រាជធានីភ្នំពេញ ៖ នៅថ្ងៃអាទិត្យ ទី៣០ កញ្ញា ស្អែកនេះ កីឡាករ យុគ យក្សគីល មកពីក្លិបអប់រំកាយខេត្តបាត់ដំបង នឹងជួបប្រកួតសងសឹកជាលើកទី៣ជាមួយកីឡាករ វ៉ែន សុវណ្ណ មកពីក្លិបកងកេងខេត្តបាត់ដំបង នៅលើសង្វៀនទូរទស្សន៍បាយ័នបឹងស្នោ ។ ជាមួយនឹងការបរាជ័យក្រោមដៃ វ៉ែន សុវណ្ណ ពីរលើករួចមកហើយ យុគ យក្សគីល ប្រកាសថា នឹងឡើងតស៊ូឱ្យអស់ពីសមត្ថភាពសម្រាប់ថ្ងៃស្អែកនេះ ។
កាលពីឆ្នាំ២០១០ និងចុងខែកក្កដា ឆ្នាំ២០១២ កន្លងទៅ ជើងខ្លាំងសម្បូរល្បិច និងបច្ចេកទេសប្រកួត គឺវ៉ែន សុវណ្ណ បានបំបាក់កីឡាករជើងខ្លាំងជំនាន់ក្រោយខ្លួនកីឡាករ យុគ យក្សគីល ឱ្យចាញ់ការប្រកួតដោយពិន្ទុទាំងពីរលើកយ៉ាងអាម៉ាស់ បើទោះបីជាយុគ យក្សគីលកាលនោះល្បីឡើងកក្រើកសង្វៀនថា ជាកំពូលកីឡាករវ័យក្មេង ដែលមានសមត្ថភាពនោះក៏ដោយ ។ អីុចឹងហើយ ទើបការប្រកួតសម្រាប់ថ្ងៃស្អែកនេះ អ្នកគាំទ្រនៅតែមានជំនឿថា វ៉ែន សុវណ្ណ នឹងបន្តឈ្នះកីឡាករ យក្សគីល សាជាថ្មីម្តងទៀត ។ វ៉ែន សុវណ្ណ ជាអ្នកប្រដាល់ដែលមានកណ្តាប់ដៃល្អ វាយចេញត្រង់ខ្លាំង ហើយរហ័ស ប៉ុន្តែរយៈពេលចុងក្រោយនេះ លោកហាក់បាត់បង់កម្លាំងស៊ុហ្វខុសប្លែកពីមុន បើទោះជាបច្ចេកទេស និងស្នៀតអាចនិយាយបានថា នៅតែជារឿងពិបាកឱ្យកីឡាករយុគ យក្សគីល សងសឹកនិងស្តារមុខមាត់បានក៏ដោយ។
យុគ យក្សគីល និយាយថា ចំពោះលទ្ធភាពឈ្នះលោកនៅមិនទាន់សង្ឃឹមឡើយដោយសារតែ វ៉ែន សុវណ្ណ គឺជាខ្លាចាស់ម្នាក់ដែលនៅក្រចក និងចង្កូមស្រួច ហើយសម្បូរល្បិចក្នុងការវាយលុកខ្លាំង ។ ទោះជាយ៉ាងណា លោកបានត្រៀមខ្លួនរួចអស់ហើយ ដើម្បីស្តារមុខមាត់ឡើងវិញ បន្ទាប់ពីការប្រកួតមួយរយៈចុងក្រោយចេះតែចាញ់ ធ្វើឱ្យអ្នកស្នេហាកីឡាប្រដាល់ដកសេចក្តីទុកចិត្ត ។ លោកបញ្ជាក់ដូចកាលកំពុងតាំងចិត្តថា នឹងស្តារភាពអាមា៉ាស់សម្រាប់ការប្រកួតថ្ងៃស្អែក មិនឱ្យទទួលបរាជ័យជាលើកទី៣ទៀតទេ ដើម្បីរំលេចប្រជាប្រិយភាពដែលធ្លាប់បាត់បង់កន្លងមកឱ្យមានសន្ទុះម្តងទៀត ។ ជាមួយនឹងការតាំងចិត្តនេះ លោកបានបញ្ជាក់ថា ខ្លួនផ្អាកធ្វើការលីសែង និងបម្រើការងារមួយចំនួន ដោយងាកមកបន្សាំុខ្លួននឹងការហ្វឹកហាត់បានច្រើនជាងមុននាប៉ុន្មានអាទិត្យចុងក្រោយនេះផងដែរ ដើម្បីកុំឱ្យ វ៉ែន សុវណ្ណ យកប្រៀបលើខ្លួនបាន ។ លោកអះអាងថា នឹងតស៊ូដណ្តើមយកជ័យជម្នះត្រឡប់មកវិញឱ្យខាងតែបាន ដើម្បីកុំឱ្យកេរ្តិ៍ឈ្មោះក្លិបរបស់លោកបាក់មុខ និងកុំឱ្យអ្នកធ្លាប់គាំទ្ររូបលោកមានអារម្មណ៍អន់ចិត្តកាន់តែខ្លាំងជាងនេះ ។ ជាមួយនឹងការប្រកាសនេះ អ្នកខ្លះមានការជឿជាក់តាមដោយសារតែគេសំអាងថា យុគ យក្សគីល មានវ័យក្មេងជាង វ៉ែន សុវណ្ណ ដែលច្បាស់ថា ពិតជាមានកម្លាំងពេញ និងស៊ុហ្វល្អជាង ។
