រាជធានីភ្នំពេញ ៖ រថយន្តម៉ាកមីតស៊ុយប៊ីស៊ីម៉ុងតឺរ៉ូស៊េរីទំនើបពណ៌ខ្មៅ មួយគ្រឿងរបស់លោកឧត្តមសេនីយ៍ទោ កងរាជអាវុធហត្ថលើផ្ទៃប្រទេសម្នាក់បានជួបគ្រោះថ្នាក់ចរាចរណ៍បុកជាមួយរថយន្តម៉ាកឡង់គ្រីស្ស័រ ស៊េរី២០១២ ពណ៌ខ្មៅ មួយគ្រឿងរបស់លោកជ្រាង សុផាន់ អភិបាលរងរាជធានីភ្នំពេញ ចំកង់ក្រោយបណ្តាលឱ្យរថយន្តទាំង២រងការខូចខាតបន្តិចបន្តួចប៉ុណ្ណោះ ។ អ្វីដែលធ្វើឱ្យមានការចាប់អារម្មណ៍ភាគីរថយន្តរបស់លោកឧត្តមសេនីយ៍ ហាក់ដូចជាមិនទទួលនូវកំហុសឡើយ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦និង១០នាទីព្រលប់ថ្ងៃទី២៧ កញ្ញា ២០១២ នៅរង្វង់មូលទួលគោក ស្ថិតនៅសង្កាត់បឹងកក់ទី២ ខណ្ឌទួលគោក ។ គ្រោះថ្នាក់នោះលោកជ្រាង សុផាន់ និងលោកឧត្តមសេនីយ៍ទោវៀត ថា (រហស្សនាមចក្រី) ដែលជាម្ចាស់ស្ថិតក្នុងរថយន្តសុទ្ធតែមានអ្នកបើកបររៀងខ្លួង ។
បន្ទាប់ពីជួបគ្រោះថ្នាក់ខាងលើលោកឧត្តមសេនីយ៍បានចោទប្រកាន់ថា រថយន្តលោកជ្រាង សុផាន់ បើកកៀររថយន្តរបស់គាត់ ព្រមទាំងស្តីបន្ទោស។ ចំណែកអ្នកបើកបររថយន្តលោកអភិបាលរងបានចោទប្រកាន់ថា ខាងរថយន្តលោកឧត្តមសេនីយ៍ជាអ្នកបុកគេពីក្រោយ ។ នៅយប់នោះម្ចាស់រថយន្តបានធ្វើដំណើរទៅបាត់ទុកឱ្យអ្នកបើកបរ និងតំណាងជាអ្នកដោះស្រាយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