ខេត្តបន្ទាយមានជ័យ ៖ ដើម្បីរឹតបន្តឹងការអនុវត្តច្បាប់ចរាចរណ៍ផ្លូវគោកឱ្យកាន់តែមានប្រសិទ្ធភាពកាត់បន្ថយអត្រាគ្រោះថ្នាក់ចរាចរណ៍ឱ្យនៅកម្រិតទាប នាយប់ថ្ងៃទី២៥ កញ្ញា កម្លាំងនគរបាលចរាចរផ្លូវគោកខេត្តបានចុះធ្វើយុទ្ធនាការត្រួតពិនិត្យជាតិស្រវឹងលើអ្នកបើកបរទោចក្រយានយន្តពេលយប់លើដងផ្លូវជាតិលេខ៥ ស្ថិតក្នុងភូមិ៤ សង្កាត់ព្រះពន្លា ក្រុងសិរីសោភ័ណ ។
លោកវរសេនីយ៍ទោឈឿម សុផុន នាយការិយាល័យនគរបាលចរាចរខេត្តបន្ទាយមានជ័យបានឱ្យដឹងថា អនុវត្តតាមបទបញ្ជារបស់លោកនាយឧត្តមសេនីយ៍អគ្គស្នងការនគរបាលជាតិ និងការណែនាំពីលោកប្រធានគណៈបញ្ជាការឯកភាពរដ្ឋបាលខេត្ត និងការដឹកនាំបញ្ជាផ្ទាល់របស់លោកឧត្តមសេនីយ៍ស្នងការនគរបាលខេត្តបន្ទាយមានជ័យឱ្យកម្លាំងនគរបាលចរាចរផ្លូវគោក ធ្វើយ៉ាងណាត្រូវចុះត្រួតពិនិត្យលើការអនុវត្តច្បាប់ចរាចរណ៍ផ្លូវគោកឱ្យបានជាក់លាក់ ទើបនៅយប់ថ្ងៃទី២៥ កញ្ញា កម្លាំងនគរបាលចរាចរខេត្តបានត្រួតពិនិត្យអ្នកបើកបរទោចក្រយានយន្តពេលយប់ដែលមានជាតិស្រវឹង មិនពាក់មួកសុវត្ថិភាព ម៉ូតូគ្មានកញ្ចក់ជាដើម ។
ជាលទ្ធផលកម្លាំងត្រួតពិនិត្យទៅលើម៉ូតូបានចំនួន៣៣គ្រឿងដែលក្នុងនោះអ្នកបើកម៉ូតូមិនពាក់មួកសុវត្ថិភាពមានចំនួន៦គ្រឿង គ្មានកញ្ចក់មើលក្រោយ២គ្រឿង ត្រួតពិនិត្យអ្នកបើកម៉ូតូដែលសង្ស័យមានជាតិស្រវឹង២៥គ្រឿង ក្នុងនោះបានរកឃើញអ្នកមានជាតិស្រវឹងចំនួន១០នាក់ ។លោកនាយការិយាល័យបានបញ្ជាក់ថា ក្នុងរយៈពេលមួយថ្ងៃអត្រាអ្នកស្លាប់ដោយគ្រោះថ្នាក់ចរាចរណ៍ទូទាំងប្រទេសមានចំនួនពី៥ទៅ៦នាក់ របួសធ្ងន់-ស្រាលពី១០ទៅ១៥នាក់ ដូច្នេះដើម្បីឱ្យអត្រាគ្រោះថ្នាក់ចរាចរណ៍មានកម្រិតទាប លុះត្រាតែអ្នកបើកយានយន្តគ្រប់ប្រភេទចូលរួមគោរពច្បាប់ចរាចរណ៍ទាំងអស់គ្នា ៕
ចែករំលែកព័តមាននេះ