ទីបំផុតកីឡាការិនីលំដាប់ទី២ពិភពលោកម៉ារីយ៉ា សារ៉ាប៉ូវ៉ាត្រូវវេចសម្ពាយដើរចេញពីកម្មវិធី Pan Pacific Openបន្ទាប់ពីបរាជ័យក្រោមថ្វីដៃកីឡាការិនីអូស្ត្រាលីសាម៉ាន់ថា ស្តូសួក្នុងវគ្គ១/៤ផ្តាច់ព្រ័ត្រនៅទីក្រុងតូក្យូកាលពីម្សិលមិញ ។ ស្របពេលជាមួយគ្នានោះ នាងវិចតូរីយ៉ា អាហ្សារេនកាក្នុងនាមជាកីឡាការិនីលំដាប់ទី១ពិភពលោកក៏បានដកខ្លួនពីកម្មវិធីនេះផងដែរបន្ទាប់ពីមានបញ្ហាសុខភាព ។
សារ៉ាប៉ូវ៉ាដែលជាម្ចាស់ជើងឯក Pan Pacific Openនេះនៅឆ្នាំ២០០៥ និង២០០៩ ត្រូវនាងស្តូសួយកឈ្នះក្នុងលទ្ធផល ៦-៤និង៧-៦ ។ នៅវគ្គបន្ទាប់ ស្តូសួនឹងជួបប្រកួតជាមួយកីឡាការិនីរុស្ស៊ីម្នាក់ទៀតគឺនាងណាឌៀ ប៉េដ្រូវ៉ាដែលបានយកឈ្នះកីឡាការិនីអូស្ត្រាលីសារ៉ា អេរ៉ានីក្នុងលទ្ធផល ៣-៦,៧-៥និង៦-៣ ។ សូមបញ្ជាក់ថា នៅមុននេះ ស្តូសួធ្លាប់ប៉ះជាមួយសារ៉ាប៉ូវ៉ាចំនួន១១លើករួចមកហើយ តែនាងឈ្នះតែ១លើកប៉ុណ្ណោះ ។
ជើងឯក U.S. Openឆ្នាំ២០១១រូបនេះបានថ្លែងថា ៖«នៅពេលអ្នកមិនទទួលបានឱកាស២-៣លើកជាប់ៗគ្នានោះ អ្នកពិតជាមិនដឹងថា តើមានអ្វីកើតឡើងនោះទេ ។ ខ្ញុំទទួលបានឱកាសបែបនេះ ហើយទីបំផុតក៏អាចធ្វើវាបាន »។ សារ៉ាប៉ូវ៉ាវិញបានថ្លែងថា៖«តាមពិត នាង(ស្តូសួ)មានឱកាសឈ្នះការប្រកួតនេះយ៉ាងងាយស្រួល ប៉ុន្តែខ្ញុំបានធ្វើឱ្យនាងពិបាក ។ តជាការពិតណាស់ ការប្រកួតរបស់ខ្ញុំល្អច្រើនជាងពេលមុន »។
ចំណែកនាងអាហ្សារេនកាបានដកខ្លួនចេញមុនការជួបជាមួយនាង Angelique Kerberក្នុងវគ្គ១/៤ផ្តាច់ព្រ័ត្រ ។ ការដកខ្លួននេះបានបើកផ្លូវឱ្យ Kerberឡើងទៅវគ្គ១/២ផ្តាច់ព្រ័ត្រយ៉ាងងាយស្រួលពោលគឺដោយពុំចាំបាច់ចំណាយកម្លាំងបន្តិចណាសោះ ។
នៅវគ្គនេះ Kerberនឹងប៉ះជាមួយកីឡាការិនីការពារជើងឯកសញ្ជាតិប៉ូឡូញអានីយ៉េស្កា រែដវ៉ាន់ស្កាដែលបានបំបាក់កីឡាការិនីដាណឺម៉ាកការ៉ូលីន វ៉ូនីអាកគីក្នុងលទ្ធផល៦-៤និង៦-៣ ៕
ចែករំលែកព័តមាននេះ