២០១៣ និងការរៀបចំផែនការសកម្មភាពសម្រាប់កម្មវិធីរយៈពេល៥ឆ្នាំ បន្ទាប់គឺ២០១៤-២០១៨ ។ សមាសភាពចូលរួមមានតំណាងដៃគូអភិវឌ្ឍន៍មកពី JICA ស្ថានទូតជប៉ុនប្រចាំព្រះរាជាណាចក្រកម្ពុជា IMF, World Bank, WCO ROCB, ADB, EU, UNESCAP និងមន្ត្រីនៃក្រសួងពាក់ព័ន្ធនានាដូចជា ក្រសួងសេដ្ឋកិច្ច និងហិរញ្ញវត្ថុ ក្រសួងមហាផ្ទៃ ក្រសួងពាណិជ្ជកម្ម ក្រសួងសុខាភិបាល ក្រសួងកសិកម្ម រុក្ខាប្រមាញ់ និងនេសាទ ក្រសួងឧស្សាហកម្ម រ៉ែ និងថាមពល ក្រសួងបរិស្ថាន កំពង់ផែស្វយ័តក្រុងព្រះសីហនុ កំពង់ផែភ្នំពេញ ព្រមទាំងមន្ត្រីគយនិងរដ្ឋាករជាច្រើនរូបទៀត ។
ក្នុងពិធីសំណេះសំណាលបើកកិច្ចប្រជុំ លោកគាត ឈន់ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសង្កត់ធ្ងន់ថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងក្រសួងសេដ្ឋកិច្ច និងហិរញ្ញវត្ថុ ជានិច្ចកាលគាំទ្រ និងចាត់ទុកថាការអនុវត្តកម្មវិធីកំណែទម្រង់ និងទំនើបកម្មរដ្ឋបាលគយ មានសារសំខាន់បំផុតក្នុងការប្រមូលចំណូល ក៏ដូចជាជំរុញកំណើនសេដ្ឋកិច្ចជាតិតាមរយៈការចូលរួមកែលម្អបរិយាកាសវិនិយោគកាន់តែប្រសើរនៅកម្ពុជា ។
តាមរយៈបទបង្ហាញស្តីពីរបាយការណ៍នៃការអនុវត្តកម្មវិធីកំណែទម្រង់ និងទំនើបកម្មរដ្ឋបាលគយកម្ពុជារយៈពេល៥ឆ្នាំ២០០៩-២០១៣ លោកបណ្ឌិតប៉ែន ស៊ីម៉ន បានលើកឡើងនូវគោលដៅយុទ្ធសាស្ត្រចំនួន៨ នៃកម្មវិធីកំណែទម្រង់ និងទំនើបកម្ម ព្រមទាំងការងារសម្រេចបាននានានៃគោលដៅទាំងនោះដែលភាគច្រើនទទួលបានជោគជ័យ ។ ក្នុងនោះការងារសម្រេចបាននូវជំហានលូតលាស់ល្អមានដូចជា៖ ការកសាងបទប្បញ្ញត្តិគយ ការអនុវត្តប្រព័ន្ធស្វ័យប្រវត្តិកម្ម ការអនុវត្តប្រព័ន្ធគ្រប់គ្រងហានិភ័យ សាមញ្ញកម្មនីតិវិធីគយ ការជំរុញយន្តការអន្តរស្ថាប័នជាមួយអង្គភាពរដ្ឋដទៃ ភាពជាដៃគូជាមួយផ្នែកឯកជន ការពង្រឹងការងារបង្ក្រាបអំពើរត់ពន្ធ ការពង្រឹងធនធានមនុស្ស ការបង្កើនកិច្ចសហប្រតិបត្តិការជាមួយអន្តរជាតិ និងការរក្សានិរន្តរភាពនៃកម្មវិធីកំណែទម្រង់ និងទំនើបកម្មរដ្ឋបាលគយជាដើម ។ល។ ទន្ទឹមនឹងនេះ ក៏នៅមានសល់ការងារមួយចំនួនតូចដែលពុំទាន់សម្រេចបានតាមផែនការ ដោយសារឧបសគ្គ និងបញ្ហាប្រឈមមួយចំនួន ។
នៅចុងបញ្ចប់នៃកិច្ចប្រជុំ លោកបណ្ឌិត ប៉ែនស៊ីម៉ន ប្រតិភូរាជរដ្ឋាភិបាលទទួលបន្ទុកជាអគ្គនាយកគយ និងរដ្ឋាករកម្ពុជា បានថ្លែងអំណរគុណដល់តំណាងមកពីស្ថាប័នពាក់ព័ន្ធនានា ជាពិសេសដៃគូអភិវឌ្ឍន៍ដែលបានរួមចំណែក និងបញ្ជាក់ពីការប្តេជ្ញាចិត្តឧបត្ថម្ភគាំទ្រ ដើម្បីសម្រេចបាននូវជោគជ័យនៃការអនុវត្តកម្មវិធីកំណែទម្រង់ និងទំនើបកម្មរដ្ឋបាលគយឆ្នាំ២០០៩-២០១៣ ។
លោកបណ្ឌិតបានគូសបញ្ជាក់ផងដែរថា អគ្គនាយកដ្ឋានគយ និងរដ្ឋាករកម្ពុជានៅបន្តត្រូវការជំនួយឧបត្ថម្ភ និងកិច្ចសហប្រតិបត្តិការថែមទៀត ក្នុងការធានានូវនិរន្តរភាពនៃការអនុវត្តកម្មវិធីកំណែទម្រង់ និងទំនើបកម្មនេះ ។ ក្នុងន័យនេះ លោកបណ្ឌិតបានស្វាគមន៍នូវកិច្ចសហប្រតិបត្តិការរបស់បណ្តាដៃគូអភិវឌ្ឍនានានៅក្នុងកិច្ចប្រជុំនេះ ក្នុងការឈានទៅកសាង និងអនុវត្តកម្មវិធីកំណែទម្រង់ និងទំនើបកម្មរដ្ឋបាលគយ សម្រាប់ឆ្នាំបន្ទាប់២០១៤-២០១៨ទៀត ។ កិច្ចប្រជុំបានបញ្ចប់នាវេលាម៉ោង៤និង៣០នាទីរសៀលថ្ងៃដដែល ៕
ចែករំលែកព័តមាននេះ