រាជធានីភ្នំពេញ ៖ ថ្ងៃសៅរ៍ ទី២៩ កញ្ញាស្អែកនេះ ការប្រកួតដណ្តើមខ្សែក្រវាត់អាជ្ញាធរជាតិប្រយុទ្ធប្រឆាំងគ្រឿងញៀនរវាងម្ចាស់ខ្សែក្រវាត់ អូត ភូថង និង អ៊ុង វីរៈ នឹងចាប់ផ្តើមហើយនៅសង្វៀនស្ថានីយទូរទស្សន៍បាយ័នបឹងស្នោ ។ ព្រឹត្តិការណ៍សំខាន់នេះ ត្រូវបានអ្នកស្នេហាវិស័យកីឡាប្រដាល់ទន្ទឹងរង់ចាំទស្សនាគ្រប់គ្នា ព្រោះក្រៅពីគូដណ្តើមខ្សែក្រវាត់នេះក៏នៅមានគូពិសេសៗល្បីឈ្មោះក្នុងពិភពប្រដាល់ចូលរួមបញ្ចេញក្បាច់គុននាពេលនោះផងដែរ ។
កីឡាករកែងឆេះជង្គង់ហោះ អូត ភូថង មកពីក្លិបក្រសួងមហាផ្ទៃ និងកីឡាករចិត្តមុតមិនចេះខ្លាច អ៊ុង វីរៈ មកពីក្លិបកងពលតូចឆត្រយោង៩១១ នឹងឡើងប្រកួតគ្នានៅថ្ងៃសៅរ៍ស្អែកនេះ មិនដឹងថាធ្វើឱ្យមហាជនរំជួលចិត្តកម្រិតណាទេ ខណៈដែលការជួបគ្នាលើកនេះម្នាក់ជាអ្នកការពារខ្សែក្រវាត់ ឯម្នាក់ទៀតជាអ្នកដណ្តើមខ្សែក្រវាត់ដើម្បីពាក់សម្ញែងមហាជនបង្ហាញឱ្យឃើញភាពខ្លាំងគ្មានគូប្រៀបរបស់ខ្លួន ។ ដូច្នេះហើយទើបធ្វើឱ្យអ្នកទស្សនាមួយចំនួនមានការពិបាកប៉ាន់ស្មានពីលទ្ធផលចាញ់-ឈ្នះណាស់ ព្រោះពួកគេទាំងពីរនាក់សុទ្ធតែមានចំណុចពិសេសមិនងាយផ្តួលគ្នាស្រួលៗដូចគូផ្សេងឡើយ ។ ក្រុមអ្នកគាំទ្រកីឡាករចាស់វស្សាសម្បូរតិចនិកប្រកួត អូត ភូថង ចង់ឱ្យអូត ភូថង បញ្ចេញឱ្យអស់ពីសមត្ថភាពក្នុងនាមជាអ្នកប្រដាល់ល្បីឈ្មោះច្រើនឆ្នាំ និងជាម្ចាស់ខ្សែក្រវាត់ទៀតផង បើចាញ់អ្នកប្រដាល់ជើងថ្មីដូច អ៊ុង វីរៈច្បាស់ជាអាម៉ាស់មុខមិនខាន ។
ស្របពេលមួយរយៈចុងក្រោយនេះ អ្នកប្រដាល់ចិត្តមុត អ៊ុង វីរៈ ដែលនៅខាងក្រៅឆាកប្រយុទ្ធចូលចិត្តធ្វើឫកពាសុភាព តែនៅលើសង្វៀនមិនចេះខ្លាចនរណាឡើយ រីឯវិជ្ជាគុនកាន់តែវិវឌ្ឍទៅរកភាពល្អប្រសើរគួរឱ្យកត់សម្គាល់ទៀតផង ។ អីុចឹងហើយទើប អូត ភូថង មិនចង់ជួបប្រកួតជាមួយឡើយព្រោះតែមិនហ៊ានធានារឿងឈ្នះកីឡាករ អ៊ុង វីរៈ ដែលសម្បូរកម្លាំងវាយមិនចេះហត់ ។ ទោះយ៉ាងណាគេមិនទាន់ដឹងមុនសភាពជាក់ស្តែងកើតឡើងបានទេ ព្រោះការប្រកួតតែងតែមានការប្រែប្រួលអាស្រ័យលើការហ្វឹកហាត់ដិតដល់ ពេលខ្លះយោងលើសំណាងក៏មានដែរ ។
គួរបញ្ជាក់ផងដែរថា កីឡាករ អូត ភូថងបានរបូតខ្សែក្រវាត់មួយរួចទៅហើយកាលដើមខែសីហា ក្រោយពីប្រកួតចាញ់កីឡាករ កែវ រំចង់ ក្នុងទឹកទី៤ ។ ដោយឡែក អ៊ុង វីរៈ ក៏អូតភូថង ធ្លាប់ប៉ះគ្នាពីរលើកដែរ ដោយលើកទី១ អូត ភូថង ឈ្នះពិន្ទុ និងលើកទី២ ត្រូវអ៊ុង វីរៈ ផ្តួលឱ្យសន្លប់ក្នុងទឹកទី៤ក្នុងព្រឹត្តិការណ៍ប្រកួតផ្តាច់ព្រ័ត្រជ្រើសរើសជើងឯកទូទាំងប្រទេសកាលពីឆ្នាំ ២០១១ កន្លងទៅ ។
ចំណែកគូពិសេសល្បីឈ្មោះ១គូទៀតដែលមហាជនចង់មើលខ្លាំងដែរនោះគឺការប្រកួតរវាងកីឡាករ វង្ស ណយ មកពីក្លិបកងពលតូចលេខ៣១ និងកីឡាករមុខស្រស់ ចាន់ រតនា មកពីក្លិបខេមរខ្លាហោះ ។ ចំពោះអ្នកប្រដាល់សម្បូរបទពិសោធន៍ទាំងពីររូបនេះ មិនធ្លាប់មានប្រវត្តិជួបគ្នាម្តងណាឡើយ ។
ភាពខ្លាំងរបស់វង្ស ណយ គឺរូបគេពូកែខាងប្រើកែង និងជង្គង់ ដែលតែងតែធ្វើឱ្យគូប្រកួតបាក់ស្បាត រីឯចាន់ រតនា វិញ មានជំនាញខាងប្រើស្នៀតនាគវាត់កន្ទុយ និងទាត់ផ្កាប់ចាន ដែលធ្វើឱ្យគូប្រកួតបរាជ័យមិនតិចនាក់ទេ ។ ចាន់ រតនា ស្ទើរកម្ពស់បន្តិច ទើបតម្រូវឱ្យប្រយ័ត្នបំផុតពេលប្រកួតក្រែងភ្លាត់ស្នៀតត្រូវកែង និងជង្គង់ វង្ស ណយ ច្បាស់ជាវីវរមិនខាន ។
សម្រាប់គូប្រកួតមិត្តភាពនៅគ្រានោះដែរមានកីឡាករ សុិន ជីវ័ន មកពីក្លិបរកាខ្នុរគ្រឿងញៀន ប្រកួតជាមួយកីឡាករ សូយ កក្កដា មកពីក្លិបអូដឹមកីឡា ។ កីឡាករ កែវ មនោរា មកពីក្លិបនិរោធមានជ័យ ប្រកួតជាមួយកីឡាករ បឺត សំខាន់ មកពីក្លិបសាលវ័ន្តកីឡា ៕
ចែករំលែកព័តមាននេះ