កាលពីថ្ងៃពុធ ទី២៦ កញ្ញា តម្លៃប្រេងឆៅធ្លាក់ដល់ក្រោម៩០ដុល្លារក្នុង១បារ៉ែលនៅទីក្រុងញូវយ៉ក ខណៈដែលក្រុមវិនិយោគិនមានក្តីបារម្ភចំពោះតម្រូវការស្របពេលដែលវិបត្តិបំណុលនៅអឺរ៉ុបចេះតែកើនឡើងឥតឈប់ឈរ។ តម្លៃប្រេងនៅទីក្រុងញូវយ៉កធ្លាក់ចុះ១,៣៩ដុល្លារ មកនៅ៨៩,៩៨ដុល្លារ ក្នុង១បារ៉ែល ដែលជាការធ្លាក់ចុះក្រោម៩០ដុល្លារ លើកដំបូងចាប់តាំងពីថ្ងៃទី២ សីហា មក ។ ចំណែកនៅទីក្រុងឡុងដ៍វិញ តម្លៃប្រេងឆៅរបស់ក្រុមហ៊ុន Brent Noth បានធ្លាក់ចុះ៤១សេន មកនៅ១១០,០៤ដុល្លារក្នុង១បារ៉ែល ។
លោកដេវីដ បូកហូដ (David Bouckhort) អ្នកជំនាញប្រចាំទីផ្សារមូលប័ត្រ TD និយាយថា ទីផ្សារប្រេងនាពេលបច្ចុប្បន្នឃើញថា មានដំណើរការល្អច្រើនគិតមកដល់ត្រីមាសទី៣នេះ ព្រោះតែមានការរំពឹងទុកពីវិធានការជំរុញសេដ្ឋកិច្ចពីសំណាក់ធនាគារកណ្តាលនានា ។ ឥឡូវនេះ ក្រោយពីមានការប្រកាសពីវិធានការជំរុញសេដ្ឋកិច្ចនោះមកឃើញថា អ្វីដែលបានរំពឹងទុកបានប្រែ
ក្លាយជាមិនសូវល្អដូចការរំពឹងទុកនោះទេ ។
កាលពីពេលថ្មីៗនេះ នៅប្រទេសអេស្ប៉ាញ និងក្រិក កើតមានការតវ៉ាប្រឆាំងនឹងវិធានការមួយចំនួនរបស់រដ្ឋាភិបាល ក្នុងនោះក្រុមបាតុករនៅប្រទេសក្រិក បាននាំគ្នាធ្វើការតវ៉ាប្រឆាំងនឹងរដ្ឋាភិបាលចំពោះវិធានការកាត់បន្ថយថវិកា ស្របពេលដែលមានការតវ៉ាប្រឆាំងនឹងវិធានការរឹតត្បិតថវិកាពីសំណាក់រដ្ឋាភិបាលអេស្ប៉ាញ ។ បាតុកម្មតវ៉ាប្រឆាំងទាំងពីរបានរុញច្រានឱ្យទីផ្សារហិរញ្ញវត្ថុអឺរ៉ុបដាំក្បាលចុះ និងបង្កក្តីបារម្ភដល់ក្រុមវិនិយោគិន ៕
ចែករំលែកព័តមាននេះ