ម្យ៉ាងបច្ចេកទេស និងស្នៀតក្នុងការប្រកួត ក៏លោកមានចំណុចល្អមិនជាចាញ់ប្រៀបកីឡាករវ៉ែន សុវណ្ណ ប៉ុន្មានដែរទើបគេពិបាកប៉ាន់ស្មានសម្រាប់ការប្រកួតនាថ្ងៃស្អែករវាងគូសងសឹកមួយគូនេះ។ ទោះយ៉ាងណា គេនៅតែទុកចិត្តលើវ៉ែន សុវណ្ណ ថានឹងឈ្នះលើការប្រកួតនេះដោយសារតែបច្ចេកទេសនៃការប្រកួតរបស់លោកត្រូវគេសម្គាល់ថា កម្របើកច្រកឲ្យកីឡាករ យុគ យក្សគីល វាយលុកចូលបានណាស់ ។ កីឡាករយុគ យក្សគីល និយាយថា វ៉ែន សុវណ្ណ ពិតជាមានស្នៀតប្រដាល់ល្អជាងខ្លួន ប៉ុន្តែលោកមិនជឿថា ការជួបគ្នាលើកទី៣នេះ នៅតែមិនអាចធ្វើឲ្យលោកស្ដារមុខមាត់បាននោះទេ ក្រោយពីលោកបានដាក់កំហិតខ្លួនឯងសន្សំកម្លាំង និងបង្កើនក្បាច់គុននាមួយរយៈចុងក្រោយនេះ។
លោកនៅតែបញ្ជាក់ដោយការតាំងចិត្តថា ជ័យជម្នះ ឬបរាជ័យវាមិនអាចកំណត់ទុកបានទេ ក្នុងពេលការឡើងរេញជាក់ស្ដែងមិនទាន់មកដល់ប៉ុន្តែអ្វីដែលលោកប្រាកដទុកជាមុន គឺការពុះពារ និងការតស៊ូដណ្ដើមយកកេរ្តិ៍ឈ្មោះត្រឡប់មកវិញ ដើម្បីស្ដារមុខមាត់ក្នុងសង្វៀនប្រដាល់ឲ្យខាងតែបានខណៈដែលការស្ដារមុខមាត់នោះ គឺត្រូវគិតពីការឡើងរេញជាមួយកីឡាករ វ៉ែន សុវណ្ណ ហើយដណ្តើមជ័យជម្នះឱ្យបាន ។ ការប្រកួតលើកចុងក្រោយរបស់ វ៉ែន សុវណ្ណ គឺចាញ់សិស្សប្អូន អ៊ុង វិរៈ មកពីក្លិបកងពលតូចឆត្រយោង៩១១ ដោយពិន្ទុ រីឯយុគ យក្សគីល ចាញ់ក្រោមដៃ វ៉ែន សុវណ្ណ ដែលជាគូសងសឹកចាស់ដោយពិន្ទុ។ ដូច្នេះហើយទើបគេជឿថា ការប្រកួតសងសឹករបស់យុគ យក្សគីល សម្រាប់ថ្ងៃស្អែក ជាមួយវ៉ែន សុវណ្ណ គឺពិតជាល្អមើល ដ្បិតបើយុគ យក្សគីល នៅតែប្រហែសបណ្ដោយឲ្យចាញ់ វ៉ែន សុវណ្ណ ម្ដងទៀត គឺប្រាកដជាអាម៉ាស់មុខ ហើយស្រួលមិនស្រួលលោកអាចបាត់ឈ្មោះពីបញ្ជីកីឡាករជើងខ្លាំង ក្នុងផ្នត់គំនិតរបស់អ្នកទស្សនាដែលកំពុងរង់ចាំទស្សនាការប្រកួតសម្រាប់ថ្ងៃស្អែកផងក៏មិន
ដឹង ។
ដោយឡែកនៅសង្វៀនដដែលនោះដែរ ក៏មានការប្រកួតរវាងកីឡាករខេមរ ជ័យ មកពីក្លិបខេមរៈកីឡា និងកីឡាករកែវ លីហូ មកពីក្លិបដំបងគ្រញូងខេត្តបាត់ដំបង។ កីឡាការិនីហេង ពិសី មកពីក្លិបព្រៃទទឹងខេត្តបាត់ដំបង និងកីឡាការិនី ម៉ុន សម្រស់ មកពីក្លិបមិត្តប៉ូលិស។ កីឡាករ កែវ រំជោត មកពីក្លិបដំបងគ្រញូងខេត្តបាត់ដំបង និងកីឡាករ សុខ វិរៈ មកពីក្លិបតេជរាជសីហ៍ខេត្តក្រចេះ និងគូប្រកួតចុងក្រោយគឺរវាងកីឡាករ ឈឿន ឆៃដែន អ្នកប្រដាល់ក្លិបនិរោធមានជ័យ នឹងត្រូវជួបជាមួយ នឿន សាវឌី អ្នកប្រដាល់ក្លិបអេភូថងកីឡា ៕
ចែករំលែកព័តមាននេះ